రాహుల్ పై అదిరిపోయే పంచ్ వేసిన మోడీ

కాంగ్రెస్ ఉపాధ్యక్షుడు రాహుల్ గాంధీ టైం ఏమాత్రం బాగోలేదన్నట్లుగా ఉంది. తొందరపడి మాట్లాడితే ఎన్ని తిప్పలన్న విషయం ఆయనకు అర్థమయ్యేలా ప్రధాని మోడీ వ్యవహరిస్తున్నారు. ఉత్త పుణ్యానికి తనతో పెట్టుకుంటే ఎంత రచ్చ అవుతుందో అర్థమయ్యేలా ఆయన పంచ్ ల మీద పంచ్ లు వేస్తున్నారు. ప్రధాని మోడీకి సంబంధించిన బలమైన ఆధారాలతో ఒక విషయం తన దగ్గర ఉందని.. తాను కూడా ఆ వివరాల్ని బయటపెడితే భూకంపం వస్తుందని రాహుల్ వ్యాఖ్యానించారు.

ప్రధాని మోడీపై ఇంత ఘాటుగా విరుచుకుపడని రాహుల్.. ఉన్నట్లుండి మాట్లాడటంతో ఒక్కసారిగా అందరి దృష్టి ఆయన చేసిన వ్యాఖ్యలపై పడ్డాయి. తాజాగా మోడీపై ఆయన తన ఆరోపణల్ని వెల్లడించారు. గుజరాత్ ముఖ్యమంత్రిగా ఉన్న సమయంలో ఇద్దరు వ్యాపారవేత్తలు (సహారా.. అదిత్య బిర్లా) మోడీకి రూ.40కోట్లు ముడుపులు ఇచ్చారని ఆరోపించారు.

అయితే.. ఈ ఆరోపణలకు సంబంధించి గతంలోనే సుప్రీంకోర్టు కొట్టిపారేశాయన్న విషయం బయటకు వచ్చింది. దీంతో.. రాహుల్ చేసిన వ్యాఖ్యలు బూమరాంగ్ అయి.. ఆయనపై అందరూ జోకులు వేసుకునే పరిస్థితి. ఇలాంటి వేళ.. ప్రధాని మోడీ నోరు విప్పారు. తనపై 125 కోట్ల మంది ప్రజలకు నమ్మకం ఉందని.. కానీ.. ఒక యువనేత ఇప్పుడిప్పుడే మాట్లాడటం నేర్చుకున్నారని.. ఆయన మాట్లాడటం నేర్చుకున్నందుకు తన ఆనందానికి హద్దుల్లేకుండా ఉందంటూ వ్యంగ్య వ్యాఖ్యలు చేశారు.

‘‘మనకు కొందరు యువ రాజకీయ నేతలు ఉన్నారు. ఒక యువ రాజకీయ నేత ఎలా మాట్లాడాలో నేర్చుకుంటున్నారు. ఆయన మాట్లాడటం ప్రారంభించినందుకు సంతోషంగా ఉంది. ఉపన్యాసాలు ఎలా ఇవ్వాలో నేర్చుకుంటున్నారు. నా ఆనందానికి హద్దుల్లేకుండా ఉంది. అయితే.. ఆయన మాటలకు భూకంపం రాలేదని సంతోషంగా ఉంది’’ అంటూ రాహుల్ పేరు ఎత్తకుండానే ఎన్ని చురకలు వేయాలో అన్ని చురకలు వేసేశారు మోడీ.

Like Us on Facebook : https://www.facebook.com/Tupakidotcom/