మిస్ వరల్డ్ 2025 గ్రాండ్ ఫినాలే..సోనూసూద్‌కు హ్యుమానిటేరియన్ అవార్డు!
| సోనూసూద్‌కు అరుదైన 'మిస్ వరల్డ్ హ్యుమానిటేరియన్ అవార్డు'
అందం, తెలివితేటలకు ప్రపంచ వేదికగా నిలిచే 72వ మిస్ వరల్డ్ పోటీలు 2025 గ్రాండ్ ఫినాలే హైదరాబాద్‌లోని అంతర్జాతీయ కన్వెన్షన్ సెంటర్ (HICC)లో అంగరంగ వైభవంగా జరిగాయి. ప్రపంచం నలుమూలల నుంచి వచ్చిన అందగత్తెలు మిస్ వరల్డ్ కిరీటం కోసం తీవ్రంగా పోటీ పడ్డారు. ఈ ప్రతిష్టాత్మక కార్యక్రమానికి సినీ, రాజకీయ రంగాలకు చెందిన ప్రముఖులు తరలివచ్చారు. అయితే, భారత అభిమానులకు మాత్రం ఈసారి కొంత నిరాశ ఎదురైంది.
సోనూసూద్‌కు అరుదైన 'మిస్ వరల్డ్ హ్యుమానిటేరియన్ అవార్డు'
ఈ భారీ వేదికపై ఒక ప్రత్యేకమైన, అరుదైన గౌరవం భారతీయ సినీ నటుడు, రియల్ హీరో సోనూసూద్‌ను వరించింది. మానవతా సేవలకు (హ్యుమానిటేరియన్ వర్క్) ఆయన చేసిన అద్భుతమైన కృషికి గాను 'మిస్ వరల్డ్ హ్యుమానిటేరియన్ అవార్డు'ను సోనూసూద్‌కు ప్రదానం చేశారు. ఈ అవార్డును ప్రముఖ సినీ నటుడు రానా దగ్గుబాటి చేతుల మీదుగా సోనూసూద్ అందుకున్నారు. కోవిడ్ మహమ్మారి సమయంలో ప్రజలకు సహాయం చేయడం, ఆ తర్వాత కూడా నిరంతరం సామాజిక సేవలో నిమగ్నమైన సోనూసూద్‌కు ఈ అంతర్జాతీయ గుర్తింపు లభించడం దేశానికే గర్వకారణం.
ఖండాల వారీగా విజేతల ఎంపిక ప్రక్రియ
మిస్ వరల్డ్ నిర్వాహకులు పోటీలో మరింత ఆసక్తిని పెంచడానికి ఖండాల వారీగా టాప్-2 విజేతలను ఎంపిక చేసి, వారిలో ఒక్కరిని మాత్రమే తుది దశకు షార్ట్‌లిస్ట్ చేశారు. ఈ ఎంపిక ప్రక్రియలో "మీరు మిస్ వరల్డ్ అయితే ఏం చేస్తారు?" అనే ప్రశ్నకు అభ్యర్థులు కేవలం 45 సెకన్లలోనే సమగ్రమైన, మెరుగైన సమాధానం ఇవ్వాల్సి ఉంటుంది. న్యాయనిర్ణేతలు అభ్యర్థుల సమాధానాలకు మార్కులు వేసి తుది నిర్ణయం తీసుకుంటున్నారు.
ఖండాల వారీగా టాప్ ఫైనలిస్ట్‌లు వీరే
అమెరికా అండ్ కరీబియన్: మార్టినిక్
ఆఫ్రికా: ఇథియోపియా
యూరప్: పోలెండ్
ఆసియా: థాయ్‌లాండ్
టాప్-8లో చోటు దక్కని నందినీ గుప్తా
ఈసారి భారత అభిమానుల ఆశలు అడియాశలయ్యాయి. భారత్ తరపున పోటీ పడిన మిస్ ఇండియా నందినీ గుప్తా టాప్-8 జాబితాలో చోటు దక్కించుకోలేకపోయారు. దీనితో ఆమె మిస్ వరల్డ్ పోటీల నుంచి ఎలిమినేట్ అయ్యారు. భారతీయ అభిమానులకు ఇది కాస్త నిరాశను మిగిల్చినా, నందిని తనదైన శైలిలో అద్భుతమైన ప్రదర్శన కనబరిచారు.