లైఫ్‌లో సెటిల్ అవ్వడమే కాదు.. నచ్చినట్లు బతకడమే ముఖ్యం! జెన్ జీ కొత్త ట్రెండ్ ఇదే!
| ఒకప్పుడు ఉద్యోగం, సొంత ఇల్లు, పెళ్లి, పిల్లలనే జీవితంలో స్థిరపడటానికి గుర్తులుగా భావించేవారు. కానీ జెన్ జీ తరం ఈ సంప్రదాయ ఆలోచనలకు భిన్నంగా తమకు నచ్చినట్లు జీవించేందుకు ప్రాధాన్యత ఇస్తోంది. ఈ మార్పును ‘లిక్విడ్ అడల్ట్‌హుడ్’ అంటున్నారు. డెలాయిట్ 2026 సర్వే ప్రకారం, ఆర్థిక ఒత్తిళ్ల కారణంగా 55 శాతం మంది జెన్ జీ యువత పెళ్లి, కుటుంబం, వ్యాపారం వంటి కీలక నిర్ణయాలను వాయిదా వేస్తున్నారు. వ్యక్తిగత స్వేచ్ఛ, సంతోషానికే ప్రాధాన్యత ఇస్తున్నారు.
ఒకప్పుడు మంచి ఉద్యోగం, సొంత ఇల్లు, పెళ్లి, పిల్లలు.. ఇవే జీవితంలో స్థిరపడటానికి గుర్తులుగా భావించేవారు. కానీ నేటి జెన్ జీ తరం ఆలోచనలు మారుతున్నాయి. సంప్రదాయ జీవిత లక్ష్యాలను అనుసరించడం కంటే తమకు నచ్చినట్లు జీవించడానికి ప్రాధాన్యత ఇస్తోంది. ఈ కొత్త జీవన విధానాన్నే ‘లిక్విడ్ అడల్ట్‌హుడ్’ అంటున్నారు.
ప్రస్తుత యువతకు ఆర్థికంగా స్థిరపడటం అంత సులభంగా లేదు. పెరుగుతున్న ఇంటి అద్దెలు, ఆస్తుల ధరలు, ఉద్యోగ అనిశ్చితి, జీవన వ్యయాలు వారి నిర్ణయాలను ప్రభావితం చేస్తున్నాయి. మంచి జీతం ఉన్నప్పటికీ సొంత ఇల్లు కొనడం కష్టంగా మారడంతో చాలామంది అద్దె ఇళ్లలో లేదా కుటుంబంతో కలిసి ఉంటున్నారు.
ఉద్యోగాల విషయంలోనూ జెన్ జీ భిన్నంగా ఆలోచిస్తోంది. ఒకే సంస్థలో జీవితాంతం పనిచేయడం కంటే మెరుగైన అవకాశాలు, మంచి జీతం, పని-వ్యక్తిగత జీవితం మధ్య సమతుల్యతకు ప్రాధాన్యత ఇస్తోంది. ఫ్రీలాన్సింగ్, రిమోట్ వర్క్, సొంత వ్యాపారాల వైపు ఆసక్తి చూపుతోంది.
వివాహం విషయంలోనూ నిర్దిష్ట వయసులోనే పెళ్లి చేసుకోవాలనే ఆలోచన తగ్గుతోంది. కెరీర్, ఆర్థిక స్వాతంత్ర్యం, వ్యక్తిగత స్వేచ్ఛకు అనుగుణంగా నిర్ణయాలు తీసుకుంటున్నారు. కొందరు ఒంటరిగా జీవించడానికి ఇష్టపడుతుంటే, మరికొందరు సంప్రదాయ హద్దులు లేని సంబంధాలను ఎంచుకుంటున్నారు. వీటినే ‘సిట్యుయేషన్‌షిప్స్’ అంటారు.
సోషల్ మీడియా, డేటింగ్ యాప్స్, డిజిటల్ ప్రపంచం కూడా ఈ మార్పులకు కొంతవరకు కారణమవుతున్నాయి. అయితే ఇది బాధ్యతలను వదిలేయడం కాదు. డెలాయిట్ 2026 సర్వే ప్రకారం, ఆర్థిక ఒత్తిళ్ల కారణంగా జెన్ జీ యువతలో 55 శాతం మంది పెళ్లి, కుటుంబం, వ్యాపారం వంటి నిర్ణయాలను వాయిదా వేస్తున్నారు.
మొత్తానికి ‘లిక్విడ్ అడల్ట్‌హుడ్’ అనేది జీవితంలో స్థిరత్వాన్ని తిరస్కరించడం కాదు.. తమకు నచ్చిన మార్గంలో దాన్ని సాధించుకోవడం. కొత్త తరం దృష్టిలో విజయానికి సొంత ఇల్లు, ఉద్యోగం, పెళ్లి మాత్రమే కొలమానాలు కావు. వ్యక్తిగత సంతోషం, స్వేచ్ఛ కూడా అంతే ముఖ్యం.