దువ్వాడ శ్రీనివాస్‌కు డాక్టరేట్.. దేనికోసమంటే?

ఆంధ్రప్రదేశ్ వైఎస్సార్ కాంగ్రెస్ పార్టీ ఎమ్మెల్సీ దువ్వాడ శ్రీనివాస్‌కు డాక్టరేట్ లభించింది. ఆయన వృత్తి పట్ల అంకితభావం, సమాజానికి చేసిన విశిష్ట సేవలను గుర్తించి ఈ గౌరవం దక్కినట్లు తెలుస్తోంది.

హైదరాబాద్‌లోని గ్రీన్ పార్క్ హోటల్‌లో జరిగిన ఒక కార్యక్రమంలో అమెరికా మాజీ అధ్యక్షుడు డొనాల్డ్ ట్రంప్ సలహాదారుడు మార్క్ బర్న్ చేతుల మీదుగా దువ్వాడ శ్రీనివాస్ ఈ డాక్టరేట్ పట్టాను అందుకున్నారు. ఈ మేరకు ఒక ఫోటో సామాజిక మాధ్యమాల్లో వైరల్ అవుతోంది.

డే స్ప్రింగ్ అంతర్జాతీయ విశ్వవిద్యాలయం ఈ డాక్టరేట్‌ను ప్రదానం చేసినట్లు తెలుస్తోంది. ఈ సందర్భంగా (IIFA) ఇండో - ఇజ్రయల్ ఫ్రెండ్ షిప్ అసోసియేషన్ జాతీయ చైర్మన్ డాక్టర్ ఆడమ్ రాజ్ డెక్కపాటి, రెవరెండ్ సొల్మన్ గట్టు, మణిపూర్ నుండి బిషప్ పోతన్, మాజీ ఎంపీ హర్షకుమార్, మున్సిపల్ చైర్మన్ సరస్వతి, దివ్వెల మాధురి, సీనియర్ కాంగ్రెస్ నాయకులు అశోక్ గౌడ్, రాజయ్య గౌడ్, పల్లె వెంకట్ గౌడ్, శంకర్ గౌడ్ తదితరులు ఈ కార్యక్రమానికి హాజరయ్యారు.

దువ్వాడ శ్రీనివాస్‌కు డాక్టరేట్ రావడం పట్ల ఆయన అభిమానులు, వైఎస్సార్సీపీ కార్యకర్తలు హర్షం వ్యక్తం చేస్తున్నారు. ఆయన మరిన్ని ఉన్నత శిఖరాలను అధిరోహించాలని ఆకాంక్షిస్తున్నారు.

- దువ్వాడ చేసిన సేవలు..

శ్రీకాకుళం జిల్లాలో తన సేవా కార్యక్రమాలు, ప్రజల పట్ల నిబద్ధతకు గుర్తింపు పొందారు. సాధారణ కుటుంబంలో జన్మించిన శ్రీనివాస్, తన అంకితభావం, కృషి ద్వారా రాజకీయాల్లో ఉన్నత స్థానానికి చేరుకున్నారు. శ్రీనివాస్ తన రాజకీయ జీవితాన్ని సాధారణ కార్యకర్తగా ప్రారంభించి, అంచెలంచెలుగా ఎదిగారు. ఆయన వివిధ పదవుల్లో పనిచేస్తూ ప్రజలకు తనవంతు సేవ చేశారు. ముఖ్యంగా బలహీన వర్గాల ప్రజల కోసం ఆయన చేసిన కృషి ఎంతో ప్రశంసనీయం. వారి విద్య, వైద్యం , జీవనోపాధి కోసం ఆయన నిరంతరం పాటుపడ్డారు. శ్రీకాకుళం ప్రాంతంలో అనేక అభివృద్ధి కార్యక్రమాల్లో దువ్వాడ శ్రీనివాస్ కీలక పాత్ర పోషించారు. రోడ్లు, పాఠశాలలు, ఆసుపత్రులు వంటి మౌలిక సదుపాయాల కల్పనలో ఆయన చూపిన చొరవ ఎంతో మందికి లబ్ధి చేకూర్చింది. అంతేకాకుండా, ప్రకృతి వైపరీత్యాలు సంభవించినప్పుడు ఆయన ముందుండి సహాయక చర్యలు చేపట్టేవారు. బాధితులకు అండగా నిలబడి వారికి అవసరమైన సహాయం అందించడంలో ఆయన ఎల్లప్పుడూ ముందుండేవారు.

దువ్వాడ శ్రీనివాస్ కేవలం రాజకీయ నాయకుడిగానే కాకుండా, మానవతావాదిగా కూడా గుర్తింపు పొందారు. ఆయన అనేక స్వచ్ఛంద సంస్థలతో కలిసి పనిచేస్తూ పేద ప్రజలకు సహాయం అందిస్తున్నారు. రక్తదాన శిబిరాలు, వైద్య శిబిరాలు నిర్వహించడం ద్వారా ఆయన ఎంతో మందికి సేవలందించారు. విద్యార్థులకు పుస్తకాలు , ఇతర విద్యా సామాగ్రిని అందించారు.