ప్రజల్లోకి దళపతి విజయ్... ఎలా, ఎప్పుడు ప్లాన్ చేశారంటే..?

తమిళ సూపర్ స్టార్, టీవీకే అధికేత విజయ్... క్రియాశీల రాజకీయాల్లోకి అడుగుపెట్టి, దూకుడు ప్రదర్శిస్తోన్న సంగతి తెలిసిందే. వచ్చే ఏడాది జరగబోయే తమిళనాడు అసెంబ్లీ ఎన్నికల్లో విజయమే లక్ష్యంగా ముందుకు వెళ్లాలని ఆయన కేడర్ కు పిలుపునిస్తున్నారు. ఈ సమయంలో విజయ్ ప్రజల చెంతకు వెళ్లాలని నిర్ణయం తీసుకున్నట్లు పార్టీ వర్గాల నుంచి సమాచారం అందుతోంది!

అవును... వచ్చే ఏడాది అసెంబ్లీ ఎన్నికలు జరగనున్న నేపథ్యంలో తమిళనాడు రాజకీయాలు ఆసక్తిగా మారుతున్నాయి. ఈ క్రమంలో తమిళనాడు రాజకీయాలను త్రిముఖ పోటీగా మార్చిన తమిళగ వెట్రి కళగం అధినేత విజయ్.. ప్రజల్లోకి వెళ్లాలని నిర్ణయం తీసుకున్నట్లు తెలుస్తోంది. దీనికోసం మొత్తం 42 రోజులు పక్కాగా ప్లాన్ చేస్తున్నట్లు చెబుతున్నారు.

ఇక ఆ యాత్ర నుంచి మొదలు వివిధ కార్యక్రమాలను నిర్వహించనున్నారని తెలుస్తోంది. ఈ సమయంలో చివరి సినిమా షూటింగ్ షెడ్యూల్ ను మేనేజ్ చేసుకుంటూ ప్రజల్లోకి వెళ్ళనున్నారని అంటున్నారు. ఈ సందర్భంగా ఈ 42 రోజులు పాటు సాగేలా ప్లాన్ చేస్తున్న ఈ యాత్రను జూన్ రెండో వారంలో లేదా ఆగస్టు మొదటి వారంలో ప్రారంభించాలను ఆలోచన చేస్తున్నారని అంటున్నారు.

అయితే... జూన్ రెండోవారం నుంచి వర్షాలు ప్రారంభమయ్యే అవకాశం ఉన్న నేపథ్యంలోనే ఆగస్టు అయితేనే బెటర్ అనే అభిప్రాయాలు వినిపిస్తున్నాయని అంటున్నారు. ఇక ఈ ప్రయాణాన్ని తిరుచ్చి లేదా మదురై నుంచి ప్రారంభించే అంశాన్ని పరిశీలిస్తున్నారని తెలుస్తోంది. దీనికోసం ఓ ప్రత్యేక ప్రచార రథాన్ని కూడా సిద్ధం చేస్తున్నారు!

'జననాయగన్' టీమ్ విందులో ఎమోషనల్!:

మరోవైపు.. విజయ్ 69వ చిత్రానికి "జననాయగన్" అనే టైటిల్ ఖరారు చేసిన సంగతి తెలిసిందే. ఈ సందర్భంగా... ఇదే తన చివరి సినిమా అని విజయ్ స్వయంగా ప్రకటించారు. తాజాగా ఈ సినిమా టీమ్ కు విందును ఏర్పాటు చేశారు. ఆ విందులో విజయ్ ఎమోషనల్ అయినట్లు తెలుస్తోంది. ఈ సినిమా తన నట జీవితంలో చివరిది అని చెబుతూ.. ఈ సందర్భంగా సినీ పరిశ్రమలోని సహచరులతో కలిసి గడిపిన క్షణాలు తలచుకుంటూ ఎమోషనల్ అయ్యారని అంటున్నారు.