భారత్ పై సెనెటర్ కామెంట్స్.. సారీ చెప్పాలని ఆస్ట్రేలియా ప్రధాని ఆదేశం

ఆస్ట్రేలియాలో సెంటర్-రైట్ లిబరల్ పార్టీకి చెందిన సెనెటర్ జసింటా ప్రైస్ భారతీయ వలసదారులపై చేసిన వ్యాఖ్యలు తీవ్ర రాజకీయ, సామాజిక వివాదానికి దారితీశాయి. జీవన వ్యయాలు పెరగడానికి భారత వలసదారులే కారణమని ఆమె ఆరోపణలు చేయడం, అంతేకాక లేబర్ పార్టీకి ఓటు వేసేందుకు భారత వలసదారులను అనుమతిస్తున్నారనే వ్యాఖ్యలు ఆస్ట్రేలియాలోని భారతీయ సమాజాన్ని తీవ్రంగా కలచివేశాయి. ఈ పరిణామాలపై ఆస్ట్రేలియా ప్రధాని ఆంథోనీ ఆల్బనీస్ స్పందించారు. భారత కమ్యూనిటీని బాధపెట్టినందుకు సెనెటర్ ప్రైస్ వెంటనే క్షమాపణలు చెప్పాలని ఆయన డిమాండ్ చేశారు.

సెనెటర్ జసింటా ప్రైస్ ఇటీవల ఒక ఇంటర్వ్యూలో మాట్లాడుతూ ఆస్ట్రేలియాలోని పెరుగుతున్న జీవన వ్యయాలకు ప్రధాన కారణం వలసదారులేనని ఆరోపించారు. ప్రత్యేకంగా భారతీయ వలసదారులను ఉద్దేశించి, లేబర్ పార్టీ తమకు అనుకూలంగా ఓట్లు పొందేందుకు వారిని అనుమతిస్తున్నారనే వ్యాఖ్యలు చేశారు. ఈ వ్యాఖ్యలు దేశంలో జాతి వివక్షను పెంచేవిగా ఉన్నాయని విస్తృత విమర్శలు వెల్లువెత్తాయి.

ప్రధాని ఆల్బనీస్ స్పందన

ఈ వివాదంపై స్పందించిన ఆస్ట్రేలియా ప్రధాని ఆంథోనీ ఆల్బనీస్... ప్రైస్ వ్యాఖ్యలు అవాస్తవాలని స్పష్టం చేశారు. "ఆమె వ్యాఖ్యలు భారతీయ సమాజానికి చాలా బాధ కలిగించాయి, వాటికి ఆమె వెంటనే క్షమాపణ చెప్పాలి" అని ఆల్బనీస్ అన్నారు. ప్రైస్ సొంత పార్టీలోని పలువురు నాయకులు కూడా ఆమె వ్యాఖ్యలను తీవ్రంగా ఖండించారు.

భారత కమ్యూనిటీ ఆగ్రహం

ఆస్ట్రేలియాలోని ఇండియన్ కమ్యూనిటీ ఈ వ్యాఖ్యలపై తీవ్ర ఆగ్రహం వ్యక్తం చేసింది. భారతీయ వలసదారులు ఆస్ట్రేలియా ఆర్థిక వ్యవస్థకు, సమాజానికి గణనీయమైన సహకారం అందిస్తున్నారని కమ్యూనిటీ నాయకులు గుర్తుచేశారు. ఈ వ్యాఖ్యలు జాతివివక్షను ప్రోత్సహించేవిగా ఉన్నాయని పేర్కొంటూ, సెనెటర్ ప్రైస్ బహిరంగంగా క్షమాపణలు చెప్పాలని డిమాండ్ చేశారు.

ప్రతిపక్షంలో కలకలం

ప్రైస్ వ్యాఖ్యలు ఆమె సొంత పార్టీ, సెంటర్-రైట్ లిబరల్ పార్టీని కూడా ఇబ్బందుల్లోకి నెట్టాయి. ప్రతిపక్ష నాయకులు ఈ సమస్యను ఎలా పరిష్కరించాలో తెలియక తలపట్టుకుంటున్నారు. కొంతమంది నాయకులు ప్రైస్ వ్యాఖ్యలను ఖండించగా మరికొందరు ఆమెపై చర్యలు తీసుకోవాలని కోరారు. షాడో అటార్నీ-జనరల్ జూలియన్ లీసర్ స్వయంగా భారతీయ కమ్యూనిటీకి తన సహోద్యోగి తరపున క్షమాపణలు చెప్పారు.

భారత్ స్పందన

ఈ పరిణామాలను భారత విదేశాంగ శాఖ నిశితంగా పరిశీలిస్తోంది. ఆస్ట్రేలియా ప్రభుత్వంతో నిరంతర సంప్రదింపులు కొనసాగిస్తూ, అక్కడి భారతీయుల భద్రతకు ప్రాధాన్యతనిస్తోంది. ఆస్ట్రేలియా ప్రభుత్వ హామీల మేరకు పరిస్థితిని చల్లార్చేందుకు కృషి జరుగుతోంది.

సెనెటర్ జసింటా ప్రైస్ చేసిన వ్యాఖ్యలు ఆస్ట్రేలియా రాజకీయాల్లో, సామాజికంగా తీవ్ర ప్రకంపనలు సృష్టించాయి. ఈ వివాదం వలన ఆస్ట్రేలియా-భారత్ సంబంధాలు దెబ్బతినకుండా చూసేందుకు ఆస్ట్రేలియా ప్రభుత్వం మరియు ప్రతిపక్ష పార్టీలు ఇబ్బందులు పడుతున్నాయి. భవిష్యత్తులో ఇటువంటి సంఘటనలు పునరావృతం కాకుండా చూడాలని ఆస్ట్రేలియాలోని భారతీయ కమ్యూనిటీ కోరుతోంది.