భారత్‌ లో పేదరికంపై "నీతి ఆయోగ్‌" ఆసక్తికర వ్యాఖ్యలు!

భారతదేశంలో అతిప్రధాన సమస్యల్లో ఒకటి పేదరికం! వాస్తవానికి ఒకప్పుడు భారతదేశానికి ఉన్న ప్రధాన సమస్యల్లో జనాభా ప్రధానంగా ఉండేది! అయితే... ఇప్పుడు స్వాతంత్రం వచ్చి ఇంతకాలం అయినా పేదరికం మాత్రం రూపుమాపలేకపోతున్నారు! అయితే ఈ విషయంపై తాజాగా నీతీ ఆయోగ్ ఆసక్తికర వ్యాఖ్యలు చేసింది. ఇందులో భాగంగా... భారతదేశంలో పేదరికం స్థాయి 5శాతం దిగువకు పడిపోయిందని వెల్లడించింది.

అవును... భారతదేశంలో పేదరికం స్థాయి 5 శాతానికి దిగువకు పడిపోయిందని.. గ్రామీణ, పట్టణ ప్రాంతాల్లో ప్రజల ఆదాయం పెరిగిందని.. 2022-23 సమయలో చేపట్టిన గృహ వినియోగ వ్యయ సర్వే (హెచ్.సీ.ఈ.ఎస్) ను ఉంటంకిస్తూ నీతి ఆయోగ్ సీఈఓ బీవీఆర్ సుబ్రహ్మణం వెల్లడించారు. ఈ సర్వేలో జనాభాను 20 రకాలుగా వర్గీకరించినట్లు తెలిపారు. ఈ సందర్భంగా పెరిగిన నెలవారీ సగటు ఖర్చు వివరాలు వెల్లడించారు.

ఇందులో భాగంగా... పట్టణాలు, గ్రామాల్లో ప్రజల ఆదాయం పెరిగిందని నీతి ఆయోగ్ చేపట్టిన సర్వే ఫలితాలు చెబుతున్నాయి. ఇందులో భాగంగా... 2011-12 తో పోలిస్తే గ్రామాల్లో నెలవారీ ఖర్చులు సుమారు 40.42శాతం పెరిగి ఆ మొత్తం 2,008 రూపాయలు కాగా... పట్టణ ప్రాంతంలో నెలవారీ యావరేజ్ ఖర్చు 33.5 శాతం పెరిగి 3,510 రూపాయలుగా పెరిగిందని స్పష్టం చేసింది.

ఇదే సమయంలో తాజా సర్వే డేటా ప్రకారం... దేశంలో పేదరికం 5 శాతం లేదా అంతకంటే కూడా తగ్గే అవకాశం ఉందని సుబ్రహ్మణ్యం తెలిపారు. ప్రజలు ఆహారంపై పెడుతున్న ఖర్చు విధానాల్లో కూడా మార్పులను ఈ సర్వే గుర్తించిందని వెల్లడించారు. ఇందులో భాగంగా ప్రధానంగా గ్రామీణ ప్రాంతాల్లోని కుటుంబాలు మొత్తం వ్యయంలో సుమారు 50శాతం కంటే తక్కువగా ఆహారం కోసం కేటాయించినట్లు సర్వేలో తేలిందని తెలిపారు.

ఇదే క్రమంలో... 2004 - 05 మధ్యకాలంలో గ్రామిణ ప్రాంతాల్లోని ప్రజలు, పట్టణ ప్రాంతాల్లోని ప్రజలు చేసే ఖర్చుల్లో వ్యత్యాసం ఏకంగ 91శాతం గా ఉండేదని చెప్పిన ఆయన... ఇప్పుడు ఆ వ్యత్యాసం 71శాతానికి తగ్గిపోయిందని సర్వే వెల్లడించిందని తెలిపారు. కచ్చితంగా ఇది మారుతున్న అసమానతల తగ్గుదలను సూచిస్తుందని సర్వే తెలిపింది.

ఈ క్రమంలో... కేంద్రప్రభుత్వం ప్రవేశపెట్టిన పథకాలైన ఆయుష్మాన్ భారత్, ఉచిత విద్య వంటి ప్రయోజనాలను సర్వేలో చేర్చలేదని చెప్పిన సుబ్రహ్మణ్యం... ఈ నివేదిక తెలిపిన వివరాల మేరకు భారత్‌ లో పేదరికం దాదాపు అదృశ్యమైందని చెప్పడం గమనార్హం!