వేటపాలెంలో క్రాక్ డైరెక్టర్.. నటసింహ వేట కోసమేనా..?

మాస్ డైరెక్టర్ గోపీచంద్ మలినేని ఈ ఏడాది ప్రారంభంలో మాస్ మహారాజా రవితేజతో ''క్రాక్'' సినిమా తీసి బ్లాక్ బస్టర్ హిట్ అందుకున్నాడు. ఆంధ్రప్రదేశ్ లోని ఒంగోలు - గుంటూరు ప్రాంతాల్లోని రియల్ క్యారక్టర్స్ తీసుకుని ఈ కాప్ డ్రామాని తెరకెక్కించాడు గోపీచంద్. ఈ సినిమా ఎక్కువ భాగం తన స్వస్థలమైన ప్రకాశం జిల్లాలోని వేటపాలెం - ఒంగోలు - చీరాల - చీమకుర్తి వంటి ప్రాంతాల్లో చిత్రీకరించారు. అయితే మలినేని గోపీచంద్ ఇప్పుడు మరోసారి తన సినిమా కోసం వేటపాలెం చేరుకున్నాడు. అక్కడ 100 ఏళ్ల క్రితం నాటి సారస్వత నికేతనం అనే పురాతనమైన లైబ్రరీలో సమయం గడుపుతున్నాడు.

వేటపాలెం లైబ్రరీలో కూర్చొని గోపీచంద్ ఓల్డ్ న్యూస్ పేపర్స్ ని తిరగేస్తున్నాడు. దీనిని బట్టి చూస్తే తదుపరి సినిమా కూడా వాస్తవ సంఘటన ఆధారంగా ఉండబోతోందని అర్థం అవుతోంది. 'క్రాక్' డైరెక్టర్ నెక్స్ట్ మూవీ నటసింహం నందమూరి బాలకృష్ణ తో చేయనున్నాడనే విషయం తెలిసిందే. మైత్రీ మూవీ మేకర్స్ బ్యానర్ పై నవీన్ ఎర్నేని - వై.రవిశంకర్ కలసి ఈ చిత్రాన్ని నిర్మించనున్నారు. దీనికి సంబంధించిన అధికారిక ప్రకటన కూడా వచ్చేసింది. ప్రస్తుతం స్క్రిప్ట్ వర్క్స్ - ప్రీ ప్రొడక్షన్ పనులు చేస్తున్న గోపీచంద్ మలినేని.. బాలయ్య కోసం ఓ పవర్ ఫుల్ స్టోరీని రెడీ చేస్తున్నట్లు తెలుస్తోంది. దీని కోసమే వేటపాలెం లైబ్రరీలో పాత వార్తాపత్రికలను తిరగేస్తున్నాడని తెలుస్తోంది. కాగా, ప్రస్తుతం బోయపాటి శ్రీను దర్శకత్వంలో బాలయ్య చేస్తున్న హ్యాట్రిక్ మూవీ ''అఖండ'' షూటింగ్ పూర్తయిన వెంటనే గోపీచంద్ సినిమా స్టార్ట్ చేస్తాడని సమాచారం.