ఉద్యోగులపై ఈపీఎఫ్ఓ వరాల జల్లు.. ఇదో గొప్ప గుడ్ న్యూస్
ప్రైవేట్ రంగ ఉద్యోగులకు ఆర్థిక భద్రతను అందించే ఎంప్లాయీస్ ప్రావిడెంట్ ఫండ్ ఆర్గనైజేషన్ (ఈపీఎఫ్ఓ) ఇటీవల కీలక మార్పులను ప్రకటించింది.;
ప్రైవేట్ రంగ ఉద్యోగులకు ఆర్థిక భద్రతను అందించే ఎంప్లాయీస్ ప్రావిడెంట్ ఫండ్ ఆర్గనైజేషన్ (ఈపీఎఫ్ఓ) ఇటీవల కీలక మార్పులను ప్రకటించింది. ఈ మార్పులు ముఖ్యంగా తొలిసారిగా ఇల్లు కొనుగోలు చేయాలనుకునే ఉద్యోగులకు శుభవార్తని చెప్పవచ్చు. నూతన మార్గదర్శకాల ప్రకారం, ఇప్పుడు సభ్యులు తమ పీఎఫ్ ఖాతాలో ఉన్న మొత్తం నిధిలో 90% వరకు ఉపసంహరించుకునే అవకాశం పొందారు.
ఇంటి కొనుగోలుకు 3 ఏళ్ల సర్వీసు చాలు
ఈపీఎఫ్ఓ తెచ్చిన ఈ కొత్త నిబంధనతో ఉద్యోగులు తమ ఇంటి కలను సులభతరం చేసుకోవచ్చు. ఈ ప్రయోజనం పొందాలంటే, ఉద్యోగి కనీసం మూడు సంవత్సరాల నిరంతర సేవ పూర్తి చేసి ఉండాలి. ఈ నిధులను ఇల్లు కొనుగోలు చేయడం, కొత్త ఇల్లు నిర్మించుకోవడం లేదా గృహ రుణ ఈఎంఐలు చెల్లించడంలో ఉపయోగించుకోవచ్చు. గతంలో ఈ విధమైన ఉపసంహరణకు కనీసం ఐదు సంవత్సరాల సర్వీసు అవసరం ఉండేది, ఇప్పుడు అది మూడు సంవత్సరాలకు తగ్గించబడింది. అయితే, ఈ అవకాశం ఉద్యోగ జీవితంలో ఒక్కసారి మాత్రమే వినియోగించుకోవచ్చు అని గుర్తుంచుకోవాలి.
-పీఎఫ్ ఖాతాలో నిధులు ఎలా చేరతాయి?
ఈపీఎఫ్లో ప్రతి నెలా ఉద్యోగి తన ప్రాథమిక జీతం, డియర్నెస్ అలవెన్స్ (డీఏ) నుంచి 12% నిధిని జమ చేస్తారు. అదే విధంగా సంస్థ (కంపెనీ) కూడా అదే మొత్తాన్ని ఉద్యోగి పీఎఫ్ ఖాతాలో జమ చేస్తుంది. కంపెనీ జమ చేసే మొత్తంలో 8.33% ఎంప్లాయీస్ పెన్షన్ స్కీమ్ (ఈపీఎస్)కు వెళుతుంది. మిగిలిన 3.67% ఈపీఎఫ్ ఖాతాలోకి చేరుతుంది. ప్రస్తుతం, ఈపీఎఫ్ వడ్డీ రేటు 8.25%గా ఉంది.
-రూ. 5 లక్షల వరకు ఆటో-సెటిల్మెంట్
ఈపీఎఫ్ఓ ప్రకటించిన మరో ముఖ్యమైన మార్పు ఆటో-సెటిల్మెంట్ పరిమితి పెంపు. ఇప్పుడు, రూ. 5 లక్షల వరకు ఉన్న ప్రీపెయిడ్ క్లెయిమ్లను కేవలం 72 గంటల వ్యవధిలోనే ఆటోమేటిక్గా పరిష్కరించనున్నారు. గతంలో ఈ పరిమితి రూ. 1 లక్ష వరకు మాత్రమే ఉండేది. ఈ మార్పుతో సభ్యులకు మరింత వేగవంతమైన, సులభతర సేవలు అందుబాటులోకి వస్తాయి.
-భవిష్యత్తులో ఏటీఎం తరహా ఉపసంహరణలు
ఈపీఎఫ్ఓ తన సేవలను మరింత ఆధునీకరించేందుకు నిరంతరం కృషి చేస్తోంది. ఇందులో భాగంగా భవిష్యత్తులో ఏటీఎం తరహా ఉపసంహరణ విధానం, మరింత సులభతరమైన క్లెయిమ్ ప్రక్రియ వంటి సేవలను ప్రారంభించాలని యోచిస్తోంది.
ఈ మార్పులు ఉద్యోగుల ఆర్థిక భద్రతను మెరుగుపరచడంలో ముఖ్యంగా ఇంటి కలను నెరవేర్చుకోవడంలో గణనీయంగా సహాయపడతాయి. అవసరమైన సమయంలో పీఎఫ్ నిధులను సులభంగా పొందేందుకు ఈ కొత్త మార్గదర్శకాలు మార్గం సుగమం చేస్తాయి.