ఏడడుగులు వేసి విడాకులు తీసుకున్న ఏడుగురు ప్రముఖ క్రికెటర్లు వీరే

భారత క్రికెట్ లో ఇప్పుడు ఆల్ రౌండర్ హార్దిక్ పాండ్యా విడాకుల విషయం ఇప్పుడు పెద్ద చర్చనీయాంశం. ఎంతో కష్టపడి పైకి వచ్చిన పాండ్య.. ఎంతో ఇష్టపడి నటాషాను వివాహమాడాడు. పెళ్లికి ముందే వీరికి ఓ కుమారుడు కూడా పుట్టాడు. అయితే, ఐదేళ్లు తిరగకుండానే వీరు విడిపోతున్నారు. భారత క్రికెట్ లో ఇంత తొందరగా విడిపోయిన జంట వీరేనేమో? ఇలాంటి వారు ఇంకా ఎవరున్నారో చూస్తే..

టెన్నిస్-క్రికెట్ లవ్

భారత్ లో టెన్నిస్ కు మారుపేరుగా నిలిచిన సానియా మీర్జాకు తొలుత ప్రముఖ బేకరీ కరాచీ బేకరీ సంస్థ యజమాని కుమారుడితో వివాహం కుదిరింది. కానీ, అది రద్దయి.. సానియా చివరకు పాకిస్థాన్ క్రికెట్ మాజీ కెప్టెన్ షోయబ్ మాలిక్ ను వివాహమాడింది. 2010లో వీరిద్దరూ ఒక్కటయ్యారు. పదేళ్లుపైగా కలిసున్న అనంతరం నిరుడు విడిపోయారు.

పెళ్లయిన మహిళను పెళ్లాడిన ధావన్

టీమిండియా ఓపెనర్ శిఖర్ ధావన్ 2012లో ఆయేషా ముఖర్జీని పెళ్లాడాడు. అప్పటికే ఆయేషాకు పెళ్లయి భర్తతో విడిపోయింది. వీరు కూడా పదేళ్లు కలిసున్నారు. 2021లో విడిపోయారు. నిరుడు ధావన్ తన కుమారుడిని చూడనీయడం లేదంటూ ఆయేషాపై తీవ్ర విమర్శలు చేశాడు.

సహచర క్రికెటర్ చేతిలో మోసపోయిన కార్తీక్

టీమిండియా, ఐపీఎల్ లో ఫినిషర్ గా పేరు తెచ్చుకున్న వికెట్ కీపర్ బ్యాటర్ దినేశ్ కార్తీక్ చాలా చిన్న వయసులోనే.. 23 ఏళ్లకే నికితా వంజారాను పెళ్లాడాడు. కానీ, నికితా ఆ తర్వాత తమిళనాడుకే చెందిన కార్తీక్ సహచర క్రికెటర్ మురళీ విజయ్ తో ఎఫైర్ పెట్టుకుంది. కార్తీక్ తో 2012లో విడిపోయింది. అనంతరం కార్తీక్ స్వ్కాష్ ప్లేయర్ దీపికా పల్లికల్ ను పెళ్లి చేసుకున్నాడు

టీమిండియా మాజీ కెప్టెన్.. హైదరాబాదీ

టీమిండియాకు సుదీర్ఘ కాలం కెప్టెన్ గా వ్యవహరించిన హైదరాబాదీ మొహమ్మద్ అజహరుద్దీన్ హైదరాబాద్ కే చెందిన నౌరీన్ ను కెరీర్ తొలినాళ్లలోనే పెళ్లాడాడు. కానీ, 1996లో వీరు విడిపోయారు. అజహర్ బాలీవుడ్ నటి సంగీతా బిజ్ లానీని పెళ్లాడాడు. ఆ తర్వాత వీరు కూడా విడిపోయారు.

సచిన్ స్నేహితుడు..

సచిన్ తెందూల్కర్ తో పాటే గొప్ప క్రికెటర్ కావాల్సిన వినోద్ కాంబ్లీ కెరీర్ అర్థంతరంగా ముగిసింది. ఇతడు నోయెల్లా లూయీస్ ను వివాహం చేసుకున్నాడు. కానీ, 2005లో విడిపోయాడు. ఆస్ట్రేలియా మాజీ కెప్టెన్ మైకేల్ క్లార్క్ తన గర్ల్ ఫ్రెండ్ కైలీ బోల్డీతో 2020లో తెగదెంపులు చేసుకున్నాడు.