24 మందిని వెనక్కి నెట్టి 'మిసెస్ తెలుగు యూఎస్ఏ'గా నిలిచిన గుడివాడ అమ్మాయి!
అమెరికాలో తెలుగువారి ప్రతిభ, సంస్కృతి, అందాన్ని చాటిచెప్పే 'మిస్ అండ్ మిసెస్ తెలుగు యూఎస్ఏ' పోటీలు ప్రతి ఏటా ఘనంగా జరుగుతాయి.;
అమెరికాలో తెలుగువారి ప్రతిభ, సంస్కృతి, అందాన్ని చాటిచెప్పే 'మిస్ అండ్ మిసెస్ తెలుగు యూఎస్ఏ' పోటీలు ప్రతి ఏటా ఘనంగా జరుగుతాయి. ఈసారి 2025 సంవత్సరానికి గానూ ప్రతిష్టాత్మకమైన 'మిసెస్ తెలుగు యూఎస్ఏ' (Mrs Telugu USA) కిరీటాన్ని గుడివాడకు చెందిన తెలుగు మహిళ మౌనిక అట్లూరి గెలుచుకుంది. ఈ విజయం తెలుగు మహిళల ప్రతిభకు, ఆత్మవిశ్వాసానికి నిదర్శనంగా నిలిచింది.
ఈ పోటీలో ఉభయ తెలుగు రాష్ట్రాలలోని వివిధ ప్రాంతాల నుంచి వచ్చిన మొత్తం 24 మంది పోటీదారులను మౌనిక అట్లూరి వెనక్కి నెట్టి, ఈ ప్రతిష్టాత్మకమైన కిరీటాన్ని సొంతం చేసుకుంది. డల్లాస్లోని ఇర్వింగ్ ఆర్ట్స్ సెంటర్లో (Irving Arts Center, Dallas, Texas) జరిగిన అంగరంగ వైభవంగా జరిగిన ఫైనల్స్లో, మిసెస్ తెలుగు యూఎస్ఏ 2024 విజేత శ్రీయ బోప్పన, మౌనికకు కిరీటాన్ని అలంకరించారు.
మౌనిక అట్లూరి కృష్ణా జిల్లా, పామర్రు మండలం, గుడివాడ సమీపంలోని అయినంపూడి గ్రామానికి చెందినవారు. ఆమె ఒక సివిల్ ఇంజనీరింగ్ గ్రాడ్యుయేట్. హైదరాబాద్లో అసిస్టెంట్ ఎగ్జిక్యూటివ్ ఇంజనీర్గా కూడా పనిచేశారు. 2017లో వివాహం చేసుకున్న తర్వాత ఆమె అమెరికాకు వెళ్లారు. ప్రస్తుతం ఆమె యూఎస్ఏలోని సేల్స్ఫోర్స్ (Salesforce) సంస్థలో పర్మినెంట్ ఉద్యోగిగా పనిచేస్తున్నారు. మౌనిక అట్లూరి ఇద్దరు ఆడపిల్లల తల్లి. ఆమె తల్లిదండ్రులు, అట్లూరి కృష్ణ ప్రసాద్, శైలజ గుడివాడలో నివసిస్తున్నారు.
'మిసెస్ తెలుగు యూఎస్ఏ' పోటీ అనేది 'మిస్ అండ్ మిసెస్ తెలుగు యూఎస్ఏ' పేజెంట్ (Miss & Mrs Telugu USA pageant)లో ఒక భాగం. ఇది అమెరికాలోని తెలుగు మహిళల కోసం నిర్వహించే అతి పెద్ద, అత్యంత ప్రతిష్టాత్మకమైన అందాల పోటీ. ఈ పోటీలు పాల్గొనేవారి గొప్ప సాంస్కృతిక వారసత్వాన్ని, తెలుగు మూలాలను కీర్తిస్తాయి. ఈ ఈవెంట్లో అవంతికా కుండూరుకు మిస్ తెలుగు యూఎస్ఏ 2025 కిరీటం లభించింది. ఈ పోటీలు తెలుగు భాష, సంస్కృతులకు అమెరికాలో ఒక గుర్తింపును తీసుకొస్తున్నాయి.