ఫైర్ బ్రాండ్ నోట.. ‘కేసీఆర్‌కు బడితె పూజే’ అంటూ షాకింగ్ వ్యాఖ్యలు

రాజకీయంగా ప్రత్యర్థుల్ని ఎదుర్కోవాల్సిన వేళలో.. వెనుకా ముందు ఆలోచించటం.. విలువల పేరుతో పాతకాలపు రాజకీయాన్ని ఫాలో అయితే నష్టమేమిటన్న విషయంపై బాగా అవగాహన ఉన్న అధినేతల్లో తెలంగాణ రాష్ట్ర ముఖ్యమంత్రి కేసీఆర్ ఒకరు. ఆయన రాజకీయ ప్రస్థానాన్ని చూస్తే.. తనకు నచ్చిన వేళలో.. ఒకరిని ఆకాశానికి ఎత్తేసే ఆయన.. మరికొన్ని సందర్భాల్లో అదే నేతను నోటికి వచ్చినట్లుగా మండిపడటం చూశాం. తన మాటలతో తెలుగు రాజకీయాల్లోకి తిట్ల కల్చర్ ను తీసుకొచ్చిన అధినేతగా కేసీఆర్ నిలుస్తారు.

నువ్వు నేర్పిన విద్యనే నీరజాక్ష అన్న రీతిలో.. ప్రత్యర్థులపై ఘాటు వ్యాఖ్యలతో విరుచుకుపడే కేసీఆర్ కు.. ఆయన భాషలో.. ఆయన శైలిలోనే ఫైర్ కావటం తెలంగాణ పీసీసీ చీఫ్ కమ్ ఫైర్ బ్రాండ్ రేవంత్ రెడ్డికి బాగా అలవాటు. ఆయన వ్యాఖ్యల్లో ఘాటు ఎంతలా ఉంటుందంటే.. మంత్రి కేటీఆర్ లాంటి వాళ్లు సైతం ఉలిక్కిపడటమే కాదు.. బ్యాలెన్సు మిస్ అయ్యేలా ఆయన వ్యాఖ్యలు ఉంటాయి. తాజాగా సీఎం కేసీఆర్ పై మరింత ఘాటు వ్యాఖ్యల్ని సంధించారు రేవంత్ రెడ్డి.

ఇటీవల కాలంలో ఆయన నిర్వహిస్తున్న నిరుద్యోగ జంగ్ సైరన్ నిరసనలో కేసీఆర్ సర్కారు తీరును తీవ్రంగా తప్పు పట్టటం తెలిసిందే. మహబూబ్‌నగర్‌ జిల్లా అమిస్తాపూర్‌ వద్ద మంగళవారం జరిగిన విద్యార్థి, నిరుద్యోగ జంగ్‌ సైరన్‌ సభకు ముఖ్య అతిథిగా హాజరైన  ఆయన.. కొలువులు ఇచ్చే వరకు కేసీఆర్ కు బడితె పూజే అంటూ ఘాటుగా రియాక్టు అయ్యారు. నిరుద్యోగ యువతకు కొలువులు ఇస్తామన్న కేసీఆర్ సర్కారు హామీ నెరవేరలేదన్న ఆయన.. టీఆర్ఎస్ సర్కారు తీరును తీవ్రంగా ఎండగట్టారు. మాట తూలితే బాగోదని.. సీఎం కేసీఆర్ మీద అనుచిత వ్యాఖ్యలు చేస్తే ఊరుకోమని మంత్రి కేటీఆర్ వార్నింగ్ ఇచ్చినా.. పిచ్చ లైట్ తీసుకుంటున్న రేవంత్.. గులాబీ నేతలకు ఇరిటేషన్ తెప్పించేలా మరోసారి మాట్లాడారు.