గ్రీన్కార్డ్ భద్రత.. కఠిన నిబంధనల నడుమ అనిశ్చితి!
గతంలో గ్రీన్కార్డ్ ఉంటే అమెరికా బయట ఎంతకాలమైనా ఉండొచ్చనే ధీమా ఉండేది. కానీ ఇప్పుడు 'ఎగ్జిట్ ట్రాకింగ్' వ్యవస్థను బలోపేతం చేయడం ద్వారా యూఎస్ కస్టమ్స్ అండ్ బోర్డర్ ప్రొటెక్షన్ (సీబీపీ) ప్రతి కదలికనూ రికార్డు చేస్తోంది.;
అమెరికా కల సాకారం చేసుకుని అక్కడ స్థిరపడాలని భావించే లక్షలాది మంది వలసదారులకు ఇప్పుడు ‘గ్రీన్కార్డ్’ రక్షణ కవచంలా కాకుండా ఒక భారంగా మారుతోందా? ప్రస్తుత పరిణామాలు చూస్తుంటే అవుననే సమాధానం వినిపిస్తోంది. ట్రంప్ ప్రభుత్వ హయాంలో మొదలైన వలస విధానాల కఠినత 2026 నాటికి మరింత ముదురుతుండటం.. ముఖ్యంగా లీగల్ పర్మనెంట్ రెసిడెంట్ల (ఎల్.పీ.ఆర్) గుండెల్లో రైళ్లు పరిగెత్తిస్తోంది. అమెరికా గడ్డపై అడుగుపెట్టే హక్కు ఉన్నప్పటికీ, ఆ హక్కును కాపాడుకోవడం ఇప్పుడు ఒక కత్తిమీద సాములా మారింది.
నిఘా నీడన ‘నివాసం’
గతంలో గ్రీన్కార్డ్ ఉంటే అమెరికా బయట ఎంతకాలమైనా ఉండొచ్చనే ధీమా ఉండేది. కానీ ఇప్పుడు 'ఎగ్జిట్ ట్రాకింగ్' వ్యవస్థను బలోపేతం చేయడం ద్వారా యూఎస్ కస్టమ్స్ అండ్ బోర్డర్ ప్రొటెక్షన్ (సీబీపీ) ప్రతి కదలికనూ రికార్డు చేస్తోంది. ఆరు నెలలకు మించి విదేశాల్లో గడిపితే ఆ వ్యక్తికి అమెరికాలో నివసించే ఉద్దేశం లేదని భావించి రెసిడెన్సీ వదిలేసినట్టు ముద్ర వేయడం ఆందోళనకరం. ఈ నిబంధన వల్ల కేవలం పర్యాటకులు మాత్రమే కాదు.. కుటుంబ అవసరాల రీత్యా స్వదేశాలకు వెళ్లే భారతీయులు, మెక్సికన్లు తీవ్ర ఇబ్బందులు ఎదుర్కొంటున్నారు.
సరిహద్దుల్లో మారుతున్న సమీకరణాలు
ఈ భయాందోళనల ప్రభావం ఆర్థికంగా కూడా కనిపిస్తోంది. తక్కువ అద్దెలు ఉంటాయని మెక్సికోలోని టిజువానా వంటి ప్రాంతాల్లో ఉంటూ అమెరికాలో పని చేసే గ్రీన్కార్డ్ హోల్డర్లు ఇప్పుడు వెనక్కి మళ్లుతున్నారు. చట్టపరమైన హోదాను కోల్పోవడం కంటే అమెరికాలో అధిక అద్దెలు చెల్లించడమే మేలని వారు భావించడం వలసదారుల నిస్సహాయతకు అద్దం పడుతోంది. దీనివల్ల అటు మెక్సికో రియల్ ఎస్టేట్ రంగం దెబ్బతింటుండగా ఇటు అమెరికా నగరాల్లో గృహాల కొరత మరింత తీవ్రమయ్యే ప్రమాదం ఉంది.
2026 సవాళ్ల కాలం
నేషనల్ ఫౌండేషన్ ఫర్ అమెరికన్ పాలసీ గణాంకాల ప్రకారం చట్టబద్ధ వలసలు ఇప్పటికే గణనీయంగా తగ్గాయి. 2026 నాటికి హెచ్–1బీ వీసాల జారీ ప్రక్రియ మరింత ఖరీదైనదిగా కఠినంగా మారనుందన్న అంచనాలు వలసదారుల భవిష్యత్తును ప్రశ్నార్థకం చేస్తున్నాయి. సెకండరీ ఇన్స్పెక్షన్ల పేరుతో విమానాశ్రయాల్లో జరుగుతున్న విచారణలు.. పన్ను చెల్లింపుల తనిఖీలు ఒక రకమైన అభద్రతను సృష్టిస్తున్నాయి.
మార్గం ఏమిటి?
ఇలాంటి సంక్లిష్ట పరిస్థితుల్లో గ్రీన్కార్డ్ దారులు కేవలం ‘హక్కు’ మీద మాత్రమే ఆధారపడకుండా ‘జాగ్రత్త’ వహించడం అనివార్యం. ఏడాదికి మించి విదేశాల్లో ఉండాల్సి వస్తే తప్పనిసరిగా 'రీఎంట్రీ పర్మిట్' (ఐ-131) తీసుకోవడం కనీస అవసరం. అమెరికాలోనే తమ శాశ్వత నివాసం ఉందని నిరూపించడానికి పన్ను పత్రాలు, ఆస్తి వివరాలు, ఉద్యోగ ధ్రువీకరణ పత్రాలను సిద్ధంగా ఉంచుకోవాలి. 180 రోజుల నిబంధన పట్ల అవగాహన కలిగి ఉండటం వల్ల ఆఖరి నిమిషం ఇబ్బందులను తప్పించుకోవచ్చు.
అమెరికా ఆర్థిక వ్యవస్థలో వలసదారులు కీలక భాగస్వాములు. అయితే జాతీయ భద్రత, వలసల నియంత్రణ పేరుతో అమలవుతున్న కఠిన చర్యలు నిజాయితీ కలిగిన గ్రీన్కార్డ్ దారులను వేధింపులకు గురిచేయకూడదు. చట్టాలను గౌరవించడం పౌరుల బాధ్యత అయితే ఆ చట్టాలు పారదర్శకంగా మానవీయంగా ఉండేలా చూడటం ప్రభుత్వ బాధ్యత. గ్రీన్కార్డ్ దారులు ఇప్పుడు తమ ‘అమెరికన్ డ్రీమ్’ను కాపాడుకోవడానికి మరింత అప్రమత్తంగా ఉండాల్సిన సమయం ఆసన్నమైంది.