ఎన్టీఆర్ పాటకు ఫిదా అయిన ప్రపంచ సుందరీమణులు..'దేవర' డ్యాన్స్ హైలైట్

హైదరాబాద్‌లో ప్రస్తుతం ప్రపంచ సుందరీమణుల సందడి నెలకొంది. కాంగ్రెస్ ప్రభుత్వం ప్రతిష్టాత్మకంగా నిర్వహిస్తున్న మిస్ వరల్డ్ పోటీల్లో పలు దేశాల నుంచి వచ్చిన అందగత్తెలు పాల్గొంటున్నారు. గత కొన్ని రోజులుగా జరుగుతున్న ఈ పోటీల్లో వీరు ఎంతో ఉత్సాహంగా పాల్గొంటున్నారు. ఈ కార్యక్రమానికి తెలంగాణ ముఖ్యమంత్రి రేవంత్ రెడ్డి, పలువురు కాంగ్రెస్ మంత్రులు హాజరవుతున్నారు. ఈ అందగత్తెలను హైదరాబాద్‌లోని వివిధ ప్రాంతాలకు తీసుకెళ్లి, అక్కడి విశేషాలను చూపిస్తున్నారు.

ఈ క్రమంలోనే గచ్చిబౌలి ఇండోర్ స్టేడియంలో స్పోర్ట్స్ ఫైనల్ ఈవెంట్‌ను నిర్వహించారు. ఈ కార్యక్రమంలో మిస్ వరల్డ్ కంటెస్టెంట్లు ఉత్సాహంగా పాల్గొన్నారు. ముఖ్యంగా యంగ్ టైగర్ ఎన్టీఆర్ నటించిన 'దేవర' సినిమాలోని ఓ మాస్ పాటకు వీరు అదిరిపోయే స్టెప్పులేశారు. అంతేకాదు, తెలంగాణలోని కొన్ని ట్రెండింగ్ డీజే పాటలకు కూడా ఈ సుందరీమణులు డ్యాన్స్ చేసి అలరించారు.

'దేవర' పాటకు వీరు డ్యాన్స్ చేసిన వీడియోలు సోషల్ మీడియాలో తెగ వైరల్ అవుతున్నాయి. స్పోర్ట్స్ ఈవెంట్‌లో తమ శక్తిసామర్థ్యాలను ప్రదర్శించిన ఈ అందగత్తెలు క్వార్టర్ ఫైనల్స్‌కు చేరుకుంటారు. చివరికి ఎవరు విజేతలుగా నిలుస్తారో చూడాలి.

ఇదిలా ఉండగా, ఎన్టీఆర్ ప్రస్తుతం 'వార్ 2' సినిమా షూటింగ్‌లో బిజీగా ఉన్నారు. ఈ సినిమా తర్వాత ఆయన 'దేవర 2' సినిమా షూటింగ్‌లో పాల్గొంటారు. 'దేవర' సినిమా మంచి విజయం సాధించడంతో, దీనికి సీక్వెల్‌గా 'దేవర 2'ను తెరకెక్కిస్తున్నారు. మొదటి భాగం సక్సెస్ సాధించడంతో ఈ సీక్వెల్‌పై భారీ అంచనాలు నెలకొన్నాయి. ఈ సినిమా షూటింగ్ త్వరలోనే ప్రారంభం కానుంది. ఇందులో ఎన్టీఆర్ హీరోగా నటిస్తుండగా బాలీవుడ్ బ్యూటీ జాన్వీ కపూర్ హీరోయిన్‌గా నటిస్తోంది. ఈ సినిమాకు సంబంధించిన మరిన్ని వివరాలు త్వరలోనే వెల్లడి కానున్నాయి.