పెట్రోల్ బంక్ లో దోపిడీ.. దొంగల దారుణం..

తమిళనాడులో ఒళ్లు గగుర్పొడిచే దోపిడీ హత్య చోటుచేసుకుంది.  ఓ పెట్రోల్ బంకులో పెట్రోల్ పోయించుకున్న ముగ్గురు వ్యక్తులు బంకులో పనిచేసే వ్యక్తి వద్దనున్న డబ్బుల సంచిని లాక్కొనే ప్రయత్నం చేశారు. అతడు ఇవ్వకుండా ప్రతిఘటించడంతో దారుణంగా కత్తులతో పొడిచి పొడిచి చంపారు.

చెన్నైలోని హైవే పై ఉన్న  పెట్రోల్ పంపులో అర్ధరాత్రి విధులు నిర్వహిస్తున్న శివకుమార్ అనే వ్యక్తి యథావిధిగానే పెట్రోల్ పోస్తూ డబ్బులు తీసుకుంటున్నారు. హైవే పక్కనే ఉన్న ఈ పెట్రోల్ పంపు వద్దకు రాత్రి వచ్చిన ముగ్గురు పెట్రోల్ పంపులో ఇద్దరు మాత్రమే పనిచేస్తున్నారని గుర్తించారు. పెట్రోల్ పోశాక శివకుమార్ వద్దనున్న బ్యాగును లాక్కునే ప్రయత్నం చేశారు.కానీ శివకుమార్ ప్రతిఘటించాడు. దీంతో తమ వద్దనున్న కత్తులు తీసి శివకుమార్ మెడ - చాతి - కడుపులో విచక్షణారహితంగా దుండగుడు పొడిచాడు.5000 ఉన్న డబ్బు సంచిని తీసుకొని పారిపోయారు.

శివకుమార్ ను పొడుస్తున్నప్పుడు పక్కనే ఉన్న తోటి సిబ్బంది భయంతో పారిపోయాడు. కనీసం ఆ దారుణాన్ని ఆపే ప్రయత్నం చేయలేదు. నేరుగా పోలీసులకు ఫోన్ చేసి విషయం చెప్పడంతో వారు వచ్చి చూసేసరికి శివకుమార్ చనిపోయాడు. ఈ ఘటన మొత్తం సీసీ టీవీలో రికార్డు కావడంతో నిందితులను గుర్తించే పనిలో పోలీసులున్నారు.

తమిళనాడులో ఇటీవల హైవేలపై వరుసగా దారి దోపిడీలు జరుగుతున్నాయి. ఆ ముఠానే పెట్రోల్ బంకులో వ్యక్తిని చంపి డబ్బులు ఎత్తుకెళ్లినట్టు చెన్నై పోలీసులు పేర్కొన్నారు.

Full View