రేవంత్ రెడ్డి ప్లాన్ అదిరిందిగా..

తెలంగాణ ముఖ్యమంత్రి రేవంత్ రెడ్డి మరోసారి తన రాజకీయ చాణక్యాన్ని ప్రదర్శించారు. బీసీ వర్గాలను ఆకర్షించడంలో భాగంగా ఆయన వేసిన అడుగు ఇప్పుడు రాష్ట్ర రాజకీయాల్లో సంచలనం సృష్టిస్తోంది. బీసీలకు 42 శాతం రిజర్వేషన్లు కల్పిస్తూ రాష్ట్ర అసెంబ్లీలో తీర్మానం చేసి కేంద్రానికి పంపిన ఆయన వ్యూహం బీజేపీకి పెద్ద పరీక్షగా మారింది.

బీసీలకు 42% రిజర్వేషన్లు: రేవంత్ మాస్టర్ స్ట్రోక్!

తెలంగాణలో బీసీలకు రిజర్వేషన్లు పెంచాలన్న డిమాండ్ చాలా కాలంగా పెండింగ్‌లో ఉంది. ఈ అంశాన్ని గమనించిన రేవంత్ రెడ్డి, రిజర్వేషన్ల పెంపు అనే అడుగుతో ఒకవైపు బీసీల మద్దతు కూడగట్టే ప్రయత్నం చేస్తున్నారు. మరోవైపు, దీనికి కేంద్రం అంగీకరించకపోతే బీజేపీపై బీసీల్లో వ్యతిరేకత పెంచేలా వ్యూహాత్మకంగా వ్యవహరిస్తున్నారు.

జయలలిత మాదిరిగా రేవంత్ ప్రయత్నం?

1993లో అప్పటి తమిళనాడు ముఖ్యమంత్రి జయలలిత, తమిళనాడులో రిజర్వేషన్లను 50%కి పెంచి, ఆ చట్టాన్ని కేంద్రం రాజ్యాంగంలోని 9వ షెడ్యూల్‌లో చేర్చాలని గట్టిగా ఒత్తిడి తెచ్చారు. దీంతో ఇప్పటికీ తమిళనాడులో 50 శాతం రిజర్వేషన్లు అమలవుతున్నాయి. అదే తరహాలో రేవంత్ రెడ్డి కూడా 42% బీసీ రిజర్వేషన్లను 9వ షెడ్యూల్‌లో చేర్చాలనే ప్రయత్నం చేస్తున్నారు. అయితే, ఇది కేంద్రం ఆమోదిస్తేనే సాధ్యమవుతుంది.

బీజేపీ దెబ్బ తింటుందా? లేదా రేవంత్ హీరో అవుతాడా?

ఈ వ్యూహంలో రెండు ప్రధాన పరిణామాలు ఉన్నాయి. ఒకవేళ కేంద్రం 42% బీసీ రిజర్వేషన్లకు ఆమోదమిస్తే, మొత్తం క్రెడిట్ రేవంత్ రెడ్డికే దక్కుతుంది. బీసీల ఆశాజ్యోతిగా ఆయన నిలుస్తారు. లేకపోతే, బీజేపీపై బీసీల్లో వ్యతిరేకత పెరిగే అవకాశముంది. తెలంగాణలో బీజేపీకి పుట్టగతుల లేకుండా అవుతుంది. ఎందుకంటే బీసీ ముఖ్యమంత్రి నినాదంతోనే బీజేపీ గత అసెంబ్లీ ఎన్నికల్లో పోటికి దిగింది. ఇప్పుడు బీసీ రిజర్వేషన్లు అమలు కాకుంటే తెలంగాణలో బీజేపీ విలన్ అవుతుంది. అప్పుడు కూడా రాజకీయంగా లాభదాయకం మాత్రం రేవంత్‌కే అవుతుంది. రెండు సందర్భాల్లోనూ రేవంత్ రెడ్డికి రాజకీయంగా లబ్ధి చేకూరుతుంది.

రేవంత్ రెడ్డి వేసిన ఈ చెస్ గేమ్‌లో బీజేపీ డిఫెన్స్‌లో పడిపోయింది. బీసీల మద్దతు కోరుతూ రిజర్వేషన్ల అస్త్రాన్ని వినియోగించిన ఆయన వ్యూహాత్మకంగా బీజేపీని ఇరుకున పెట్టారు. బీజేపీ దీనిపై ఎలా స్పందిస్తుంది? బీసీలతో సంబంధాన్ని బలపరుచుకుంటుందా? లేక రిజర్వేషన్లకు వ్యతిరేకంగా నిలబడి వ్యతిరేకత చవిచూస్తుందా? ఇది ఇప్పుడు రాష్ట్ర రాజకీయాల మీద మాత్రమే కాదు, కేంద్ర రాజకీయాల మీద కూడా ప్రభావం చూపే కీలక అంశం.

రేవంత్ చెస్ గేమ్ మొదలైంది... ఇప్పుడు బీజేపీ ఈ గేమ్‌ను ఎలా ఆడుతుందో చూడాలి!