భారత్‌లోనే సంచలనం.. ఈ నగరంలో ఒక్క బిచ్చగాడు కూడా లేడంట!

మన దేశంలో చాలా నగరాల్లో రోడ్ల మీద, గుళ్ల దగ్గర, సిగ్నల్స్ దగ్గర బిచ్చగాళ్లు కనిపిస్తుంటారు. కానీ మధ్యప్రదేశ్‌లోని ఇండోర్ మాత్రం వీళ్లందరికీ షాకిచ్చింది. దేశంలోనే మొట్టమొదటి బిచ్చగాళ్లు లేని నగరంగా మారిపోయిందట. ఇది ఎవరో చెప్పిన మాట కాదు.. స్వయంగా అక్కడి అధికారులే చెప్పారు. ఏడాది కిందట ఇండోర్ వీధుల్లో దాదాపు 5 వేల మంది బిచ్చగాళ్లు ఉండేవారని వాళ్లు గుర్తు చేస్తున్నారు.

ఇండోర్ జిల్లా కలెక్టర్ ఆశిష్ సింగ్ మాట్లాడుతూ.. "మా ఇండోర్ ఇప్పుడు ఇండియాలోనే నంబర్ వన్. ఇక్కడ ఒక్క బిచ్చగాడు కూడా లేడు!" అని తెలిపారు. నగరంలో ఉన్న బిచ్చగాళ్లందరికీ ఉద్యోగాలు ఇప్పించామని, వాళ్లకు మంచిగా ఉండేందుకు ఇళ్లు ఏర్పాటు చేశామని, ఇక బిచ్చమెత్తుకుంటున్న పిల్లలనైతే బడిలో చేర్పించామని ఆయన చెప్పారు. బిచ్చాటనను పూర్తిగా తరిమికొట్టడానికి తాము చాలా కష్టపడ్డామని ఆయన అన్నారు. ఈ మంచి పనిని కేంద్ర ప్రభుత్వం, వరల్డ్ బ్యాంక్ టీమ్ కూడా మెచ్చుకున్నారట. అంతేకాదు, దేశంలో బిచ్చాటనను ఆపేయడానికి కేంద్ర ప్రభుత్వం మొదలుపెట్టిన పైలట్ ప్రాజెక్ట్‌లో ఇండోర్ కూడా ఒకటని ఆయన గర్వంగా చెప్పారు.

ఇంకో పెద్దాయన అయితే ఒక సూపర్ ఆఫర్ ప్రకటించారు. ఎవరైనా బిచ్చగాళ్ల గురించి సమాచారం ఇస్తే వాళ్లకు వెంటనే రూ. 1,000 బహుమతి ఇస్తారట. ఇప్పటికే చాలా మందికి ఈ బహుమతి ఇచ్చేశారట. ఈ విషయం గురించి మహిళా, శిశు అభివృద్ధి శాఖ అధికారి రామ్ నివాస్ బుధోలియా మాట్లాడుతూ.. బిచ్చగాళ్లకు వ్యతిరేకంగా స్పెషల్ డ్రైవ్ ఫిబ్రవరి 2024 లోనే మొదలుపెట్టామని చెప్పారు. అప్పుడు నగరంలో దాదాపు 5 వేల మంది బిచ్చగాళ్లు ఉండేవారని, అందులో 500 మంది పిల్లలు కూడా ఉన్నారని ఆయన తెలిపారు. బిచ్చాటనను ఆపేయడంలో భాగంగా ఫస్ట్ అందరికీ దాని గురించి అవగాహన కల్పించామని చెప్పారు. రాజస్థాన్ నుంచి కూడా చాలా మంది ఇండోర్‌కు బిచ్చమెత్తుకోవడానికి వస్తుంటారని తాము గుర్తించామని ఆయన అన్నారు. ఇండోర్‌లో బిచ్చమెత్తుకోవడం, బిచ్చగాళ్లకు డబ్బు ఇవ్వడం రెండూ నేరమని ఆయన గట్టిగా చెప్పారు. ఈ రూల్స్ తప్పిన వాళ్ల మీద ఇప్పటివరకు మూడు కేసులు కూడా పెట్టామని ఆయన గుర్తు చేశారు.

మొత్తానికి ఇండోర్ సిటీ మాత్రం సూపర్ కదా.. దేశంలోనే ఫస్ట్ బిచ్చగాళ్లు లేని నగరంగా నిలవడం అంటే మామూలు విషయం కాదు. అక్కడి అధికారులు చాలా కష్టపడితేనే ఇది సాధ్యమైంది.