భారత్‌లో విమాన ప్రయాణం భారం.. చుక్కలనంటనున్న టికెట్ ధరలు!

సామాన్యుడికి విమాన ప్రయాణం మళ్ళీ అందని ద్రాక్షలా మారబోతుందా? అవుననే అంటున్నాయి ప్రస్తుత పరిణామాలు. విమాన ఇంధన ధరల పెరుగుదల.. ప్రభుత్వ పన్నుల విధింపు వెరసి విమానయాన రంగంపై పెను ఒత్తిడిని పెంచుతున్నాయి. కేంద్ర ప్రభుత్వం ఇటీవల తీసుకున్న నిర్ణయం ప్రయాణికుల జేబులకు చిల్లు పెట్టడమే కాకుండా విమానయాన సంస్థలను కూడా ఆత్మరక్షణలో పడేసింది.

విండ్‌ఫాల్ ట్యాక్స్ సెగ

విమాన ఇంధనమైన ఎయివియేషన్ టర్బైన్ ఫ్యూయల్ (ఏటీఎఫ్) పై కేంద్ర ప్రభుత్వం విండ్‌ఫాల్ ట్యాక్స్‌ను భారీగా పెంచింది. ఇప్పటివరకు లీటర్‌కు రూ. 29.5 గా ఉన్న ఈ పన్నును ఏకంగా రూ. 42 కు పెంచుతూ నిర్ణయం తీసుకుంది. అంటే దాదాపు 42.4 శాతం మేర పన్ను భారం పెరిగింది. రష్యా-ఉక్రెయిన్ యుద్ధం తర్వాత ప్రపంచవ్యాప్తంగా చమురు కంపెనీలు గడిస్తున్న అదనపు లాభాలపై నియంత్రణ కోసం ఈ పన్నును ప్రవేశపెట్టినప్పటికీ అది ఇప్పుడు విమానయాన రంగానికి శాపంగా మారింది.

ఆకాశాన్ని తాకుతున్న ఏటీఎఫ్ ధరలు

ప్రస్తుతం దేశీయంగా ఏటీఎఫ్ ధరలు కిలోలీటర్‌కు రూ. 2 లక్షలను దాటడం ఆందోళన కలిగిస్తోంది. మధ్యప్రాచ్యంలో నెలకొన్న భౌగోళిక ఉద్రిక్తతలు, సరఫరా గొలుసులో ఆటంకాలు అంతర్జాతీయంగా చమురు ధరలను ప్రభావితం చేస్తున్నాయి. ఒక విమానయాన సంస్థ నిర్వహణ వ్యయంలో ఇంధన ఖర్చే దాదాపు 40 శాతం ఉంటుంది. ఈ క్రమంలో ఇంధన ధరలు, పన్నులు పెరగడం వల్ల ఎయిర్ ఇండియా, ఇండిగో, ఆకాశ ఎయిర్ వంటి దిగ్గజ సంస్థలు ఆర్థిక సంక్షోభంలో కూరుకుపోయే ప్రమాదం ఉంది.

ప్రయాణికులపై 'ఫ్యూయల్ సర్‌చార్జ్' బాదుడు

నష్టాలను తట్టుకోవడానికి విమానయాన సంస్థలు అదనపు భారాన్ని ప్రయాణికులపైకి మళ్లిస్తున్నాయి. ఫ్యూయల్ సర్‌చార్జ్ పేరుతో టికెట్ ధరలను భారీగా పెంచుతున్నాయి. ప్రధాన నగరాల మధ్య టికెట్ ధరల్లో కొన్ని వందల నుంచి వెయ్యి రూపాయల వరకు పెరుగుదల కనిపిస్తోంది. విదేశాలకు వెళ్లే ప్రయాణికులపై ఈ భారం మరీ ఎక్కువగా ఉంది. కొన్ని మార్గాల్లో టికెట్ ధరలు రూ. 10,000 వరకు పెరిగినట్లు నివేదికలు స్పష్టం చేస్తున్నాయి.

ప్రభుత్వ ఊరట సరిపోతుందా?

పరిస్థితి తీవ్రతను గమనించిన ప్రభుత్వం విమానాశ్రయాల్లో ల్యాండింగ్, పార్కింగ్ ఛార్జీలను మూడు నెలల పాటు 25 శాతం తగ్గిస్తూ ఉత్తర్వులు ఇచ్చింది. అయితే పరిశ్రమ నిపుణుల అభిప్రాయం ప్రకారం.. ఇది "ఏనుగు నోట్లో జీలకర్ర" వంటిదే. ఇంధన ధరల ద్వారా పెరిగిన వేల కోట్ల భారాన్ని ఈ స్వల్ప తగ్గింపులు భర్తీ చేయలేవని ఎయిర్‌లైన్స్ మేనేజ్‌మెంట్లు వాపోతున్నాయి.

భవిష్యత్తు సవాళ్లు

టికెట్ ధరలు ఈ స్థాయిలో పెరిగితే రాబోయే పండుగ సీజన్ , సెలవుల సమయంలో ప్రయాణికుల సంఖ్య తగ్గే అవకాశం ఉంది. ముఖ్యంగా మధ్యతరగతి ప్రజలు రైలు ప్రయాణాల వైపు మొగ్గు చూపే ప్రమాదం ఉంది. ఇది దేశీయ విమానయాన రంగ విస్తరణ ప్రణాళికలను దెబ్బతీస్తుంది.

ప్రభుత్వం తన ఆదాయ వనరులను పెంచుకోవడానికి పన్నులు వేయడం సహజమే అయినా పెరుగుతున్న ఇంధన ధరలను దృష్టిలో ఉంచుకుని విమానయాన రంగానికి కొంత ఊరటనిచ్చే సమతుల్య విధానాన్ని అనుసరించాలి. లేనిపక్షంలో సామాన్యుడికి విమాన ప్రయాణం కేవలం ఒక కలగానే మిగిలిపోయే ప్రమాదం ఉంది.