హైదరాబాదీలకు బిగ్ షాక్.. టెస్టు మ్యాచ్ కు ఆ స్టార్ దూరం

రాకరాక హైదరాబాద్ కు టెస్టు క్రికెట్ ఆతిథ్యం అవకాశం దక్కింది. వన్డే ప్రపంచ కప్ లో టీమిండియా మ్యాచ్ ఒక్కటీ లేదు.. టి20ల్లోనూ ఐపీఎల్ మ్యాచ్ లు తప్ప అంతర్జాతీయ మ్యాచ్ ల నిర్వహణ తక్కువే. ఎప్పుడో ఐదేళ్ల కిందట హైదరాబాద్ లో ఓ టెస్టు మ్యాచ్ జరిగినట్లు గుర్తు. అది కూడా వెస్టిండీస్ తో. అలాంటి సమయంలో ఏకంగా ఇంగ్లండ్ వంటి దూకుడైన జట్టుతో టెస్టు మ్యాచ్ నిర్వహణ భాగ్యం దక్కింది. ఇంకేం..? హైదరాబాదీలతో పాటు తెలుగు వారంతా ఆనందంతో ఉన్నారు. ఉప్పల్ మైదానంలో మ్యాచ్ ఎప్పుడు మొదలవుతుందా? అని ఆసక్తిగా ఎదురుచూస్తున్నారు. కానీ, వారికి ఊహించని విధంగా నిరాశపరిచే వార్త ఒకటి బయటకు వచ్చింది. టెస్టు మ్యాచ్ లకు అత్యంత ప్రాధాన్యం ఇచ్చే స్టార్ క్రికెటర్ తొలి రెండు టెస్టులకు దూరంగా ఉండాలని నిర్ణయించుకున్నాడు.

వ్యక్తిగత కారణాలతో...

ఈ నెల 25 గురువారం నుంచి హైదరాబాద్ ఉప్పల్ లోని రాజీవ్ గాంధీ మైదానంలో టీమిండియా- ఇంగ్లండ్ మధ్యన మొదటి టెస్టు జరగనుంది. దీనికోసం స్కూలు పిల్లలకు ఉచిత ప్రవేశం కల్పిస్తూ హైదరాబాద్ క్రికెట్ అసోసియేషన్ నిర్ణయం తీసుకుంది. మరోవైపు మ్యాచ్ కు టికెట్ల విక్రయాలు కూడా చురుగ్గా సాగుతున్నాయి. ఇక మ్యాచ్ కు తగిన ఏర్పాట్లు కూడా పూర్తయ్యాయి. టీమిండియా ఆదివారం ఉప్పల్ మైదానంలో ప్రాక్టీస్ చేసింది. ఇంగ్లండ్ జట్టు ఆదివారం రాత్రి హైదరాబాద్ చేరుకుంది. ఇలాంటి సమయంలో భారత అభిమానులకు పిడుగులాంటి వార్త. హైదరాబాదీలను పూర్తిగా నిరాశలో ముంచే వార్త ఒకటి వెలుగులోకి వచ్చింది. సిరీస్ లో మొదటి రెండు టెస్టులకు స్టార్ బ్యాటర్ విరాట్ కోహ్లి దూరంగా ఉండాలని నిర్ణయించకున్నాడు. వ్యక్తిగత కారణాలతో అతడు ఈ మ్యాచ్‌ లు ఆడడం లేదు. ఈ విషయాన్నిబీసీసీఐ ట్వీట్ చేసింది. ఇప్పటికే మొదటి రెండు టెస్టులకు జట్టును ప్రకటించారు. స్టార్ పేసర్ షమీ మూడో టెస్టు నుంచి అందుబాటులో ఉండే అవకాశం ఉంది. ఇప్పుడు కోహ్లి కూడా తొలి రెండు టెస్టులు ఆడకూడదని నిర్ణయించిన నేపథ్యంలో వీరద్దరూ హైదరాబాద్ మ్యాచ్ దూరమైనట్లే.

ఏమిటా కారణం..?

టీమిండియాకు అత్యంత అవసరమైన సందర్భంలో కోహ్లి రెండు టెస్టులకు దూరంగా ఉండాలని నిర్ణయించుకోవడం కాస్త సంచలనమే. అయితే, అఫ్ఘాన్ తో టి20 సిరీస్ కు కూడా కోహ్లి ఇలాంటి నిర్ణయమే తీసుకున్నాడు. తొలి టి20లో అతడు ఆడలేదు. ఇప్పుడు మరోసారి అలానే చేయడంతో చర్చనీయాంశం అవుతోంది. కాగా.. ఈసారీ వ్యక్తిగత కారణాలను చూపుతుండడంతో కోహ్లి కుటుంబంలో ఏదైనా కార్యక్రమం ఉందా? లేక ఎవరికైనా ఆరోగ్య సమస్యలు ఎదురవుతున్నాయా? అనేది తెలియాల్సి ఉంది. కోహ్లి అతడి భార్య అనుష్క శర్మలకు ఇప్పటికే ఓ అమ్మాయి పుట్టింది. అనుష్క మరోసారి గర్భం దాల్చినట్లుగా గతంలో కథనాలు వచ్చాయి. అవేవీ నిర్ధారణ కాలేదు. మరి ఇంకే కారణంతో కోహ్లి 2 టెస్టులకు దూరమయ్యాడో అతడు చెబితేనే కానీ తెలియదు. కాగా కోహ్లి స్థానంలో మరో ఆటగాడిని సెలక్షన్‌ కమిటీ ఎంపిక చేయనుంది.

కొసమెరుపు:

5 మ్యాచ్ ల సిరీస్ లో భాగంగా ఇంగ్లాండ్‌ తో మొదటి టెస్టు 25 నుంచి హైదరాబాద్‌ ఉప్పల్‌ మైదానంలో జరగనుంది. దీంట్లో కోహ్లి ఆడడం లేదు. రెండో టెస్టులోనూ పాల్గొనడు. అయితే, ఆ రెండో టెస్టు ఎక్కడని అనకుకుంటున్నారు. తెలుగు రాష్ట్రాల్లో రెండో అతిపెద్ద నగరమైన విశాఖ పట్నంలో. ఫిబ్రవరి 2 నుంచి విశాఖలో రెండో టెస్టు జరగనుంది.