అసలైన పేరు లేకుండా.. కన్నప్పపై మనోజ్ ఎమోషనల్ పోస్ట్

ప్యాన్ ఇండియా స్థాయిలో తెరకెక్కిన మైథలాజికల్ సినిమా కన్నప్ప జూన్ 27న ప్రేక్షకుల ముందుకు రానుంది. ఈ చిత్రాన్ని మంచు విష్ణు తన డ్రీమ్ ప్రాజెక్ట్‌గా భారీ బడ్జెట్ తో రూపొందించారు. శివభక్తి నేపథ్యంతో రూపొందిన ఈ భారీ బడ్జెట్ చిత్రానికి తెలుగు సహా పలు భాషల్లో భారీ అంచనాలు ఏర్పడ్డాయి. ముఖ్యంగా ప్రభాస్, మోహన్‌లాల్, అక్షయ్ కుమార్, కాజల్ అగర్వాల్ వంటి స్టార్ క్యాస్ట్ ఈ సినిమాపై ఆసక్తిని పెంచాయి.

ఈ నేపథ్యంలో మంచు మనోజ్ కన్నప్ప టీమ్‌కు తన శుభాకాంక్షలు తెలియజేస్తూ సోషల్ మీడియా లో ఓ హార్ట్‌ఫుల్ పోస్ట్ చేశారు. తన తండ్రి (మోహన్‌బాబు) ఎంతో ప్రేమ, శ్రమతో ఈ సినిమా రూపొందించారని, ఈ సినిమా బ్లాక్‌బస్టర్‌గా మారాలని ప్రార్థిస్తున్నానని మనోజ్ భావోద్వేగంగా రాశారు. అలాగే పిల్లలు అరియానా, వివియానా, అవ్రామ్ సినిమాలో కనిపించబోతున్నారని, వారిని బిగ్ స్క్రీన్‌పై చూడాలని ఎంతో ఎదురు చూస్తున్నానని తెలిపారు.

అయితే ఈ పోస్ట్‌లో ఆసక్తికర విషయం ఏంటంటే... ఈ సినిమా హీరో, మనోజ్ అన్న మంచు విష్ణు పేరు ఎక్కడా ప్రస్తావించలేదు. ఈ పాయింట్‌ను నెటిజన్లు వెంటనే గమనించి సోషల్ మీడియాలో చర్చకు తెరలేపారు. ఇటీవల మంచు ఫ్యామిలీలో వస్తున్న వార్తల నేపథ్యంలో ఇది కావచ్చన్న అభిప్రాయాలు వ్యక్తమవుతున్నాయి. డ్రీమ్ ప్రాజెక్ట్ అని చెప్పుకుంటున్న విష్ణు పేరే లేకపోవడం వెనుక అసలు కారణం ఏంటనేది ఇప్పుడు హాట్ టాపిక్‌గా మారింది.

అయితే మంచు మనోజ్ తన పోస్ట్‌లో లెజెండ్స్ మోహన్‌లాల్, అక్షయ్ కుమార్, ప్రభుదేవా, ప్రభాస్‌ లకు ప్రత్యేకంగా ధన్యవాదాలు తెలిపారు. తానూ పెద్ద తెరపై వాళ్లను చూడాలని, భగవంతుడి ఆశీస్సులతో ఈ ప్రయాణం విజయం సాధించాలని ఆకాంక్షించారు. తనికెళ్ల భరణి కల నిజం కావడం పట్ల హర్షం వ్యక్తం చేశారు. ఈ పోస్టుకు వేలాది లైకులు, షేర్లు వస్తున్నాయి.

కన్నప్ప సినిమాలో విష్ణు టైటిల్ రోల్‌లో నటిస్తుండగా.. ఆయాన్ ముఖర్జీ దర్శకత్వం వహించారు. మోహన్ బాబు, మోహన్‌లాల్, అక్షయ్ కుమార్, కాజల్ అగర్వాల్, శరత్ కుమార్, అర్పిత్ రాంకా, ప్రీతి ముకుందన్ ముఖ్యపాత్రల్లో నటిస్తున్నారు. ఈ సినిమాను 24 ఫ్రేమ్స్ ఫ్యాక్టరీ, అవా ఎంటర్‌టైన్‌మెంట్ సంయుక్తంగా నిర్మించాయి. ఇప్పటికే మంచి బజ్ ఉన్న ఈ చిత్రం థియేటర్లలో ఎంత కలెక్షన్లు రాబడుతుందో చూడాలి.