కాంగ్రెస్ పార్టీయే హిందూ పార్టీ... వివరించిన బండ్ల గణేష్!

సంచలనాలకు కేరాఫ్ అడ్రస్ అని ఫ్యాన్స్ పిలుచుకునే ప్రముఖ సినీ నిర్మాత, కాంగ్రెస్ పార్టీ నేత బండ్ల గణేశ్ మరోసారి సంచలన వ్యాఖ్యలు చేశారు. తాజాగా కాంగ్రెస్ పార్టీతో తనకున్న కమిట్మెంట్ పై కీలక వ్యాఖ్యలు చేశారు. ఇందులో భాగంగా... తాను కాంగ్రెస్ పార్టీలోనే పుట్టానని.. కాంగ్రెస్ పార్టీలోనే చనిపోతా అని అంటున్నారు గణేష్.

అవును... మంథనిలో ఏర్పాటు చేసిన కాంగ్రెస్ కార్యకర్తల సమావేశంలో మాట్లాడిన బండ్ల గణేష్... కాంగ్రెస్ పార్టీతో తనకున్న అనుబంధం, కమిట్మెంట్ పై కీలక వ్యాఖ్యలు చేశారు. లోక్ సభ ఎన్నికలు సమీపిస్తున్న వేళ తనవంతు ప్రచారం చేస్తున్న ఆయన... తెలంగాణలో పద్నాలుగు లోక్ సభ స్థానాల్లోనూ కాంగ్రెస్ పార్టీ అభ్యర్థులు పక్కాగా గెలవాలని అన్నారు.

ఇందులో భాగంగా ప్రధానంగా పెద్దపల్లి లోక్ సభ నియోజకవర్గంలోని కాంగ్రెస్ పార్టీ అభ్యర్థి గడ్డం వంశీకృష్ణ భారీ మెజార్టీతో గెలుపొందడం ఖాయమని జోస్యం చెప్పిన ఆయన... తాను మంథనికి వచ్చిప్పుడు కొందరిని ఎవరికి ఓటు వేస్తావని అడిగితే... సర్ మేం హిందువులం.. బీజేపీకి ఓటేస్తాం అని చెప్పారని పేర్కొన్నారు. దీంతో... అసలైన హిందుత్వ పార్టీ అంటే కాంగ్రెస్సే అని వారిని క్లారిటీ ఇచ్చినట్లు బండ్ల వెల్లడించారు.

ఈ సందర్భంగా వారికి హిందుత్వం గురించి మరింతగా వివరించినట్లు చెప్పిన బండ్ల గణేష్... తనకు 50 సంవత్సరాలని, ఇందులో 34 ఏళ్లు శబరిమలై వెళ్లి వచ్చినట్లు తెలిపారు. ఈ సమయంలో బీజేపీకే ఓటు వేస్తామని చెప్పిన వ్యక్తితో... "నువ్వు నాకంటే గొప్ప హిందువు కాదు.. మీరు శ్రీరామ్ శ్రీరామ్ అంటూ పేరెత్తుతున్నారు.. కానీ, నేను బతికేదే శ్రీరాముడిని నమ్ముకొని!" అని వివరించినట్లు చెప్పుకొచ్చారు.

అదేవిధంగా... తాము నమ్ముకునేదే ఆంజనేయుడిని అని.. ఉదయం నిద్రలేస్తే అంజనేయుడిని, వెంకటేశ్వరస్వామిని, అయ్యప్పను తలుచుకుంటామని.. ఇదే సమయంలో... తాము ముస్లిం, క్రైస్తవులను గౌరవిస్తాం మని.. ఈ సమయంలో తమ కంటే హిందువులు ఎవరూ లేరని.. తమ అణువణువునా హిందుత్వం ఉందని.. అసలు కాంగ్రెస్ పార్టీయే హిందూ పార్టీ అని వారికి సమాధానం ఇచ్చినట్లు గణేష్ వెల్లడించారు.