అదృష్టం తలుపుతట్టింది.. వైసీపీ అభ్యర్థికి లాటరీలో విజయం దక్కింది..

ఎన్నికలు అంటేనే గెలుపోటముల సస్పెన్స్. ఓట్ల లెక్కింపు సమయంలో ప్రతి క్షణం గుండెచప్పుడు పెరిగిపోతుంది. "ఒక్క ఓటు సాధించినా చాలు.. గెలుపు మనదే" అనే ధీమాతో అభ్యర్థులు, ప్రతిష్టాత్మకంగా భావించే అనుచరులు కౌంటింగ్ హాల్లో ప్రాణాలు అరచేతిలో పెట్టుకుని ఎదురుచూస్తుంటారు. కానీ ఓట్లు సమానమై.. ప్రజల తీర్పు ఇద్దరినీ ఒకే పీఠంపై నిలబెడితే? రాజకీయం కాస్తా అదృష్ట పరీక్షగా మారితే? అచ్చం అలాంటి వింతైన.. అరుదైన.. ఉత్కంఠభరిత సన్నివేశానికే శ్రీకాకుళం జిల్లాలోని పలాస–కాశీబుగ్గ మున్సిపాలిటీ వేదికైంది.

పలాస–కాశీబుగ్గ మున్సిపాలిటీ పరిధిలోని 35వ వార్డు మహిళా రిజర్వుడ్ ఎన్నికల ఫలితం స్థానికంగానే కాదు.. రెండు రాష్ట్రాల్లోనూ తీవ్ర చర్చనీయాంశంగా మారింది. వైఎస్సార్‌సీపీ తరఫున మార్పు అరుణ, టీడీపీ తరఫున జోగ త్రివేణి హోరాహోరీగా తలపడ్డారు. ప్రచారం నుంచి పోలింగ్ వరకు ఇరు వర్గాలు చెమటోడ్చాయి. ఓటర్లను ఆకట్టుకునేందుకు ప్రతి ఇంటి తలుపూ తట్టారు. నవంబర్ 1న పోలింగ్ ముగిసి ఈరోజు ఓట్ల లెక్కింపు మొదలైనప్పటి నుంచీ రౌండ్ రౌండ్‌కూ టెన్షన్ పీక్స్‌కు చేరింది.

చివరకు లెక్కింపు పూర్తయ్యాక అధికారులు వెల్లడించిన ఫలితం చూసి ఇరు వర్గాల అభ్యర్థులు.. కౌంటింగ్ సిబ్బంది దిగ్భ్రాంతికి గురయ్యారు. ఇద్దరు అభ్యర్థులకూ చెరో 340 ఓట్లు వచ్చాయి. ఒక్క ఓటు కూడా ఎక్కవ లేదు.. తక్కువ లేదు. ఎవరు గెలిచారు? ఎవరు ఓడారు? అనే ప్రశ్నకు సమాధానం దొరకలేదు. ఎక్కడైనా లెక్కింపులో పొరపాటు జరిగిందేమోనన్న అనుమానంతో అధికారులు ఎంతో జాగ్రత్తగా రీకౌంటింగ్ చేపట్టారు. కానీ రెండోసారి కూడా లెక్క తేలలేదు. మళ్లీ అదే 340-340 ఫలితం పునరావృతమైంది.

ఓట్ల లెక్కింపుతో విజేతను తేల్చడం అసాధ్యమని స్పష్టమవ్వడంతో ఎన్నికల నిబంధనల ప్రకారం అధికారులు లాటరీ లక్కీ డ్రా విధానాన్ని ఆశ్రయించారు. ఆ సమయంలో కౌంటింగ్ హాల్లో నెలకొన్న నిశ్శబ్దం.. ఆందోళన వర్ణనాతీతం. ఇద్దరు మహిళా నేతల భవిష్యత్తును ఇన్ని రోజుల శ్రమను నిర్ణయించేది ఆ చిన్న కాగితం ముక్కే..

అధికారులు లాటరీ చీటీని బయటకు తీసి చదివిన ఆ క్షణాన.. వైఎస్సార్‌సీపీ అభ్యర్థి మార్పు అరుణ పేరు ప్రతిధ్వనించింది. అప్పటివరకు ఆందోళనతో గడిపిన అరుణ అనుచరుల ఆనందానికి అవధులు లేకుండా పోయాయి. కన్నీళ్లతో కూడిన నవ్వులు, హర్షధ్వానాలు, ఆలింగనాలతో కౌంటింగ్ కేంద్రం వెలుపల పండుగ వాతావరణం నెలకొంది. ఒక్క ఓటు ఆధిక్యం కూడా లేకపోయినా.. అదృష్టం తలుపు తట్టడంతో అరుణను విజయం వరించింది.

ప్రజాస్వామ్యంలో ప్రజల తీర్పు ఇద్దరికీ సమానంగా లభించినా చివరకు అదృష్టదేవత చిరునవ్వు ఒకరి రాజకీయ ప్రయాణానికి బాటలు వేసింది. ఇన్ని రోజుల కష్టం, ఉత్కంఠ చివరకు ఒక చిరస్మరణీయ అనుభవంగా మిగిలిపోవడంతో పలాస–కాశీబుగ్గ 35వ వార్డు ఫలితం ఇప్పుడు నెట్టింట.. స్థానికంగా ఒక హాట్ టాపిక్‌గా వైరల్ అవుతోంది.