ట్రంప్ పై విమర్శలా? అమెరికాలో భారతీయులకు హెచ్చరిక

అమెరికా కలలతో సాఫ్ట్‌వేర్ తీరాలకు చేరుకున్న భారతీయ నిపుణులకు ఇప్పుడు ఒక కొత్త రకమైన భయం పట్టుకుంది. అది కేవలం ఉద్యోగ కోతలకు సంబంధించింది మాత్రమే కాదు.. సోషల్ మీడియాలో వారు చేసే పోస్టులకు సంబంధించినది కూడా. ముఖ్యంగా డొనాల్డ్ ట్రంప్ పాలనలో ఇమిగ్రేషన్ నిబంధనలు కఠినతరం అవుతున్న తరుణంలో రాజకీయ విమర్శలు చేయడంపై నిపుణులు హెచ్చరిస్తున్నారు.

నిఘా నీడలో సోషల్ మీడియా ఖాతాలు?

ఇటీవలి నివేదికల ప్రకారం అమెరికా హోమ్‌ల్యాండ్ సెక్యూరిటీ విభాగం సోషల్ మీడియా ప్లాట్‌ఫాంలపై నిఘాను పెంచే అవకాశం ఉందని వార్తలు వస్తున్నాయి. ప్రభుత్వ విధానాలను లేదా దేశాధినేతలను తీవ్రంగా విమర్శించే విదేశీయుల వివరాలను సేకరించడం ద్వారా వారి 'విజిలెన్స్ ప్రొఫైల్' ను తనిఖీ చేసే అవకాశం ఉంది. సాధారణంగా అమెరికా రాజ్యాంగం ప్రకారం 'ఫ్రీడమ్ ఆఫ్ స్పీచ్' ఉన్నప్పటికీ అది విదేశీ పౌరులకు ముఖ్యంగా వీసా నిబంధనలకు లోబడి ఉండేవారికి ఎంతవరకు వర్తిస్తుందనేది చర్చనీయాంశంగా మారింది.

భారతీయులపై ప్రభావం ఎలా ఉంటుంది?

అమెరికాలో లక్షలాది మంది భారతీయులు ఐటీ, కార్పొరేట్ రంగాల్లో స్థిరపడ్డారు. వీరిలో ఎక్కువ మంది హెచ్1బీ, ఎల్1 వీసాలపై ఉంటారు. వీరికి ఈ పరిణామం ఎందుకు ప్రమాదకరం అంటే వీసా ఇంటర్వ్యూల సమయంలో అభ్యర్థి సోషల్ మీడియా చరిత్రను తనిఖీ చేసే అధికారం అధికారులకు ఉంటుంది. కంపెనీలు కూడా తమ ఉద్యోగుల పబ్లిక్ పోస్టుల వల్ల సంస్థకు చెడ్డ పేరు రాకూడదని భావిస్తాయి. ప్రభుత్వ వ్యతిరేక ప్రచారాలు లేదా విద్వేషపూరిత ప్రసంగాలుగా పరిగణించబడే పోస్టులు డిపోర్టేషన్ వరకు దారితీయవచ్చు.

నిపుణులు ఇస్తున్న సూచనలు

ప్రస్తుత గందరగోళ పరిస్థితుల్లో నిపుణులు భారతీయ ఉద్యోగులకు కొన్ని కీలక సూచనలు చేస్తున్నారు. సాధ్యమైనంత వరకు అమెరికా అంతర్గత రాజకీయాలపై సోషల్ మీడియాలో బహిరంగ విమర్శలు చేయకపోవడమే ఉత్తమం. మీ ఫేస్‌బుక్, ఎక్స్ , ఇన్స్టాగ్రామ్ ఖాతాలను 'ప్రైవేట్' మోడ్‌లో ఉంచుకోవడం మంచిది. పాత పోస్టులను ఒకసారి సమీక్షించుకుని, వివాదాస్పదంగా అనిపించే వాటిని తొలగించడం సురక్షితం. ఇమిగ్రేషన్ చట్టాల్లో వస్తున్న మార్పుల గురించి ఎప్పటికప్పుడు అప్‌డేట్ అవుతూ ఉండాలి. లేకపోతే మీరు అమెరికా నుంచి బహిష్కరించబడుతారనడంలో ఎలాంటి సందేహం లేదు.

అమెరికాలో మీ కెరీర్, భవిష్యత్తు ముఖ్యం. కాబట్టి భావోద్వేగంతో చేసే ఒక చిన్న పోస్ట్ మీ సంవత్సరాల కష్టాన్ని బూడిద చేయకుండా చూసుకోవాల్సిన బాధ్యత మీపైనే ఉంది.