జగపతి సినిమా.. దానికి రీమేకా?

దశాబ్దం కిందట ప్రముఖ బాలీవుడ్ దర్శకుడు సంజయ్ లీలా బన్సాలీ ‘బ్లాక్’ పేరుతో ఓ సినిమా చేశాడు గుర్తుందా? అమితాబ్ బచ్చన్.. రాణీ ముఖర్జీ ప్రధాన పాత్రల్లో నటించిన ‘బ్లాక్’ గొప్ప సినిమాగా పేరు తెచ్చుకుంది. అంతర్జాతీయ స్థాయిలో ప్రశంసలందుకుంది. ఇండియన్ ఫిలిం హిస్టరీలోనే ఒక క్లాసిక్‌ గా నిలిచిపోయింది. ఈ సినిమాను ఇప్పుడు తెలుగులోకి రీమేక్ చేస్తున్నారా అన్న సందేహాలు కలుగుతున్నాయి. సీనియర్ నటుడు జగపతిబాబు చేసిన వ్యాఖ్యలే ఇందుకు కారణం.

హీరో నుంచి విలన్ పాత్రలకు మళ్లిన జగపతి.. మళ్లీ కథానాయకుడిగా ఓ సినిమా చేయడానికి రెడీ అవుతున్న సంగతి తెలిసిందే. ఈ చిత్రానికి ‘పటేల్ సార్’ అనే టైటిల్ కూడా ఫిక్స్ చేశారు. ఇందులో తాను 60 ఏళ్ల పైబడ్డ వృద్ధుడిగా కనిపిస్తానని జగపతి చెప్పాడు. ఈ సినిమా టీచర్ అయిన ఓ వృద్ధుడికి.. అంధురాలైన ఓ అమ్మాయికి మధ్య నడిచే కథ అని జగపతి తెలిపాడు.

సరిగ్గా ‘బ్లాక్’ సినిమా కథ కూడా ఇలాగే ఉంటుంది. అందులో అమితాబ్ వృద్ధుడైన టీచర్. రాణీ ముఖర్జీ అంధురాలు. వీళ్లిద్దరి మధ్య బంధం నేపథ్యంలో సాగుతుందా సినిమా. మరి ఈ రెండు పాత్రలు యాదృచ్ఛికంగా కలుస్తున్నాయా.. లేక నిజంగానే ‘బ్లాక్’ సినిమాను రీమేక్ చేస్తున్నారా అన్నది తెలియాల్సి ఉంది. ఓ కొత్త దర్శకుడు రూపొందించే ఈ సినిమాను కర్ణాటక మాజీ ముఖ్యమంత్రి కుమారస్వామితో కలిసి జగపతి బాబే స్వయంగా నిర్మిస్తుండటం విశేషం. ఈ చిత్రం త్వరలోనే ప్రారంభమవుతుందని జగపతి తెలిపాడు.

Like Us on Facebook : https://www.facebook.com/Tupakidotcom/