మార్కెట్ల పతనం.. రూ.4 లక్షల కోట్ల సంపద ఆవిరి.. కారణాలివే

దేశీయ స్టాక్ మార్కెట్లు బలహీనతను కొనసాగిస్తున్నాయి. ట్రంప్‌ టారిఫ్‌ల భయాలు, భౌగోళిక రాజకీయ అనిశ్చితి, విదేశీ మదుపర్ల అమ్మకాలు మార్కెట్లను ఒత్తిడిలోకి నెడుతున్నాయి. సోమవారం ట్రేడింగ్‌లో సూచీలు భారీ నష్టాలను చవిచూశాయి. ఏకంగా ఎనిమిది నెలల కనిష్ఠ స్థాయికి పడిపోయిన మార్కెట్, ఒక్క రోజులోనే దాదాపు రూ.4 లక్షల కోట్ల మదుపర్ల సంపదను ఆవిరి చేసింది. సెన్సెక్స్‌ 850 పాయింట్లు క్షీణించగా, నిఫ్టీ 200 పాయింట్లకు పైగా పడిపోయింది.

- నష్టాల్లో ట్రేడింగ్

అంతర్జాతీయ మార్కెట్ల బలహీన సంకేతాల నేపథ్యంలో 74,893 పాయింట్ల వద్ద నష్టాలతో ప్రారంభమైన సెన్సెక్స్‌ రోజంతా అదే ఒరవడిని కొనసాగించింది. ఒక దశలో 900 పాయింట్లకు పైగా పడిపోయి 74,387 పాయింట్ల వద్ద ఇంట్రాడే కనిష్ఠాన్ని తాకింది. చివరకు 856.66 పాయింట్లు కోల్పోయి 74,454.41 వద్ద ముగిసింది. నిఫ్టీ 242.55 పాయింట్లు కోల్పోయి 22,553.35 వద్ద స్థిరపడింది. అలాగే, రూపాయి మారకం విలువ డాలర్‌తో పోలిస్తే 4 పైసలు తగ్గి 86.72 వద్ద ముగిసింది.

- రంగాల వారీగా మార్కెట్ పరిస్థితి

ఆటో, ఫార్మా, ఎఫ్‌ఎంసీజీ మినహా మిగిలిన రంగాల షేర్లు భారీ నష్టాలను చవిచూశాయి. ముఖ్యంగా ఐటీ, లోహ, టెలికం సూచీలు 2% మేర క్షీణించాయి. నిఫ్టీలో విప్రో, హెచ్‌సీఎల్‌ టెక్నాలజీస్‌, ఇన్ఫోసిస్‌, టీసీఎస్‌, టాటా స్టీల్‌ షేర్లు నష్టపోయాయి. అయితే, మహింద్రా అండ్‌ మహింద్రా, ఐషర్‌ మోటార్స్‌, డాక్టర్‌ రెడ్డీస్‌, హీరో మోటార్స్‌, కొటక్‌ మహీంద్రా బ్యాంక్‌ షేర్లు లాభాలను సాధించాయి.

- మార్కెట్ పతనానికి ప్రధాన కారణాలు

విదేశీ మదుపర్ల అమ్మకాలు: శుక్రవారం ఒక్కరోజే రూ.3,449.15 కోట్ల విదేశీ పెట్టుబడులు వెనక్కి వెళ్లాయి. ఫిబ్రవరి నెలలో రూ.23,740 కోట్ల ఎఫ్‌పీఐ పెట్టుబడులు బయటకు పోయాయి. ఈ ఏడాదిలో ఇప్పటివరకు మొత్తం ఎఫ్‌పీఐ అమ్మకాలు రూ.1 లక్ష కోట్లను దాటాయి.

ట్రంప్‌ టారిఫ్‌ ప్రభావం: అమెరికాలో ట్రంప్‌ అధిక టారిఫ్‌లు అమలు చేయడంతో, అక్కడ ద్రవ్యోల్బణం పెరిగే అవకాశం ఉంది. దీంతో బాండ్ల ప్రతిఫలాలు పెరిగి, విదేశీ మదుపర్లు భారత మార్కెట్లలో పెట్టుబడులకు ఆసక్తి చూపకపోవచ్చని నోమురా బ్రోకరేజీ సంస్థ అంచనా వేసింది.

భౌగోళిక రాజకీయ అనిశ్చితి: రష్యా-ఉక్రెయిన్‌ యుద్ధం, పశ్చిమాసియా ఉద్రిక్తతలు మార్కెట్లపై ప్రతికూల ప్రభావాన్ని చూపుతున్నాయి.

రూపాయి పతనం & ఆర్థిక పరిస్థితి: రూపాయి విలువ క్షీణించడమే కాకుండా, అమెరికా డాలర్‌ రిజర్వ్‌లు తగ్గడం మార్కెట్ సెంటిమెంట్‌ను దెబ్బతీసింది. అంతేకాదు, దేశీయ కార్పొరేట్ సంస్థల డిసెంబరు త్రైమాసిక ఫలితాలు ఆశించిన స్థాయిలో లేకపోవడంతో, మార్కెట్‌పై మరింత ఒత్తిడి ఏర్పడింది.

ఈ సంకేతాలన్నింటిని దృష్టిలో ఉంచుకున్న మార్కెట్ విశ్లేషకులు, సమీప భవిష్యత్తులో మార్కెట్ స్థిరపడేందుకు కొంత సమయం పట్టొచ్చని భావిస్తున్నారు. అంతర్జాతీయ పరిణామాలు, విదేశీ పెట్టుబడుల ప్రవాహం, రూపాయి మారకం స్థాయిలు తదితర అంశాలు మార్కెట్ల తీరును నిర్ణయించనున్నాయి.