అర్థం అయ్యిందా రాజా.. 500 బిలియన్ మీద ఇండియా టారిఫ్స్ వేయవద్దు అంట!

ట్రంప్ ది భారత్ పై సవతి ప్రేమ అని తాజా డీల్ చూస్తేనే అర్థమవుతోంది. ఇవాళ్టి ట్రేడ్ డీల్స్ అన్నీ ప్రేమతో కాదు… ప్రెషర్‌తో నడుస్తున్నాయి. మనం సరఫరా చేసేది తక్కువ, ట్రంప్ అడిగేది మాత్రం కొండంత. రష్యా చమురు వద్దన్నా… అదే చౌకగా దొరుకుతోంది. అమెరికా క్రూడ్ ఆయిల్ నాణ్యత తక్కువ.. ధర మాత్రం జేబు ఖాళీ చేస్తుంది. పైగా 500 బిలియన్ డాలర్ల వర్తకంపై జీరో టారిఫ్స్ అంటే భారత దేశ ఆర్థిక వ్యవస్థే మునిగే ప్రమాదం. నిజంగా ట్రంప్‌కు మనపై ప్రేమ ఉంటే డీల్స్ పేరుతో నష్టాలు మోపకుండా… హెచ్1బీ, ఎఫ్1 వీసాలపై ఉన్న కఠిన నిబంధనలనే ఎత్తివేయాలి. లాభం లేని ఒప్పందాలు దేశానికి కాదు.. రాజకీయాలకు మాత్రమే ఉపయోగపడతాయనడంలో ఎలాంటి సందేహం లేదు. అమెరికా-భారత్ ట్రేడ్ డీల్ లాభనష్టాలపై స్పెషల్ స్టోరీ..

అమెరికా అధ్యక్షుడు డొనాల్డ్ ట్రంప్ భారత్‌పై మళ్ళీ తన మార్కు 'వ్యాపార' ప్రేమను ఒలకబోస్తున్నారు. "500 బిలియన్ డాలర్ల వాణిజ్యంపై భారత్ సుంకాలను సున్నా చేయాలి" అన్నది ఆయన తాజా ప్రతిపాదన. వినడానికి ఇది ఇరు దేశాల మధ్య స్నేహబంధంలా కనిపిస్తున్నా.. దీని వెనుక ఉన్న అసలు లెక్కలు చూస్తే భారత ఆర్థిక వ్యవస్థకు ఇది ఒక పెద్ద ముప్పుగా పరిణమించే అవకాశం ఉంది.

అసమతుల్య వాణిజ్యం: ఎవరికి లాభం?

వాణిజ్యం అనేది ఎప్పుడూ ఇరు పక్షాలకు సమానంగా ఉండాలి. కానీ అమెరికా-భారత్ మధ్య ఉన్న ప్రస్తుత పరిస్థితుల్లో 'జీరో టారిఫ్' అనేది భారత్‌కు ఆత్మహత్యతో సమానమని ఆర్థిక నిపుణులు హెచ్చరిస్తున్నారు. భారత్ నుండి అమెరికాకు వెళ్లేవి ప్రధానంగా ఐటీ సేవలు, ఔషధాలు మాత్రమే. కానీ అమెరికా నుండి వచ్చేవి భారీ విమానాలు, రక్షణ ఆయుధాలు, అత్యాధునిక సాంకేతికత, వ్యవసాయ ఉత్పత్తులు. ఒకవేళ టారిఫ్స్ తీసేస్తే అమెరికా నుండి చౌకగా దిగుమతి అయ్యే వస్తువులతో భారత మార్కెట్ నిండిపోతుంది. దీనివల్ల మన దేశీయ తయారీ రంగం కుదేలయ్యే ప్రమాదం ఉంది. చిన్న, మధ్య తరహా పరిశ్రమలు అమెరికన్ కార్పొరేట్ దిగ్గజాల పోటీని తట్టుకోలేక మూతపడే పరిస్థితి వస్తుంది.

చమురు రాజకీయం: రష్యా వద్దు.. అమెరికానే ముద్దా?

ట్రంప్ వ్యూహంలో మరో ప్రధానాంశం 'రష్యా చమురు'. రష్యా నుండి భారత్ చమురు కొనడాన్ని అమెరికా మొదటి నుంచీ వ్యతిరేకిస్తోంది. రష్యా మనకు రాయితీ ధరలకే చమురు ఇస్తోంది. ఇది మన ఆర్థిక వ్యవస్థకు వెన్నెముక. కానీ అమెరికా చమురు ఖరీదైనది మాత్రమే కాదు.. దాని రవాణా ఖర్చులు కూడా భారీగా ఉంటాయి. మనకు ఎక్కడ లాభం ఉంటే అక్కడ కొనే హక్కు భారత్‌కు ఉంది. అమెరికా ఒత్తిడికి తలొగ్గి ఖరీదైన చమురు కొంటే దేశంలో పెట్రోల్, డీజిల్ ధరలు ఆకాశాన్ని తాకుతాయి. ఇది సామాన్యుడి నడ్డి విరచడమే అవుతుంది.

వీసాల ముచ్చట ఏది? 'ప్రేమ' ఉంటే ఇక్కడ చూపించాలి!

ట్రంప్ నిజంగానే భారత్‌ను 'మిత్ర దేశం'గా భావిస్తే అది వాణిజ్య సుంకాల్లో కాదు.. వీసా విధానాల్లో చూపాలని భారతీయులు కోరుకుంటున్నారు. అమెరికా అభివృద్ధిలో భారతీయుల పాత్ర కీలకం. కానీ హెచ్1బీ వీసాలపై ఆంక్షలు, గ్రీన్ కార్డ్ కోసం దశాబ్దాల నిరీక్షణ, విద్యార్థులపై కఠిన నిబంధనలు మన వారిని వేధిస్తున్నాయి. టారిఫ్స్ తగ్గించమని అడిగే హక్కు అమెరికాకు ఉండాలంటే, ముందుగా భారతీయ మేధో సంపత్తికి అమెరికాలో సరైన గౌరవం, భద్రత కల్పించాలి.

ఆర్థిక ప్రమాదం: ఇది డీల్ కాదు.. డిప్లొమాటిక్ ఒత్తిడి!

500 బిలియన్ డాలర్ల జీరో టారిఫ్ ఒప్పందం జరిగితే భారత్‌కు కలిగే నష్టాలు ఉన్నాయి. దిగుమతి సుంకాల ద్వారా ప్రభుత్వానికి వచ్చే ఆదాయం భారీగా తగ్గుతుంది. దేశీయ పరిశ్రమలు దెబ్బతినడం వల్ల నిరుద్యోగం పెరిగే అవకాశం ఉంది. ప్రతి చిన్న వస్తువు కోసం అమెరికా వైపు చూడాల్సిన పరిస్థితి వస్తుంది.

దేశ ప్రయోజనాలే పరమావధి

అర్థం అయిందా రాజా.. రాజతంత్రం అంటే మాటల్లో చెప్పే ప్రేమ కాదు.. చేతల్లో చూపే సమానత్వం. భారత్ ఇప్పుడు ఒకప్పటిలా బలహీనమైన దేశం కాదు. ప్రపంచంలోనే వేగంగా ఎదుగుతున్న ఆర్థిక వ్యవస్థ. స్నేహం పేరుతో మన ఆర్థిక ప్రయోజనాలను తాకట్టు పెట్టాల్సిన అవసరం లేదు. ట్రంప్ ప్రతిపాదనలపై భారత్ ఆచితూచి అడుగు వేయడమే శ్రేయస్కరం. వ్యాపారం అంటే ఒకరి లాభం.. మరొకరి త్యాగం కాదు.. ఇద్దరి అభివృద్ధి కావాలి!