దిగ్గజాల సమ్మేళనం: 1986 నాటి అన్న‌గారు ఎన్టీఆర్ విందులో చిరంజీవి!
| 1986లో అప్పటి ముఖ్యమంత్రి ఎన్టీఆర్ తన నివాసంలో సినీ ప్రముఖులకు ఇచ్చిన అల్పాహార విందుకు సంబంధించిన అరుదైన వీడియో ఇప్పుడు వైరల్ అవుతోంది. విజయశాంతి, కృష్ణంరాజు, రావు గోపాలరావు, చిరంజీవి, భానుప్రియ, కె. రాఘవేంద్రరావు తదితర దిగ్గజాలు ఒకే చోట కనిపించడం విశేషం. చిరంజీవికి ఎన్టీఆర్ లేచి స్వాగతం పలికిన దృశ్యం ప్రత్యేక ఆకర్షణగా నిలిచింది. అప్పటి సినీ ప్రముఖుల ఆత్మీయతను ఈ వీడియో మరోసారి గుర్తుచేస్తోంది.
తెలుగు సినీ చరిత్రలోనూ, రాజకీయ రంగంలోను స్వర్ణయుగానికి చిహ్నంగా నిలిచే అరుదైన ఘట్టాల్లో 1986లో నాటి ఆంధ్రప్రదేశ్ ముఖ్యమంత్రి నందమూరి తారకరామారావు (ఎన్టీఆర్) తన నివాసంలో సినీ దిగ్గజాలకు ఇచ్చిన అల్పాహార విందు ఒకటి. అప్పటికే నటుడిగా తెలుగువారి గుండెల్లో చెరగని ముద్రవేసి.. రాజకీయాల్లోకి వచ్చి ప్రభంజనం సృష్టించిన ఎన్టీఆర్.. పరిశ్రమలోని ప్రముఖులతో ఎంతో ఆప్యాయంగా గడిపిన దృశ్యాలు నేటికీ నెటిజన్లలో విపరీతమైన ఆసక్తిని రేకెత్తిస్తున్నాయి. సాంకేతికత అందుబాటులో లేని రోజుల్లో చిత్రీకరించిన ఒక అరుదైన వీడియో.. నాటి తరం వైభవాన్ని కళ్ళకు కడుతూ నెట్టింట వైరల్ అవుతోంది.
ఈ అల్పాహార విందులో నాటి టాలీవుడ్ ప్రముఖులంతా ఒకే వేదికపై కొలువుదీరడం అతిపెద్ద విశేషం. అన్న‌గారు ఎన్టీఆర్ పక్కనే హుందాగా కూర్చున్న `లేడీ సూపర్ స్టార్` విజయశాంతి తమదైన శైలిలో నవ్వులు పూయించిన రెబల్ స్టార్ కృష్ణంరాజు.. ప్రతి విలక్షణ పాత్రతో అలరించిన రావు గోపాలరావు, భానుప్రియ, దర్శకేంద్రుడు కె. రాఘవేంద్రరావు, భానుచందర్ వంటి దిగ్గజాలు నాటి ఆత్మీయ వాతావరణానికి ప్రతీకగా నిలిచారు. అలాగే ఈ భేటీకి చివర్లో మెగాస్టార్ చిరంజీవి రావడం.. ఆయనకు ఎన్టీఆర్ లేచి స్వాగతం పలకడం వంటి దృశ్యాలు నటుల మధ్య ఉన్న గౌరవ మర్యాదలను ప్రతిబింబిస్తాయి.
అప్పటి దృశ్యంలో నాటి కాలపు నిరాడంబరతను, ప్రస్తుత ఆర్భాటాలతో పోలుస్తూ ప్ర‌జ‌లు తమ అభిప్రాయాలను షేర్ చేస్తుంటారు. ఎలాంటి హంగులు, అహంభావాలు లేకుండా నటీనటులందరూ ఒకే కుటుంబ సభ్యుల్లా కలసిమెలిసి ముచ్చటించుకోవడం నాటి సినీ వాతావరణంలో ఉన్న గొప్పదనానికి నిదర్శనమని నెటిజ‌నులు పేర్కొంటున్నారు. ముఖ్యంగా రావు గోపాలరావు వ్యక్తిగత సంభాషణలు.. కృష్ణంరాజు చిరునవ్వు.. పట్టుచీరలో విజయశాంతి గాంభీర్యం నాటి అభిమానులను మళ్ళీ గతం వైపు తీసుకెళ‌తాయి.
ఈ అరుదైన కలయిక కేవలం ఒక సరదా అల్పాహార విందు మాత్రమే కాదు.. తెలుగు సినీ పరిశ్రమ.. రాజకీయ రంగాల మధ్య ఉన్న సత్సంబంధాలకు కూడా అద్దం పట్టింది. ముఖ్యమంత్రిగా ఎంతో బాధ్యతాయుతమైన పదవిలో ఉన్నా.. తనను అభిమానించే, తనతో కలసి పనిచేసిన తోటి కళాకారుల విషయంలో ఎన్టీఆర్ చూపించిన ప్రేమానురాగాలు నాటి పరిపాలనా శైలిలోని విన‌మ్ర‌త‌ను సూచిస్తాయి. సినీ పరిశ్రమకు చెందిన ప్రతి సమస్యను, విశేషాన్ని ఎంతో శ్రద్ధగా వినే అన్నగారి వైఖరి నాడు అందరినీ ఆకట్టుకునేది.
కాలక్రమేణా ఎంతమంది నటులు వచ్చినా.. ఎన్నో మార్పులు చోటుచేసుకున్నా... ఇలాంటి దృశ్యాలు భవిష్యత్తు తరాలకు తీపి గురుతులుగా మిగిలిపోతాయి. `తెలుగు వారి ఆత్మగౌరవం`గా నిలిచిన ఎన్టీఆర్ నాయకత్వం.. నాటి నటుల మధ్య ఉన్న స్వచ్ఛమైన స్నేహబంధం ఈ రేర్ వీడియో ద్వారా మరోసారి పునరావృతమయ్యాయి. కళ, సంస్కృతి, అనుబంధాలకు ప్రాణమిచ్చే ప్రతీ తెలుగువాడి హృదయంలో ఈ 1986 నాటి సువర్ణ ఘట్టం ఎప్పటికీ పదిలంగానే ఉంటుంది.