రాజమండ్రి మెడికో ప్రియాంక మృతి.. బ్రెయిన్ డెడ్‌గా నిర్ధారించిన వైద్యులు

వైద్యురాలిగా సమాజానికి సేవ చేయాలనే ఎన్నో ఆశలతో చదువుకుంటున్న రాజమండ్రికి చెందిన మెడికో ప్రియాంక విషాదాంతం చెందారు. ఈ నెల 3న రాజమండ్రి నగరంలో జరిగిన ఘోర హిట్‌ అండ్‌ రన్‌ ప్రమాదంలో తీవ్రంగా గాయపడిన ఆమె.. సికింద్రాబాద్‌లోని కిమ్స్‌ ఆసుపత్రిలో చికిత్స పొందుతూ ఆదివారం మధ్యాహ్నం మృతి చెందారు. మధ్యాహ్నం 3:22 గంటలకు ప్రియాంక మృతి చెందినట్లు వైద్యులు అధికారికంగా ప్రకటించారు. ఈ విషాద వార్తతో ఆమె కుటుంబ సభ్యులు, బంధువులు, స్నేహితులు, తోటి విద్యార్థులు తీవ్ర విషాదంలో మునిగిపోయారు.

మూడు సార్లు కారుతో ఢీకొట్టారని ఆరోపణలు

పోలీసులు వెల్లడించిన వివరాల ప్రకారం.. ఈ నెల 3న ప్రియాంక తన స్కూటీపై వెళ్తుండగా కొందరు యువకులు కారుతో ఆమెను ఢీకొట్టారు. ఈ ఘటనలో ప్రియాంక రోడ్డుపై పడిపోయినప్పటికీ.. కారు ఆపకుండా ఆమెపై నుంచి వెళ్లినట్లు ఆరోపణలు ఉన్నాయి. నిందితులు కారుతో ఆమెను మూడు సార్లు ఢీకొట్టినట్లు.. హత్యయాత్నం చేసినట్లు పోలీసుల దర్యాప్తులో వెల్లడైనట్లు ఎస్పీ నరసింహ కిశోర్ తెలిపారు. ఘటనకు సంబంధించి నిందితులపై హత్యాయత్నం కేసు నమోదు చేసినట్లు ఆయన వెల్లడించారు.

తీవ్రంగా గాయపడిన ప్రియాంక

ప్రమాదం తీవ్రత కారణంగా ప్రియాంక తలకు తీవ్ర గాయాలయ్యాయి. వెంటనే స్పందించిన స్థానికులు, పోలీసులు ఆమెను ఆసుపత్రికి తరలించారు. పరిస్థితి విషమంగా ఉండటంతో మెరుగైన వైద్యం కోసం సికింద్రాబాద్‌లోని కిమ్స్‌ ఆసుపత్రికి తరలించారు. అక్కడ అత్యవసర వైద్య విభాగంలోని ప్రత్యేక బృందం ఆమెకు చికిత్స అందించింది. వెంటిలేటర్‌పై ఉంచి అత్యాధునిక వైద్య సేవలు అందించినప్పటికీ.. ఆమె ఆరోగ్య పరిస్థితిలో ఆశించిన స్థాయిలో మెరుగుదల కనిపించలేదు.

చికిత్స కొనసాగుతున్న సమయంలోనే ప్రియాంక మెదడు పనిచేయడం లేదని వైద్యులు బ్రెయిన్‌ డెడ్‌గా నిర్ధారించినట్లు కుటుంబ సభ్యులకు తెలిపారు. అనంతరం ఆమె పరిస్థితి మరింత విషమించడంతో ఆదివారం మధ్యాహ్నం 3:22 గంటలకు మృతి చెందినట్లు వైద్యులు ప్రకటించారు.

కుటుంబంలో తీవ్ర విషాదం

వైద్య విద్యను అభ్యసిస్తున్న ప్రియాంక భవిష్యత్తులో వైద్యురాలిగా ప్రజలకు సేవ చేయాలని ఎన్నో కలలు కన్నారు. అయితే ఇద్దరు యువకులు కారుతో ఢీకొట్టడంతో ఆమె ప్రాణాలు కోల్పోవడంతో ఆ కుటుంబంలో తీవ్ర విషాదం నెలకొంది. కన్న కూతురిని కోల్పోయిన తల్లిదండ్రులు కన్నీరుమున్నీరుగా విలపిస్తున్నారు. ప్రియాంక చదువుకుంటున్న కళాశాలలోనూ విషాద ఛాయలు అలముకున్నాయి. తోటి విద్యార్థులు, అధ్యాపకులు ఆమె మృతిపై దిగ్భ్రాంతి వ్యక్తం చేస్తున్నారు.

నిందితులపై కఠిన చర్యలకు డిమాండ్

ఈ ఘటనపై పోలీసులు కేసు నమోదు చేసి దర్యాప్తు కొనసాగిస్తున్నారు. ప్రమాదానికి కారణమైన వాహనం, అందులో ఉన్న నిందితులపై ఇప్పటికే చర్యలు చేపట్టినట్లు సమాచారం. మద్యం మత్తులో వాహనం నడిపి ఓ వైద్య విద్యార్థిని ప్రాణాలను బలిగొన్న ఘటనపై తీవ్ర ఆగ్రహం వ్యక్తమవుతోంది. నిందితులపై కఠిన చర్యలు తీసుకోవాలని.. ప్రియాంక కుటుంబానికి న్యాయం చేయాలని స్థానికులు, విద్యార్థి సంఘాలు డిమాండ్ చేస్తున్నాయి.

ఓ వైద్యురాలిగా ఎంతోమందికి సేవ చేయాల్సిన ప్రియాంక.. రోడ్డు ప్రమాదంలో అర్ధాంతరంగా కన్నుమూయడం రాజమండ్రితో పాటు తెలుగు రాష్ట్రాల్లో తీవ్ర విషాదాన్ని మిగిల్చింది. ఈ ఘటనలో పూర్తి స్థాయి దర్యాప్తు జరిపి బాధ్యులపై కఠిన చర్యలు తీసుకోవాలని కుటుంబ సభ్యులు, స్థానికులు కోరుతున్నారు.