అమ్మాయిలు తక్కువ అయ్యారు ఇలా అయితే ఎలా మరి ?

తెలంగాణ రాష్ట్రానికి నిజంగా ఇదో షాకింగ్ న్యూస్ అనే చెప్పాలి. రాష్ట్రంలో బాలికల జనాభా చాలా ఆందోళనకరంగా తగ్గిపోతుంది. అబ్బాయిలతో పోలిస్తే అమ్మాయిల సంఖ్య గణనీయంగా పడిపోవడం భవిష్యత్తుపై ఆందోళనలు మొదలయ్యాయి. 2022 లెక్కల ప్రకారం పుట్టిన ప్రతి వెయ్యి మంది అబ్బాయిలకు కేవలం 907 మంది అమ్మాయిలు మాత్రమే ఉన్నారు. గత ఆరేళ్లలో ఇదే అత్యంత తక్కువ నిష్పత్తి. ఈ విషయంలో తెలంగాణ దేశంలో కింద నుంచి మూడో స్థానంలో ఉంది. బీహార్ (891), మహారాష్ట్ర (906)లు మాత్రమే తెలంగాణ కంటే దారుణంగా ఉన్నాయి. కేంద్ర జనగణన శాఖ విడుదల చేసిన 2022 జనన, మరణాల నివేదికలో ఈ వివరాలు స్పష్టమయ్యాయి. ఈ పరిస్థితి ఇలాగే కొనసాగితే సమాజంపై చాలా తీవ్రమైన దుష్ప్రభావాలు ( పడతాయి. ఇది కేవలం ఒక నివేదిక కాదు తెలంగాణ రాష్ట్ర భవిష్యత్తుకు ప్రమాద ఘంటిక!

2022లో దేశమంతా చూస్తే ప్రతి వెయ్యి మంది అబ్బాయిలకు సుమారు 910 మంది అమ్మాయిలు పుట్టారు. కానీ తెలంగాణలో ఈ సగటు (907) కంటే తక్కువ ఉండడం తీవ్ర ఆందోళన కలిగిస్తోంది. దేశంలో కేవలం నాగాలాండ్ (1,068), అరుణాచల్ ప్రదేశ్ (1,036), లడఖ్ (1,027) వంటి మూడు రాష్ట్రాలు/కేంద్రపాలిత ప్రాంతాల్లో మాత్రమే అబ్బాయిల కంటే అమ్మాయిలు ఎక్కువగా పుట్టారు. మిగతా చోట్ల పరిస్థితి బాగోలేదని, ముఖ్యంగా తెలంగాణలో మరీ దారుణంగా ఉందని అర్థం చేసుకోవాలి.

తెలంగాణలో మరణాలు, జననాల తీరు

2022లో దేశవ్యాప్తంగా మరణాలు తగ్గినప్పటికీ, తెలంగాణలో మాత్రం పెరిగాయి. నమోదైన మరణాల్లో 59.8శాతం పట్టణ ప్రాంతాల్లో, 40.2శాతం గ్రామీణ ప్రాంతాల్లో జరిగాయి. మరణించిన వారిలో మగవారు (1.44 లక్షలు) ఆడవారి (లక్ష) కంటే ఎక్కువ. జననాల విషయానికి వస్తే దేశవ్యాప్తంగా పెరిగినప్పటికీ, తెలంగాణలో నమోదైన మొత్తం జననాల్లో 71.9 శాతం పట్టణ ప్రాంతాల్లో ఉండగా, కేవలం 28.1 శాతం మాత్రమే గ్రామీణ ప్రాంతాల్లో నమోదయ్యాయి. తెలంగాణలో 3.68 లక్షల మంది అబ్బాయిలు, 3.34 లక్షల మంది అమ్మాయిలు జన్మించారు.

ఈ గణాంకాలు కేవలం సంఖ్యలు మాత్రమే కాదు. ఇవి ఒక రాష్ట్ర భవిష్యత్ కు ప్రమాద ఘంటికలు అని చెప్పవచ్చు. ఆడపిల్లల జననాల సంఖ్య తగ్గకుండా చూడటానికి ప్రభుత్వం, ప్రజలు అందరూ కలిసికట్టుగా తీవ్రంగా కృషి చేయాలి. "ఆడపిల్ల పుడితే భారం కాదు, అదొక అదృష్టం" అనే భావనను ప్రజల్లో కలిగించాలి. గర్భంలోనే లింగ నిర్ధారణ చేసి ఆడపిల్లలను లేకుండా చేసే ఘటనలను కఠినంగా అరికట్టాలి. లేకపోతే, భవిష్యత్తులో సమాజం ఊహించని పెద్ద సామాజిక సమస్యలను ఎదుర్కోవాల్సి వస్తుంది

అమ్మాయిల సంఖ్య తగ్గితే సమాజానికి వచ్చే నష్టాలు

ఆడపిల్లల సంఖ్య ఇలా పడిపోవడం వల్ల సమాజంపై చాలా రకాలుగా చెడు ప్రభావం పడుతుంది. ఇది కేవలం లింగ నిష్పత్తి సమస్య కాదు, సమాజం మొత్తాన్ని అతలాకుతలం చేసే ప్రమాదంగా భావించాలి.

పెళ్లిళ్ల సమస్యలు: భవిష్యత్తులో చాలా మంది అబ్బాయిలకు పెళ్లి చేసుకోవడానికి తగిన సంఖ్యలో అమ్మాయిలు దొరకరు. ఇది సమాజంలో పెద్ద వివాదాలు, కుల/మత ఘర్షణలకు దారితీయవచ్చు.

నేరాలు పెరుగుతాయి: అమ్మాయిల సంఖ్య తక్కువగా ఉండడం వల్ల వారి మీద లైంగిక దాడులు, కిడ్నాప్‌లు, అక్రమ రవాణా వంటి నేరాలు విపరీతంగా పెరగొచ్చు. అమ్మాయిల భద్రతకు తీవ్ర భంగం కలుగుతుంది

సామాజిక అసమతౌల్యం : అబ్బాయిలు ఎక్కువగా, అమ్మాయిలు తక్కువగా ఉండడం వల్ల సమాజం ఒక రకమైన బ్యాలెన్స్ కోల్పోతుంది. ఇది కుటుంబ బంధాలను, సామాజిక శాంతిని దెబ్బతీస్తుంది.

ప్రమాదంలో ముందు తరాల భవిష్యత్ : ఆడపిల్లలు లేకపోతే కుటుంబాలు ముందుకు సాగవు. వంశాలు నశించిపోతాయి. తరాలు అంతరించిపోయే ప్రమాదం ఉంటుంది.

తగ్గనున్న మహిళల ప్రాధాన్యత : అమ్మాయిల సంఖ్య తగ్గడం వల్ల సమాజంలో మహిళలకు ఉన్న గౌరవం, ప్రాధాన్యత మరింత దిగజారిపోయే అవకాశం ఉంది.