బోస్టన్‌లో తెలుగు విద్యార్థిని అదృశ్యం.. 36 గంటలుగా జాడలేదు.. అసలేమైంది?

అమెరికాలో తెలుగు విద్యార్థుల ఘటనలు వరుసగా కలకలం రేపుతోంది. ఇటీవల కాలంలో వరుసగా జరుగుతున్న ఘటనలు, ప్రమాదాలు పలువురు విద్యార్థుల భవిష్యత్తును అంధకారం చేశాయి. ఇప్పుడు మరో విద్యార్థిని అదృష్టం కావడం.. 36 గంటలుగా ఆమె ఆచూకీ కనిపించకపోవడంతో కలకలం చెలరేగింది.

ఉన్నత విద్య కోసం వెళ్లిన తెలుగు విద్యార్థిని అదృశ్యం కావడం కలకలం రేపుతోంది. చదువు, కెరీర్‌ కలలతో అమెరికా వెళ్లిన యువతి అకస్మాత్తుగా కనిపించకుండా పోవడంతో తెలంగాణలోని ఆమె కుటుంబ సభ్యులు తీవ్ర ఆందోళనకు గురవుతున్నారు. మరోవైపు బోస్టన్‌లోని తెలుగు ఎన్నారైలు, విద్యార్థులు ఆమె ఆచూకీ కోసం సహకరించాలని కుటుంబ సభ్యులు విజ్ఞప్తి చేస్తున్నారు.

తెలంగాణలోని నల్గొండకు చెందిన కోయ శ్రీజా రెడ్డి అమెరికాలోని మసాచుసెట్స్ యూనివర్సిటీ బోస్టన్‌లో చదువుకుంటున్నారు. ఎఫ్‌-1 విద్యార్థి వీసాపై అమెరికాలో ఉంటున్న ఆమె నవంబర్ 2వ తేదీ రాత్రి నుంచి కనిపించకుండా పోయినట్లు సమాచారం. ఆమె అదృశ్యమైనట్లు మరుసటి రోజు పోలీసులకు ఫిర్యాదు చేశారు. బోస్టన్ పోలీసుల వివరాల ప్రకారం.. నవంబర్ 2వ తేదీ రాత్రి 9.45 గంటల సమయంలో డోర్చెస్టర్‌లోని ఎడిసన్ గ్రీన్ ప్రాంతం నుంచి శ్రీజ చివరిసారిగా బయటకు వెళ్లినట్లు గుర్తించారు. స్క్వాంటమ్ ఛానల్ సమీపంలో ఆమె కనిపించినట్లు పోస్టర్లలో పేర్కొన్నారు. అక్కడి నుంచి క్యాజిల్ ఐలాండ్ వైపు నడుచుకుంటూ వెళ్లినట్లు సమాచారం. శ్రీజ ఆచూకీ తెలిసిన వారు 911కు ఫోన్ చేయాలని.. లేదంటే డోర్చెస్టర్ పోలీస్ డిస్ట్రిక్ట్ డిటెక్టివ్ విభాగాన్ని 617-343-4335 నంబర్‌లో సంప్రదించాలని కోరారు.

విదేశాల్లో చదువుకుంటున్న తెలుగు విద్యార్థుల విషయంలో వరుసగా జరుగుతున్న ఇలాంటి ఘటనలు కలకలం రేపుతున్నాయి. శ్రీజ క్షేమంగా తిరిగి రావాలని నల్గొండలోని ఆమె కుటుంబ సభ్యులు ఆశగా ఎదురుచూస్తున్నారు. ఆమె ఆచూకీ కోసం బోస్టన్‌లోని తెలుగు సమాజం స్పందించాలని వేడుకుంటున్నారు.