అమెరికాను విడిచి వెళితే తిరిగి రావడం కష్టమే?

అమెరికా అధ్యక్షుడు డొనాల్డ్ ట్రంప్ కఠినమైన వలస విధానాలు అమెరికాలో పనిచేస్తున్న భారతీయ ఉద్యోగుల్లో తీవ్ర భయాందోళనలు కలిగిస్తున్నాయి. ముఖ్యంగా ప్రస్తుతం అమెరికాను విడిచి వెళితే తిరిగి రాలేమోననే ఆందోళన వారిని వెంటాడుతోంది. ఏటా వేలాది మంది భారతీయులు ఉన్నత విద్య , ఉద్యోగం కోసం అమెరికా వెళుతుంటారు. అయితే ట్రంప్ అధ్యక్షుడైన తర్వాత ఈ సంఖ్య గణనీయంగా తగ్గింది. వీసాల సంఖ్యను తగ్గించడంతో పాటు, ఇమ్మిగ్రేషన్ నిబంధనలను కూడా ట్రంప్ ప్రభుత్వం కఠినతరం చేసింది. దీంతో అమెరికా వెళ్లడానికి విదేశీయులు అంతగా ఆసక్తి చూపడం లేదు.

అయితే ఇప్పటికే అమెరికాలో ఉన్న విద్యార్థులు , ఉద్యోగులు సైతం ఆందోళన చెందుతున్నారు. ట్రంప్ ఎప్పుడు ఎలాంటి నిర్ణయం తీసుకుంటారో అనే భయం వారిని నిత్యం వెంటాడుతోంది. ఈ నేపథ్యంలో అమెజాన్, గూగుల్, మైక్రోసాఫ్ట్, ఆపిల్ వంటి పెద్ద టెక్ కంపెనీలు తమ H1B వీసా కలిగిన ఉద్యోగులను దేశం వెలుపలికి ప్రయాణించవద్దని హెచ్చరిస్తున్నాయి. ఈ పరిణామాలు భారతీయ ఉద్యోగులను తీవ్ర ఒత్తిడికి గురిచేస్తున్నాయి, చాలా మంది తమ స్వదేశానికి వెళ్లాలనే ఆలోచనను కూడా వాయిదా వేసుకుంటున్నారు.

- H1B వీసాదారులపై ఒత్తిడి, ప్రయాణాలపై ఆంక్షలు

ట్రంప్ ప్రభుత్వం కొత్త వలస విధానాలను అమలు చేస్తుండటంతో H1B వీసా ఉన్నవారు అమెరికాను విడిచి వెళ్లాలంటే భయపడుతున్నారు. ఈ వీసా కలిగి ఉన్న వారిలో ఎక్కువ మంది భారతీయులే. వీరంతా సిలికాన్ వ్యాలీలోని టెక్ కంపెనీలలో ముఖ్యమైన స్థానాల్లో ఉన్నారు. అమెరికా విడిచి వెళితే, తిరిగి వచ్చే సమయంలో కస్టమ్స్ అధికారులు క్షుణ్ణంగా తనిఖీలు చేస్తారని, అంతేకాకుండా వీసాను రద్దు చేసే లేదా తిరిగి అనుమతించని ప్రమాదం కూడా ఉందని కంపెనీలు హెచ్చరిస్తున్నాయి. దీని కారణంగా, భారతీయ ఉద్యోగులు కుటుంబ కార్యక్రమాలు, వ్యాపార సమావేశాలు లేదా వ్యక్తిగత అవసరాల కోసం కూడా తమ స్వదేశానికి రావడం లేదు.అమెజాన్, గూగుల్, మైక్రోసాఫ్ట్, ఆపిల్ వంటి సంస్థలు తమ ఉద్యోగులకు ఇమెయిల్స్ , సమావేశాల ద్వారా అమెరికా వెలుపల ప్రయాణాలు చేయవద్దని సూచిస్తున్నాయి. ఒకవేళ ప్రయాణం తప్పనిసరి అయితే, ఇమ్మిగ్రేషన్ న్యాయవాదులను సంప్రదించి, అవసరమైన అన్ని పత్రాలను సిద్ధంగా ఉంచుకోవాలని సలహా ఇస్తున్నాయి. భారతీయ ఉద్యోగులు తమ కుటుంబ సభ్యులను కలవడం, వివాహాలు ,ఇతర ముఖ్యమైన సందర్భాల కోసం భారతదేశానికి రావడాన్ని వాయిదా వేస్తున్నారు. కొంతమంది ఉద్యోగులు "ఇప్పుడు వెళితే, మళ్లీ అమెరికాలోకి రాగలమా అనే భయం ఉంది" అని తమ ఆందోళనను వ్యక్తం చేస్తున్నారు.

- కఠిన వలస విధానాల నేపథ్యం:

ట్రంప్ 2025 జనవరిలో రెండోసారి అధ్యక్ష బాధ్యతలు చేపట్టిన తర్వాత, వలస విధానాలను మరింత కఠినంగా అమలు చేస్తున్నారు. H1B వీసా పునఃపరిశీలనలు, గ్రీన్ కార్డ్ దరఖాస్తు ప్రక్రియల్లో కొత్త నిబంధనలు, అమెరికా జాతీయ భద్రత పేరుతో చేపడుతున్న తనిఖీలు విదేశీ ఉద్యోగులను ఒత్తిడికి గురిచేస్తున్నాయి. ఈ విధానాలు ముఖ్యంగా భారతీయ ఐటీ నిపుణులపై తీవ్ర ప్రభావం చూపుతున్నాయి, ఎందుకంటే H1B వీసా కలిగి ఉన్న వారిలో భారతీయులే ఎక్కువ.

ట్రంప్ ప్రభుత్వం గతంలో కొందరి వీసాలను రద్దు చేసిన సందర్భాలు ఉన్నాయి. దీంతో, వీసాదారులు చిన్న తప్పు చేసినా వీసా రద్దు లేదా దేశ బహిష్కరణకు గురవుతామనే భయంతో ఉన్నారు. అమెరికా విమానాశ్రయాలలో H1B , గ్రీన్ కార్డ్ హోల్డర్లను గంటల తరబడి ప్రశ్నిస్తూ తనిఖీలు చేయడం ఎక్కువైంది. ఈ అనుభవాలు ఉద్యోగుల్లో భయాన్ని మరింత పెంచుతున్నాయి.

- భారతీయ ఉద్యోగులపై దీర్ఘకాలిక ప్రభావం:

ఈ కఠినమైన వలస విధానాలు భారతీయ ఉద్యోగుల జీవన విధానం , మానసిక ఆరోగ్యంపై తీవ్ర ప్రభావం చూపుతున్నాయి. చాలా మంది ఉద్యోగులు తమ కెరీర్ భవిష్యత్తు, కుటుంబ సమావేశాలు , వ్యక్తిగత జీవితం గురించి ఆందోళన చెందుతున్నారు. అమెరికాలో స్థిరపడాలని ఆశతో H1B వీసాపై పనిచేస్తున్నవారు.. ఈ అనిశ్చితి కారణంగా తమ ప్రణాళికలను మార్చుకోవలసిన పరిస్థితి ఏర్పడింది.

అమెరికాను విడిచి వెళ్లాలా వద్దా అనే సందిగ్ధంలో ఉద్యోగులు మానసిక ఒత్తిడిని ఎదుర్కొంటున్నారు. కొంతమంది ఉద్యోగులు తమ ఉద్యోగ ఒత్తిడితో పాటు ఈ వీసా సమస్యల వల్ల పనితీరుపై ప్రభావం పడుతోందని చెబుతున్నారు. కొంతమంది భారతీయ ఉద్యోగులు కెనడా, ఆస్ట్రేలియా , యూరప్ వంటి ఇతర దేశాలలో ఉద్యోగ అవకాశాల కోసం చూస్తున్నారు. ఎందుకంటే అక్కడి వలస విధానాలు కొంతవరకు అనుకూలంగా ఉన్నాయి.

- టెక్ కంపెనీల సలహాలు:

టెక్ కంపెనీలు తమ ఉద్యోగుల భవిష్యత్తును దృష్టిలో ఉంచుకుని వీసా సంబంధిత సమస్యలపై చురుకుగా స్పందిస్తున్నాయి. అమెరికా వలస విధానాలలో వచ్చే ఆకస్మిక మార్పులను ఎదుర్కోవడానికి, కంపెనీలు తమ H1B ఉద్యోగులకు ఈ క్రింది సలహాలు ఇస్తున్నాయి. ఉద్యోగులు తమ వీసా, పాస్‌పోర్ట్ , ఉద్యోగ ఒప్పందం వంటి అన్ని పత్రాలను ఎల్లప్పుడూ సిద్ధంగా ఉంచుకోవాలి. ఏదైనా ప్రయాణం చేయాలనుకుంటే, ఇమ్మిగ్రేషన్ న్యాయవాదులను సంప్రదించి, వీసా స్థితిని నిర్ధారించుకోవాలి. అత్యవసర పరిస్థితులు ఉంటే తప్ప, అనవసర ప్రయాణాలను నివారించాలి.