టీమిండియాకు ఆసియా కప్ సవాళ్లు: జట్టులో స్థానం ఎవరికి?

ఆసియా కప్ కోసం భారత జట్టు ఎంపిక ప్రస్తుతం క్రికెట్ వర్గాల్లో ఉత్కంఠ రేపుతోంది. ముఖ్యంగా కీలకమైన స్థానాలైన వైస్ కెప్టెన్సీ, ఓపెనింగ్ స్లాట్స్‌తో పాటు మిడిల్ ఆర్డర్ కూర్పుపై విస్తృతమైన చర్చ జరుగుతోంది. ఇప్పటికే గాయం నుంచి కోలుకున్న సూర్యకుమార్ యాదవ్ జట్టు పగ్గాలు చేపట్టడం ఖాయంగా కనిపిస్తోంది. కానీ, మరికొన్ని స్థానాల విషయంలో మాత్రం సందిగ్ధత కొనసాగుతోంది.

-వైస్ కెప్టెన్ ఎవరు?

వైస్ కెప్టెన్సీ రేసులో ఇద్దరు యువ ఆటగాళ్ల పేర్లు ప్రముఖంగా వినిపిస్తున్నాయి: అక్షర్ పటేల్ , శుభ్‌మన్ గిల్. ఇద్దరూ ఇటీవల అద్భుతమైన ప్రదర్శన కనబరుస్తున్నారు. అక్షర్ పటేల్ తన ఆల్రౌండర్ నైపుణ్యంతో జట్టుకు సమతూకం తెస్తుంటే, శుభ్‌మన్ గిల్ బ్యాటింగ్‌లో నిలకడగా రాణిస్తున్నాడు. వీరిలో ఎవరికి ఈ కీలక బాధ్యత దక్కుతుందనేది ఆసక్తికరంగా మారింది.

-ఓపెనింగ్ స్లాట్స్

యశస్వి జైస్వాల్, సాయి సుదర్శన్ వంటి యువ ఓపెనర్లు ఉన్నప్పటికీ, ప్రస్తుత ఫామ్‌ను బట్టి చూస్తే అభిషేక్ శర్మ , సంజు శాంసన్ తుది జట్టులో స్థానం దక్కించుకునే అవకాశం ఎక్కువగా ఉంది. వీరిద్దరూ ఇటీవలి మ్యాచ్‌లలో నిలకడైన ప్రదర్శనతో ఆకట్టుకున్నారు, దీంతో టాప్ ఆర్డర్ దాదాపుగా ఖరారైనట్టే కనిపిస్తోంది.

-కేఎల్ రాహుల్ పరిస్థితి

గత కొంతకాలంగా మిడిల్ ఆర్డర్‌లో ఆశించిన స్థాయిలో రాణించలేకపోతున్న కేఎల్ రాహుల్ ను ఈసారి ఆసియా కప్ జట్టు నుంచి తప్పించే అవకాశం ఉంది. ఈ నిర్ణయం జట్టు కూర్పులో ఒక పెద్ద మార్పు కానుంది.

-తుది జట్టు ప్రకటన ఎప్పుడు?

ఆగస్టు 19 లేదా 20న తుది జట్టును ప్రకటించే అవకాశం ఉంది. ఆసియా కప్ సెప్టెంబర్ 9న ప్రారంభం కానుండగా, సెప్టెంబర్ 10న యుఏఈతో భారత్ తమ తొలి మ్యాచ్ ఆడనుంది.

ఎవరు తుది జట్టులో చోటు దక్కించుకుంటారు.. ఎవరు నిరాశకు గురవుతారు అనేది మరికొద్ది రోజుల్లో తేలనుంది. ఈ టోర్నమెంట్‌లో టీమిండియా ప్రదర్శన ఎలా ఉంటుందో చూడాలి.