రెండు హెలీకాప్టర్లు గాల్లోనే ఢీకొంటే ఎట్టుంటాదో తెలుసా.. వీడియో!
| అవును... ఆదివారం దక్షిణ న్యూజెర్సీలో రెండు హెలికాప్టర్లు గాల్లోనే ఢీకొన్న ఘటన చోటుచేసుకుంది.
రోడ్డుపై రెండు వాహనాలు ఎదురెదురుగా వచ్చి ఢీకొంటే ఎలా ఉంటుంది..? రెండు బండ్లు తుక్కు తుక్కు అయిపోతాయి! మరి రెండు హెలీకాప్టర్లు గాల్లో ఒకదానినొకటి ఢీకొంటే..! తాజాగా దక్షిణ న్యూజెర్సీలో ఇదే జరిగింది. రెండు హెలీకాటర్లు గాల్లోనే ఢీకొన్నాయి. ఈ ఘటనలో ఒకరు మృతి చెందగా.. మరొకరు తీవ్రంగా గాయపడ్డారని అధికారులు తెలిపారు. దీనికి సంబంధించిన పలు వీడియోలు నెట్టింట హల్ చల్ చేస్తున్నాయి.
అవును... ఆదివారం దక్షిణ న్యూజెర్సీలో రెండు హెలికాప్టర్లు గాల్లోనే ఢీకొన్న ఘటన చోటుచేసుకుంది. ఈ సంఘటన అట్లాంటిక్ కౌంటీలోని ఒక చిన్న ఎయిర్ ఫీల్డ్ అయిన హామోంటన్ మున్సిపల్ విమానాశ్రయం పైన స్థానిక కాలమానం ప్రకారం ఉదయం 11:25 గంటలకు జరిగింది. ఎయిర్ పోర్ట్ సమీపంలో విమాన ప్రమాదం జరిగిందనే నివేదికల తర్వాత అత్యవసర బృందాలను పంపినట్లు హామోంటన్ పోలీస్ చీఫ్ కెవిన్ ఫ్రైల్ తెలిపారు.
ఇదే సమయంలో.. ఈ ప్రమాదంపై ఫెడరల్ ఏవియేషన్ అడ్మినిస్ట్రేషన్, జాతీయ రవాణా భద్రతా బోర్డు దర్యాప్తు ప్రారంభించాయని అన్నారు. అదేవిధంగా.. విమాన మార్గాలు, కమ్యూనికేషన్లు, ఢీకొనడానికి దోహదపడిన ఇతర అంశాలను ఫెడరల్ పరిశోధకులు పరిశీలిస్తారని భావిస్తున్నట్లు తెలిపారు.
ఈ సందర్భంగా స్పందించిన ఫెడరల్ ఏవియేషన్ అడ్మినిస్ట్రేషన్... ఈ ప్రమాదంలో ఎన్ స్ట్రోమ్ ఎఫ్-28ఏ హెలికాప్టర్, ఎన్ స్ట్రోమ్ 280సి లు ఢీకొన్నాయని ఎలిపింది. అయితే.. ఈ ప్రమాదం జరిగిన సమయంలో రెండు హెలికాప్టర్లలోనూ పైలెట్లు మాత్రమే ఉన్నారని వెల్లడించింది. ఇందులో ఓ హెలికాప్టర్ పైలెట్ అక్కడికక్కడే మృతి చెందగా.. రెండవ పైలెట్ తీవ్ర గాయాలతో ఆస్పత్రిలో చికిత్స పొందుతున్నారని.. అతడి పరిస్థితి విషయంగా ఉందని తెలిపారు!
ఈ ప్రమాదానికి గల కారణాలు తెలియాల్సి ఉంది. ఈ సందర్భంగా స్పందించిన అక్యూవెదర్... ప్రమాదం జరిగిన సమయంలో వాతావరణ పరిస్థితులు ప్రధాన కారకంగా కనిపించలేదని.. ఆకాశం ఎక్కువగా మేఘావృతమై ఉందని.. అయితే గాలులు తక్కువగానే ఉన్నాయని.. ఢీకొన్న ప్రాంతంలో దృశ్యమానత బాగానే ఉందని తెలిపింది. అంటే.. ఈ ప్రమాదానికి వాతావరణ పరిస్థితులు కారణం కాదని వెల్లడించినట్లయ్యింది!
కాగా... హోమోంటన్ అనేది ఫిలడెల్ఫియాకు ఆగ్నేయంగా సుమారు 35 మైళ్ల (దాదాపు 56 కిలోమీటర్ల) దూరంలో ఉన్న నివాసితుల ప్రాంతం. ఇక్కడ సుమారు 15,000 వరకూ నివసిస్తున్నారు. వ్యవసాయ మూలాలకు ప్రసిద్ధి చెందిన ఈ ప్రాంతంలో ఒక మిలియన్ ఎకరాలకు పైగా విస్తరించి ఉన్న అటవీ ప్రాంతం ఉంది.