పల్లెలే దేశానికి పట్టుకొమ్మలు..ఈ కొమ్మ లెక్కే వేరు.. సూపరు!

పల్లెలే దేశానికి పట్టుకొమ్మలు అని మహాత్మాగాంధీ అన్న సంగతి తెలిసిందే. నిజంగా... పల్లెలు అన్ని విధాలా అభివృద్ధి సాధిస్తేనే దేశాభివృద్ధి సాధ్యమవుతుంది. ఇందులో భాగంగా... అక్షరాస్యత, పరిశుభ్రత, మౌలిక వసతుల కల్పన ద్వారా గ్రామాలు త్వరగా అభివృద్ధిని సాదిస్తాయి. ఈ సమయంలో తాజాగా ఓ గ్రామం ఈ విషయంలో ఫుల్ మార్కులు సంపాధించింది.. ఆదర్శంగా నిలిచింది.

అవును... పల్లెలే దేశానికి పట్టుకొమ్మలు అని గాంధీ చెప్పగా.. ఇప్పుడు చెప్పుకోబోయే పల్లె లెక్కే వేరు.. దీని కథ సూపరు. ఈ గ్రామంలో 250 కుటుంబాలు ఉంటే, ప్రతీ ఇంట్లోనూ ఒక ఉద్యోగి ఉన్నారు! ఆ గ్రామం పేరే.. ఏపీలోని పల్నాడు జిల్లాలోని రెడ్డిపాలెం. ఈ గ్రామంలో ఉన్నవారంతా ఎస్సీ, ఎస్టీలే. ఇది నల్లమల అంచున ఉన్న చిన్న పల్లె. ఇక్క 1912లోనే చర్చితో పాటు పాఠశాలను నెలకొల్పారు.

గ్రామంలో ఐకమత్యానికి, విద్యాభివృద్ధికి ఇది ఎంతో దోహదపడింది! ఫలితంగా... ప్రభుత్వంలోని పలు శాఖల్లో 65 మంది ఉద్యోగులు ఈ గ్రామం నుంచే ఉన్నారు. వీరిలో సివిల్ జడ్జి కోర్టు న్యాయధికారి, తహసీల్దార్, ప్రభుత్వ ఉపాధ్యాయులు, బ్యాంకు ఉద్యోగులు, పోలీసులు, పోస్టల్ ఉద్యోగులు, వాణిజ్య పన్నుల శాఖలో అనేకమంది ఉన్నారు. ఓ 40 మంది ఊరికి సమీపంలోని సిమెంట్ ఫ్యాక్టరీలో పనిచేస్తున్నారు.

ఈ ఊరిలోని ప్రజలంతా ఉద్యోగాల నిమిత్తం ఇతర ప్రాంతాల్లో ఉన్నా... ప్రతీ ఏటా డిసెంబర్ 3న నిర్వహించే పునీత ఫ్రాన్సిస్ శౌరి చర్చి పండగకు మాత్రం తప్పనిసరిగా గ్రామానికి చేరుకుంటారు. వేర్వేరు ప్రాంతల్లో సబ్ రిజిస్టార్లుగా పని చేస్తున్న ముగ్గురి సారథ్యంలో ఈ గ్రామంలో ఉద్యోగుల సంఘం ఏర్పాటైంది. ఈ క్రమంలో గ్రామంలో మొక్కలు నాటారు.

ఇదే క్రమంలో... పల్లెలోని ప్రతీ ఇంటికీ కుళాయి కనెక్షన్ ఉంది. మరుగుదొడ్లు ఉన్నాయి. అదేవిధంగా... ఊరంతా సిమెంట్ రోడ్లు నిర్మించారు. ఏటా అంతా ఊరికి చేరుకున్నప్పుడు వాలీబాల్ పోటీలు నిర్వహిస్తుంటారు! మరో ఆశ్చర్యకరమైన విషయం ఏమిటంటే.. ఈ గ్రామంలో 1981 నుంచి ఇప్పటివరకూ 8 సార్లు సర్పంచ్ ఎన్నికలు జరగ్గా, ఏడుసార్లు ఏకగ్రీవం అయ్యాయి.

ఉమ్మడి జిల్లా కేంద్రమైన గుంటూరు నుంచి 86 కి.మీ.. మాచర్ల నుంచి 42 కి.మీ.. మండల కేంద్రం ఉంచి 17 కి.మీ.. హైదరాబాద్ నుంచి 206 కి.మీ దూరంలో ఉన్న ఈ రెడ్డిపాలెం గ్రామానికి సమీప నగరాలుగా వినుకొండ, మాచర్ల, నరసరావుపేట, సత్తెనపల్లి ఉన్నాయి.