పెద్ద సినిమాలకు మాత్రమే ఎందుకీ నిర్లక్ష్యం..!

సినిమా చిన్నదైనా, పెద్దదైనా ప్రేక్షకులను మెప్పించాలంటే ముందుగా సరైన ప్రణాళిక ఉండాలి. కథ నుంచి షూటింగ్ వరకు ప్రతి విషయం పక్కాగా సిద్ధం చేసుకోవాలి. కానీ ప్రస్తుతం కొన్ని భారీ బడ్జెట్ సినిమాల విషయంలో కనిపిస్తున్న నిర్లక్ష్యం ఆశ్చర్యం కలిగిస్తోంది. అదే సమయంలో చిన్న సినిమాలు, మీడియం బడ్జెట్ సినిమాలు మాత్రం ఎంతో జాగ్రత్తగా తెరకెక్కుతున్నాయి.

దీనికి తాజాగా తరుణ్ భాస్కర్ తెరకెక్కిస్తున్న ENE Repeat సినిమా మంచి ఉదాహరణగా నిలుస్తోంది. ఈ సినిమా షూటింగ్ కోసం తరుణ్ భాస్కర్ చేసిన ప్రిపరేషన్ చూసి అందరూ ఆశ్చర్యపోతున్నారంట. షూటింగ్‌కు వెళ్లే ముందే ప్రతి సన్నివేశం ఎలా తీయాలి అనే విషయంపై పూర్తి స్థాయిలో ప్లాన్ చేసుకున్నారు. దీనికోసం ఒక ప్రత్యేకమైన పుస్తకాన్ని సిద్ధం చేశారు. అందులో ప్రతి సీన్ ఎలా షూట్ చేయాలి, ఏ నటీనటులు పాల్గొంటారు, కెమెరా యాంగిల్స్ ఎలా ఉండాలి, ఏ లెన్స్ ఉపయోగించాలి అనే వివరాలను పొందుపరిచారు.

తరుణ్ భాస్కర్ చేసిన ఈ ప్రయత్నాన్ని చూసి చాలామంది ఆయన సిద్ధం చేసిన పుస్తకాలను.. ఒకచోట చేర్చి ఫిల్మ్ మేకింగ్ గైడ్‌గా ప్రచురిస్తే బాగుంటుందని కొంతమంది అభిప్రాయపడుతున్నారు.

ముఖ్యంగా భారీ బడ్జెట్ సినిమాలు చేసే దర్శకులు కూడా ఇలాంటి ప్రణాళికను పాటించాలి. పెద్ద సినిమాలకు ఎక్కువ సమయం, డబ్బు ఖర్చవుతున్నప్పుడు మరింత జాగ్రత్త అవసరం. కథలో లోపాలు ఉన్నా, షూటింగ్‌లో ప్రణాళిక లేకపోయినా చివరకు నిర్మాతలకు భారీ నష్టాలు వచ్చే అవకాశం ఉంటుంది.

సినిమా బడ్జెట్ ఎంత పెద్దదైనా, చిన్నదైనా ప్రేక్షకులకు మంచి సినిమా అందించడమే అసలు లక్ష్యం. చిన్న సినిమాలు ఇంత జాగ్రత్తగా తెరకెక్కుతున్నప్పుడు పెద్ద సినిమాల విషయంలో నిర్లక్ష్యం ఎందుకు అనేది చాలామందికి ఉన్న ప్రశ్న. ఎంతో పెద్ద బడ్జెట్ తో వస్తున్న సినిమాలో కూడా ఇప్పటికీ.. సగం సినిమా పూర్తయిన తర్వాత అయోమయంలో పడుతూ మళ్లీ రీ షూట్ లు కూడా చేసుకుంటూ ఉన్నారు. అదే నిర్లక్ష్యం లేకుండా మొత్తం ముందుగా ప్రిపేర్ చేసి పెట్టుకుంటే.. పెద్ద సినిమాల నిర్మాతలకి కూడా చాలా మేలు చేసిన వాళ్లు అవుతారు.