ఆ మీడియాల్లో కవితపై బ్యాన్.. అసలు విషయం బయటపెట్టేసింది..

తెలంగాణ రాజకీయాల్లో సొంత దారిలో కొత్త పార్టీతో ముందుకు సాగుతున్న కల్వకుంట్ల కవిత చేసిన తాజా వ్యాఖ్యలు తీవ్ర సంచలనం సృష్టిస్తున్నాయి. కేవలం రాజకీయంలోనే కాకుండా.. మీడియా వర్గాల్లోనూ ఇవి పెద్ద ఎత్తున చర్చకు దారితీశాయి. ముఖ్యంగా వైఎస్సార్‌సీపీ అధినేత జగన్ మోహన్ రెడ్డికి చెందిన ‘సాక్షి’ మీడియా తన వార్తలకు ప్రాధాన్యం ఇవ్వడం లేదంటూ కవిత చేసిన తీవ్ర ఆరోపణలు ఇప్పుడు రెండు తెలుగు రాష్ట్రాల్లోనూ హాట్ టాపిక్‌గా మారాయి.

‘సాక్షి’లో స్థానం లేకపోవడానికి ఆ బంధమే కారణమా?

ఓ ప్రముఖ న్యూస్ ఛానెల్‌కు ఇచ్చిన ఇంటర్వ్యూలో కవిత తన ఆవేదనను, ఆక్రోశాన్ని స్పష్టంగా వెళ్లగక్కారు. తాను కొత్త పార్టీని ప్రకటించినప్పటి నుంచి ‘సాక్షి’ మీడియా తనను పూర్తిగా పక్కన పెట్టేసిందని ఆరోపించారు. తాను చేసే ఏ ఒక్క ప్రకటననూ ప్రచురించడం లేదని... కనీసం తన లైవ్ కార్యక్రమాలను కూడా ప్రసారం చేయడానికి నిరాకరిస్తోందని పేర్కొన్నారు.

ఈ వైఖరి వెనుక అసలు రాజకీయ కారణాన్ని కూడా ఆమె బయటపెట్టారు. బీఆర్ఎస్ వర్కింగ్ ప్రెసిడెంట్ కేటీఆర్, జగన్ మోహన్ రెడ్డి మధ్య ఉన్న సన్నిహిత సంబంధాల కారణంగానే తనకు ‘సాక్షి’లో స్థానం దక్కకుండా పోతోందని ఆమె బాహాటంగానే విమర్శించారు. కేటీఆర్‌తో విభేదించి బయటకు వచ్చినందుకే జగన్ మీడియా తనను తొక్కేసే ప్రయత్నం చేస్తోందన్న కోణం ఈ వ్యాఖ్యల్లో స్పష్టంగా కనిపిస్తోంది.

డబ్బుతోనే సోషల్ మీడియా బలం.. గులాబీ పార్టీపై కవిత విమర్శలు

బీఆర్ఎస్ పార్టీ అంతర్గత వ్యవహారాలు, సోషల్ మీడియా నెట్‌వర్క్‌పై కూడా కవిత కీలక సంచలన వ్యాఖ్యలు చేశారు. సోషల్ మీడియాలో బీఆర్ఎస్ చాలా బలంగా కనిపిస్తున్నప్పటికీ... అది క్షేత్రస్థాయిలో ఉన్న వాస్తవ ప్రజాబలం కాదని కొట్టిపారేశారు. పార్టీ భారీగా నిధులు వెచ్చిస్తోంది కాబట్టే సోషల్ మీడియాలో అంత హంగామా కనిపిస్తోందని విమర్శించారు. గణపతి నిమజ్జనం వంటి బహిరంగ వేడుకల్లో కేసీఆర్‌కు అనుకూలంగా వచ్చే నినాదాలు, పాటల వెనుక కూడా భారీగా డబ్బుల ప్రభావం ఉందంటూ సంచలన ఆరోపణలు చేశారు.

అంతేకాకుండా తాను బీఆర్ఎస్‌కు శాశ్వతంగా దూరమయ్యానని, మళ్లీ గులాబీ గూటికి వెళ్లే ప్రసక్తే లేదని తేల్చిచెప్పడం ద్వారా కల్వకుంట్ల కుటుంబంలో ఏర్పడిన రాజకీయం, వ్యక్తిగత పూడ్చలేని విభేదాలను ఆమె మరోసారి బహిర్గతం చేశారు.

నాడు కుట్రలంటూ ఖండన.. నేడు అదే వేదికపై ఇంటర్వ్యూలు

కవిత రాజకీయ ప్రయాణంలో వచ్చిన మార్పును విశ్లేషకులు ఆసక్తికరంగా గమనిస్తున్నారు. గతంలో కవిత బీఆర్ఎస్ వీడి కొత్త పార్టీ పెడతారంటూ కొన్ని మీడియా సంస్థలు కథనాలు ప్రసారం చేసినప్పుడు ఆమె తీవ్రంగా విరుచుకుపడ్డారు. ఆ వార్తలను సోషల్ మీడియాలో షేర్ చేస్తూ.. తనపై జరుగుతున్న కుట్రగా కొట్టిపారేశారు. అయితే కాలం మారడంతో రాజకీయ సమీకరణాలూ మారాయి. నాడు ఏ మీడియా సంస్థ కథనాలను అయితే ఆమె ఖండించారో.. నేడు అదే సంస్థ వేదికగా సుదీర్ఘ ఇంటర్వ్యూలు ఇవ్వడం, వారి పత్రికల్లో ప్రకటనలు ఇస్తుండటం గమనార్హం. దీంతో రాజకీయాల్లో శాశ్వత మిత్రులు, శత్రువులు ఉండరనే నానుడికి అద్దం పడుతోంది.

మీడియా పక్షపాతంపై మొదలైన కొత్త చర్చ

ఒక తెలంగాణ కీలక నేతగా, కొత్త పార్టీని స్థాపించి ప్రజా క్షేత్రంలోకి వెళ్తున్న మహిళా నాయకురాలి వార్తలకు ప్రాధాన్యం ఇవ్వకపోవడంపై మీడియా వైఖరిపైనే కొత్త ప్రశ్నలు ఉత్పన్నమవుతున్నాయి. రాజకీయ నాయకుల వ్యక్తిగత సత్సంబంధాలు, వ్యాపార-మీడియా ప్రయోజనాలను ప్రభావితం చేస్తున్నాయా అనే కోణంలో చర్చలు జరుగుతున్నాయి.

అయితే కవిత వ్యాఖ్యలు కేవలం ఒక రాజకీయ నాయకురాలిగా ఆమె చేసిన ఆరోపణలు మాత్రమేనని.. దీనిపై సదరు మీడియా సంస్థ వైఖరి ఏమిటనేది కూడా పరిగణనలోకి తీసుకోవాల్సి ఉంటుందని రాజకీయ విశ్లేషకులు భావిస్తున్నారు. ఏది ఏమైనా.. కేటీఆర్, జగన్ బంధంపై కవిత చేసిన కామెంట్స్ రాబోయే రోజుల్లో తెలంగాణ పొలిటికల్ హీట్‌ను మరింత పెంచడం ఖాయంగా కనిపిస్తోంది.