ఇదేమి కన్ఫ్యూజన్ నాని.. అది ఇది కాదు.. అదే ఇది..!
| నేచురల్ స్టార్ నాని సినిమాల బాక్సాఫీస్ పరిస్థితి ఇప్పుడు అయోమయంగా మారింది. శ్యామ్ సింగరాయ్, అంటే సుందరానికి, హాయ్ నాన్న సినిమాలు ప్రశంసలు అందుకున్నా భారీ వసూళ్లు సాధించలేకపోయాయి. దసరా మంచి విజయాన్ని అందించగా, సరిపోదా శనివారం, ది ప్యారడైజ్ కలెక్షన్ల పరంగా పర్వాలేదనిపించాయి. విమర్శకుల ప్రశంసలతో పాటు భారీ వసూళ్లు తెచ్చే ఒక్క బ్లాక్‌బస్టర్ నానికి అవసరమనే చర్చ జరుగుతోంది.
టాలీవుడ్‌లో నేచురల్ స్టార్ నాని అంటే ప్రేక్షకుల్లో ప్రత్యేకమైన అభిమానం ఉంది. సహజమైన నటన, సింపుల్‌గా ఉండే వ్యక్తిత్వం, ఫ్యామిలీ ఆడియన్స్‌కు దగ్గరయ్యే సినిమాలతో నాని తనకంటూ ఒక ప్రత్యేక గుర్తింపు తెచ్చుకున్నారు. అయితే ఆయన సినిమాల బాక్సాఫీస్ పరిస్థితి మాత్రం ఇప్పుడు కొంత అయోమయంగా మారింది. సినిమాలు బాగున్నా కలెక్షన్లు రావడం లేదు. కలెక్షన్లు వచ్చినా సినిమాలకు ఆశించిన స్థాయిలో పేరు రావడం లేదు.
శ్యామ్ సింగరాయ్ నుంచి చూస్తే నాని సినిమాల పరిస్థితి ఇదే విధంగా కనిపిస్తోంది. ఈ సినిమా కథ, నటన, భావోద్వేగ సన్నివేశాలతో ప్రేక్షకుల ప్రశంసలు అందుకుంది. కానీ బాక్సాఫీస్ దగ్గర మాత్రం ఆశించిన స్థాయిలో వసూళ్లు రాలేదు.
ఇక అంటే సుందరానికి సినిమా గురించి ప్రత్యేకంగా చెప్పుకోవాలి. విడుదల సమయంలో ఈ సినిమాకు మంచి టాక్ వచ్చినా కలెక్షన్లు మాత్రం నిరాశపరిచాయి. ఆ తర్వాత ఓటీటీలో మంచి ఆదరణ దక్కించుకుంది. చాలామంది ఈ సినిమాను కల్ట్ క్లాసిక్‌గా కూడా భావిస్తున్నారు. కానీ థియేటర్లలో మాత్రం నిర్మాతలు, బయ్యర్లకు ఆశించిన ఫలితం దక్కలేదు.
హాయ్ నాన్న కూడా మంచి ప్రశంసలు అందుకున్న సినిమా. తండ్రి, కూతురు మధ్య అనుబంధాన్ని చూపించిన ఈ చిత్రం ఫ్యామిలీ ఆడియన్స్‌కు బాగా కనెక్ట్ అయింది. అయినప్పటికీ భారీ బ్లాక్‌బస్టర్‌గా నిలవలేకపోయింది.
మరోవైపు దసరా సినిమా నానికి మంచి విజయాన్ని అందించింది. తెలంగాణ నేపథ్యం, మాస్ పాత్ర, కథలోని తీవ్రత ప్రేక్షకులను ఆకట్టుకున్నాయి. అయితే ఈ సినిమాపై కూడా కొన్ని వర్గాల నుంచి విమర్శలు వచ్చాయి. సరిపోదా శనివారం మిక్స్‌డ్ టాక్ వచ్చినప్పటికీ మంచి వసూళ్లు సాధించింది.
ఇక ది ప్యారడైజ్ సినిమాకి నెగిటివ్ టాక్ వచ్చినప్పటికీ కలెక్షన్ల విషయంలో పర్వాలేదు అనిపించుకుంది. ఇలా నాని సినిమాల విషయంలో ఏది హిట్, ఏది ఫ్లాప్, ఏ సినిమా బయ్యర్లకు లాభాలు తెచ్చింది అనే అంశాలు కన్ఫ్యూజన్‌గా మారుతున్నాయి. మంచి సినిమాలు తీస్తున్నా ప్రతిసారీ భారీ లాభాలు రావడం లేదు. అలా అని ఏ సినిమా కూడా డిజాస్టర్ అవ్వడం లేదు.
నాని క్రేజ్‌పై ఎలాంటి సందేహం లేదు. కానీ ఆయనకు ఇప్పుడు కావాల్సింది విమర్శకుల ప్రశంసలతో పాటు బాక్సాఫీస్ దగ్గర కూడా భారీ విజయాన్ని అందించే సినిమా. కలెక్షన్లు తెచ్చుకొని.. పేరు తెచ్చుకోకుండా.. లేకపోతే పేరు తెచ్చుకొని కలెక్షన్లు తెచ్చుకోకుండా.. ఇలాంటి అయోమయంలో ఉండే సినిమాలు కాకుండా.. ఏదైనా ఒక్క బ్లాక్ బస్టర్ సినిమా తీస్తే ఇక నాని లెవెల్ వేరే.