అమెరికాలో 3 లక్షలకు పైగా వీసాలు రద్దు.. ట్రంప్ ప్రభుత్వం కీలక నిర్ణయం!

అమెరికా అధ్యక్షుడు డొనాల్డ్ ట్రంప్ ప్రభుత్వం ఇమ్మిగ్రేషన్ నిబంధనలను మరింత కఠినతరం చేస్తోంది. 2025లో ట్రంప్ రెండోసారి అధికారంలోకి వచ్చినప్పటి నుంచి 3 లక్షలకు పైగా వీసాలను రద్దు చేసినట్లు అమెరికా విదేశాంగ శాఖ వెల్లడించింది. అమెరికా చరిత్రలో ఇదే అత్యధిక వీసా రద్దుల సంఖ్యగా పేర్కొంది.

వీసాల రద్దుకు ప్రధానంగా నేర కార్యకలాపాలు, ప్రజా భద్రతకు ముప్పు, ఇమ్మిగ్రేషన్ నిబంధనల ఉల్లంఘన, మోసం, తప్పుడు సమాచారం వంటి కారణాలను వెల్లడించింది.

మరో కీలక విషయం బర్త్ టూరిజం. అమెరికాలో బిడ్డకు జన్మనివ్వడం ద్వారా ఆ చిన్నారికి అమెరికా పౌరసత్వం లభిస్తుందనే ఉద్దేశంతో ప్రయాణించే వారిపై కూడా చర్యలు తీసుకుంది. ఈ కారణంతో 4,000కు పైగా వీసాలను రద్దు చేయగా, వాటిలో 700కు పైగా చైనా పౌరులకు చెందినవిగా తెలిపింది.

2025లోనూ వేలాది వీసాలను నేరాలు, మద్యం సేవించి వాహనాలు నడపడం, దాడులు, డ్రగ్స్ సంబంధిత కార్యకలాపాల కారణంగా రద్దు చేసినట్లు వెల్లడించింది.

ఈ పరిణామాలతో అమెరికాలో చదువుకుంటున్న భారతీయ విద్యార్థులు, ఉద్యోగుల్లో ఆందోళన పెరుగుతోంది. అయితే రద్దు చేసిన వీసాల్లో భారతీయుల సంఖ్యను అమెరికా ప్రభుత్వం ప్రత్యేకంగా వెల్లడించలేదు.