విదేశీ కలల వెనుక విషాదం.. కెనడాలో భారత విద్యార్థిని దారుణ హత్య!

విదేశాల్లో ఉన్నత చదువులు చదవాలి.. మంచి ఉద్యోగం సంపాదించాలి.. కుటుంబానికి మెరుగైన భవిష్యత్తును అందించాలి.. ఇవే కలలతో ప్రతి ఏటా వేలాది మంది భారతీయ యువతీ యువకులు అమెరికా, కెనడా వంటి దేశాలకు పయనమవుతున్నారు. అయితే ఆ రంగుల కలల వెనుక దాగి ఉన్న చీకటి కోణాలు, ఊహించని ప్రమాదాలు మరోసారి వెలుగులోకి వచ్చాయి. కెనడాలో చదువుకుంటున్న 22 ఏళ్ల భారతీయ విద్యార్థిని విదీ కల్పేష్‌భాయ్ మేఘానీ దారుణ హత్యకు గురైన ఘటన ప్రస్తుతం దేశవ్యాప్తంగా తీవ్ర విషాదాన్ని, ఆందోళనను నింపింది.

అసలేం జరిగింది?

గుజరాత్‌లోని ఆనంద్ జిల్లా బోర్సాద్ గ్రామానికి చెందిన విదీ మేఘానీ, గత నాలుగేళ్లుగా కెనడాలో ఉంటూ ఉన్నత విద్యను అభ్యసిస్తోంది. అటు చదువుకుంటూనే, ఇటు తన ఖర్చుల కోసం పార్ట్‌టైమ్ ఉద్యోగం చేస్తూ భవిష్యత్తు కోసం ఎంతో కష్టపడుతోంది. అయితే మే 15న జరిగిన ఒక దారుణ దోపిడీ యత్నంలో గుర్తుతెలియని దుండగుడు ఆమెపై కత్తితో విచక్షణారహితంగా దాడి చేశాడు. ఈ ఘోర దాడిలో తీవ్రంగా గాయపడిన విదీ అక్కడికక్కడే ప్రాణాలు కోల్పోయింది.

ఆలస్యంగా వెలుగులోకి వచ్చిన విషాదం

ఈ ఘటనలో మరింత హృదయ విదారకమైన విషయం ఏమిటంటే.. విదీ మరణించిన వార్త ఆమె కుటుంబ సభ్యులకు వెంటనే తెలియలేదు.

మే 14l విదీ చివరిసారిగా తన కుటుంబంతో మాట్లాడింది. ఆ తర్వాత కుమార్తె నుంచి ఎలాంటి ఫోన్ కాల్స్ గానీ, మెసేజ్‌లు గానీ రాకపోవడంతో స్వదేశంలో ఉన్న తల్లిదండ్రులు తీవ్ర ఆందోళనకు గురయ్యారు.కొన్ని రోజుల తర్వాత కెనడా అధికారుల నుంచి ఆమె మరణవార్త కుటుంబానికి చేరింది. అప్పటివరకు కూతురు క్షేమంగానే ఉందనుకున్న ఆ తల్లిదండ్రులకు ఈ వార్త కోలుకోలేని దెబ్బ తీసింది."ఒక కుటుంబం ఎన్నో ఆశలు, ఆశయాలతో విదేశాలకు పంపిన కుమార్తె.. ఇలా తిరిగి శవంగా స్వదేశానికి రావాల్సి రావడం అత్యంత హృదయ విదారకం." అని వారు వాపోయారు.

విదేశాల్లో విద్యార్థుల భద్రతపై పెరుగుతున్న ఆందోళనలు

ఇటీవలి కాలంలో అమెరికా, కెనడా వంటి దేశాల్లో భారతీయ విద్యార్థులను లక్ష్యంగా చేసుకుని జరుగుతున్న దాడులు ఆందోళనకరంగా మారుతున్నాయి.

కేంద్ర ప్రభుత్వానికి కుటుంబం విన్నపం

ప్రస్తుతం కన్నీరుమున్నీరవుతున్న విదీ మేఘానీ కుటుంబం.. తమ కుమార్తె మృతదేహాన్ని వీలైనంత త్వరగా భారత్‌కు రప్పించేలా చర్యలు తీసుకోవాలని కేంద్ర ప్రభుత్వాన్ని, విదేశాంగ శాఖను వేడుకుంటోంది.

ఈ ఘటన విదేశాల్లో ఉన్న లక్షలాది మంది భారతీయ విద్యార్థుల భద్రతపై మరోసారి అనేక ప్రశ్నలను లేవనెత్తింది. అంతర్జాతీయంగా భారతీయుల రక్షణ కోసం కేంద్ర ప్రభుత్వం స్థానిక దేశాలతో మాట్లాడి మరింత కఠినమైన భద్రతా చర్యలు తీసుకోవాల్సిన అవసరం ఎంతైనా ఉందని నిపుణులు అభిప్రాయపడుతున్నారు.