బ్రహ్మి రచ్చ రచ్చ చేశాడుగా..

మూడేళ్లుగా తెలుగు సినిమాల్లో బ్రహ్మానందం హవా పెద్దగా కనిపించడం లేదు. మూడు దశాబ్దాల పాటు విరామం లేకుండా సినిమాలు చేస్తూ టాప్ కమెడియన్ గా కొనసాగిన ఆయన.. ఈ మధ్య ఎప్పుడో కానీ సినిమాల్లో కనిపించడం లేదు. చాన్నాళ్ల తర్వాత బ్రహ్మి కీలక పాత్ర చేసిన ‘ఆచారి అమెరికా యాత్ర’ శుక్రవారమే ప్రేక్షకుల ముందుకొచ్చింది. ఈ సందర్భంగానో లేక మామూలుగానో బ్రహ్మానందం తిరుమలకు వెళ్లి శ్రీ వేంకటేశ్వరుడిని దర్శించుకున్నారు. దర్శనం అనంతరం బయటికి వచ్చిన ఆయన మీడియా వాళ్లతో పరాచికాలాడిన తీరు నవ్వులు పూయించింది.

గుడిలోంచి బయటికి వస్తూ దండం పెట్టుకుని మీడియా వాళ్ల వైపు చూసిన బ్రహ్మి ఓవైపు తనను కెమెరామెన్లు వీడియోలు, ఫొటోలు తీస్తుండగానే అలాగే వడి వడిగా ముందుకు నడిచాడు. తనను పొటో తీస్తున్న వ్యక్తిని చూస్తూ నువ్వు ఫొటో తీయట్లా నన్ను చూస్తున్నావ్ అంటూ నవ్వాడు. తర్వాత నేను ఇలాగే నడుస్తుంటారా మీరు ఫొటోలు తీస్కోండి అంటూ ఒక పోజిచ్చాడు. ‘ఆచారి అమెరికా యాత్ర’ గురించి అడిగితే.. అవును ఈ రోజే రిలీజ్.. గుడి లోపలంతా ఆచారులే అన్నాడు బ్రహ్మి.తనను మీడియా వాళ్లు పలు అంశాలపై ప్రశ్నలడుగుతున్నా బ్రహ్మి పట్టించుకోలేదు. ఒక విలేకరి పవన్ గురించి అడిగినా లైట్ తీసుకున్నాడు. ఇంకో ప్రశ్న ఏదో ఎదురైతే నువ్వు అడగడం నేను చెప్పడం అంటూ సమాధానం దాటవేసి ముందుకు వెళ్లిపోయాడు. ‘ఆచారి అమెరికా యాత్ర’లో పెద్దగా నవ్వించలేకపోయిన బ్రహ్మి.. ఇలా బయట మాత్రం భలే నవ్వించేశాడనే చెప్పాలి.