బన్నీ 'రాకా'.. టైటిల్ కు అర్థమేంటి? డీకోడింగ్ నమ్మొచ్చా?

ఐకాన్ స్టార్ అల్లు అర్జున్ కొత్త సినిమా టైటిల్‌ ఇప్పుడు సోషల్ మీడియాలో హాట్ టాపిక్‌ గా మారింది. బన్నీ పుట్టినరోజు సందర్భంగా ఆయన నటిస్తున్న తాజా పాన్ ఇండియా ప్రాజెక్ట్‌ కు రాకా (Raaka) అనే టైటిల్‌ ను ప్రకటించగా.. అదే ఇప్పుడు నెటిజన్ల మధ్య చర్చకు దారి తీసింది. కోలీవుడ్ స్టార్ డైరెక్టర్ అట్లీ దర్శకత్వంలో తెరకెక్కుతున్న ఆ చిత్రం ప్రకటించినప్పటి నుంచి అంచనాలు పెంచుకుంటూ వస్తోంది.

అయితే తాజాగా వచ్చిన టైటిల్ ఆ హైప్‌ ను మరింత పెంచింది. రాకా అనే టైటిల్ సింపుల్‌ గా ఉన్నప్పటికీ, దాని వెనుక అర్థం ఏమిటి అన్నదే ఇప్పుడు ఆసక్తికరమైన అంశంగా మారింది. చిత్రబృందం అధికారికంగా ఎలాంటి వివరణ ఇవ్వకపోవడంతో, సోషల్ మీడియాలో నెటిజన్లు తమ తమ అభిప్రాయాలు వ్యక్తం చేస్తున్నారు. ముఖ్యంగా టైటిల్‌ ను డీకోడ్ చేయడానికి కొందరు అభిమానులు ప్రయత్నించడం ఆసక్తికరంగా మారింది.

కొంతమంది నెటిజన్లు RAAKA అనే పదాన్ని డివైడ్ చేస్తూ కామెంట్లు పెడుతున్నారు. R అంటే అల్లు అర్జున్ తాతయ్య దివంగత అల్లు రామలింగయ్య, AA అంటే అల్లు అర్జున్, K అంటే నిర్మాత కళానిధి మారన్, A అంటే దర్శకుడు అట్లీ అని చెబుతూ సోషల్ మీడియాలో పోస్టులు పెడుతున్నారు. ఆ డీకోడింగ్‌ కు సంబంధించి వివిధ విధాలుగా వివరణలు ఇస్తూ ట్రెండ్ చేస్తున్నారు.

అయితే మరికొందరు మాత్రం ఆ డీకోడింగ్ ను పూర్తిగా కొట్టిపారేస్తున్నారు. టైటిల్‌ కు ఇలాంటి అర్థాలు పెట్టడం కేవలం ఊహాగానాలేనని అంటున్నారు. మరోవైపు రాకా అనే పదానికి ఏదైనా ప్రత్యేక అర్థం ఉందా అనే కోణంలో కూడా చర్చ జరుగుతోంది. కొందరు ఇది ఒక పాత్ర పేరు కావచ్చని, మరికొందరు సినిమాలోని ముఖ్యమైన అంశాన్ని సూచించే పదమై ఉండొచ్చని భావిస్తున్నారు.

టైటిల్‌ లోని స్టైల్ చూస్తుంటే, ఒక ఇంటెన్స్, యాక్షన్ ఓరియెంటెడ్ కథకు సరిపోయేలా ఉందని సినీ అభిమానులు అభిప్రాయపడుతున్నారు. సినిమా ఫస్ట్ లుక్ పోస్టర్‌ లో కనిపించిన డార్క్ థీమ్ కూడా టైటిల్‌ కు మరింత మిస్టరీని జోడిస్తోంది. పోస్టర్‌ లో అల్లు అర్జున్ విభిన్నమైన లుక్‌ లో కనిపించడంతో పాటు, బ్యాక్‌ గ్రౌండ్‌ లో ఉన్న భయానక వాతావరణం సినిమా జానర్‌ పై ఆసక్తిని పెంచుతోంది.

మొత్తంగా చూస్తే.. రాకా టైటిల్ ఒకే సమయంలో సింపుల్‌ గా ఉండి, మిస్టరీని కలిగించేలా ఉంది. అఫీషియల్ గా ఎలాంటి వివరణ లేకపోవడంతో ప్రేక్షకుల్లో ఆసక్తి మరింత పెరుగుతోంది. ఇక చిత్రబృందం మూవీ టైటిల్ వెనుక ఉన్న అసలు అర్థాన్ని ఎప్పుడు వెల్లడిస్తుందా అన్నది ఆసక్తికరంగా మారింది. అప్పటి వరకు రాకా అనే పదం చుట్టూ చర్చలు కొనసాగే అవకాశం కనిపిస్తోంది. మొత్తానికి, టైటిల్‌ తోనే సినిమాపై భారీగా బజ్ క్రియేట్ చేయడంలో మేకర్స్ సక్సెస్ అయ్యారని చెప్పవచ్చు.