సిగరెట్ లైటర్ సైజులో చైనా ఫోన్లు.. జైళ్లలో ఖైదీల డిజిటల్ దందా!

ఫ్రాన్స్‌లోని జైళ్లు నేరగాళ్లకు అడ్డాగా మారిపోయాయి. రికార్డుల కోసం తయారు చేసిన ఫోన్లు కాదు.. నిజంగానే పనిచేసే బుల్లి ఫోన్లు ఖైదీల చేతుల్లో విచ్చలవిడిగా రాజ్యమేలుతున్నాయి. ఈ చిన్న ఫోన్లను అడ్డం పెట్టుకుని జైలు నుంచే డ్రగ్ డీల్స్, కాంట్రాక్ట్ హత్యలు వంటి దందాలు యథేచ్ఛగా జరిగిపోతున్నాయి. ఈ వ్యవహారంపై కొన్నాళ్లుగా తీవ్ర విమర్శలు వెల్లువెత్తుతున్నాయి.

ఫ్రెంచ్ జైళ్లలో నిబంధనలు గాలికొదిలేసినంతగా అరాచకం పెరిగిపోయిందని ప్రజలు మండిపడుతున్నారు. దీనిపై ప్రభుత్వంపై ఒత్తిడి పెరగడంతో, జైళ్లలో ఫోన్ల వాడకంపై అధికారులు కఠిన చర్యలకు ఉపక్రమించారు. దీనిలో భాగంగా ప్రిజన్ బ్రేక్ పేరిట మంగళవారం దేశవ్యాప్తంగా ఒకేసారి 66 జైళ్లలో భారీ తనిఖీ ఆపరేషన్ నిర్వహించారు.

ఈ తనిఖీల్లో కరడుగట్టిన ఖైదీల వద్ద వేలాదిగా బుల్లి ఫోన్లు దొరకడంతో అధికారులు విస్తుపోయారు. కేవలం సిగరెట్ లైటర్ సైజులో ఉండే ఈ ఫోన్లన్నీ చైనా తయారీవేనని విచారణలో తేలింది. వీటిని ఆపోరిక్ (Aporic) అనే ఫ్రెంచ్ కంపెనీ విక్రయిస్తోంది. ఆశ్చర్యకరంగా, ఈ ఫోన్లు జైళ్లలో చేసే ఎలాంటి ఎలక్ట్రానిక్ తనిఖీలకు చిక్కవని తమ వెబ్‌సైట్‌లో బహిరంగంగా ప్రచారం చేసుకోవడం మరింత ఆందోళన కలిగించింది. దీంతో ప్రభుత్వం సదరు కంపెనీని బ్లాక్‌లిస్టులో పెట్టింది.

జైళ్లలో సెల్ ఫోన్ల వాడకం అనేది కేవలం ఫ్రాన్స్‌కే పరిమితం కాదు. ప్రపంచవ్యాప్తంగా అనేక దేశాల్లో ఇది పెద్ద సమస్యగా మారింది. చిన్న సైజులో ఉండటం, సులభంగా దాచి పెట్టడానికి వీలుగా ఉండటం వల్ల ఇలాంటి ఫోన్లు జైళ్లలోకి అక్రమంగా ప్రవేశిస్తున్నాయి. ఇవి ఖైదీలు బయటి ప్రపంచంతో సంబంధాలు పెట్టుకోవడానికి, నేర కార్యకలాపాలను కొనసాగించడానికి వీలు కల్పిస్తున్నాయి. ఈ సంఘటనతో ఫ్రాన్స్ ప్రభుత్వం జైళ్ల భద్రతను పటిష్టం చేయడానికి, ఇలాంటి అక్రమ కార్యకలాపాలను అరికట్టడానికి మరింత కఠిన చర్యలు తీసుకోవాల్సిన అవసరం స్పష్టమైంది. జైళ్లలో భద్రతా లోపాలు ఇలాగే కొనసాగితే, నేరగాళ్లు అక్కడి నుంచే తమ సామ్రాజ్యాన్ని ఎలా విస్తరించగలరో ఆలోచించాల్సిన సమయం ఆసన్నమైంది.