లైవ్ లో మిడిల్ ఫింగర్... సారీ చెప్పిన యాంకరమ్మ!

టీవీ లైవ్‌ లలో యాంకర్లు అలెర్ట్‌ గా లేకపోతే అప్పుడప్పుడూ మిస్టేక్ జరుగుతూ ఉంటాయి. అనంతరం అవి బయటకు వచ్చిన తర్వాత వైరల్ అవుతుంటాయి. రికార్డెడ్ షోలో అయితే ఎన్ని టేక్ లైనా తీస్కోవచ్చు, ఎన్ని మిస్టేక్స్ అయినా చేసి కరెక్ట్ చేసుకోవచ్చు. కానీ... లైవ్ లో వీలైనంత ఎక్కువ కేర్ తీసుకోవాలి.. పూర్తి స్పృహలో ఉండాలి. తాజాగా బీబీసీ న్యూస్ యాంకర్ లైవ్ టీవీలో అసభ్యకరంగా సైగ చేసి కెమెరా కంటికి చిక్కుకుంది.

అవును... తాజాగా బీబీసీ న్యూస్ యాంకర్.. లైవ్‌ లో మధ్య వేలును చూపిస్తూ వార్తల్లో నిలిచారు. దీనికి సంబంధించిన వీడియో సోషల్ మీడియాలో వైరల్ అయ్యింది. మధ్య వేలు చూపించిన విజువల్ రెప్పపాటులో స్క్రీన్‌ పై కనిపించింది. దాంతో విపరీతమైన ట్రోలింగ్స్ మొదలైపోయాయి. సోషల్ మీడియా వేదికగా ఆమెను నెటిజన్లు ఒక ఆటాడుకున్నారు. దీంతో... లైవ్ లో మిస్టేక్ చేసిన ఆ యాంకరమ్మ.. సోషల్ మీడియాలో సారీ చెప్పారు.

వివరాళ్లోకి వెళ్తే... బీబీసీ చీఫ్ ప్రెజెంటర్ అయిన మర్యం మోషిరి... మధ్యాహ్నం వార్తలకు రెడీ అవుతున్నారు. ఈ సమయంలో లైవ్‌ కి కౌంట్ డౌన్ ప్రారంభమై సున్నాకి చేరుకోవడంతో స్క్రీన్‌ పై ఆమె తన మధ్య వేలును చూపించారు. అనంతరం విషయం అర్ధమై వెంటనే తేరుకుని వార్తలు చదవడం ప్రారంభించారు. ఇందులో భాగంగా... "లైప్ ఫ్రం లండన్.. కరోనా సమయంలో యూకే పడ్డ ఇబ్బందులు, జరిగిన నష్టానికి బ్రిటీష్ మాజీ ప్రధాన మంత్రి బోరిస్ క్షమాపణలు చెప్పారు" అని న్యూస్ చదవడం మొదలుపెట్టారు.

అయితే ఆమె ఇలా కవర్ చేయాలని ప్రయత్నించారో ఏమో కానీ... ఈ లోపు క్రిస్ రోస్ అనే ట్విట్టర్ యూజర్ ఆ వీడియో షేర్ చేశారు. దీంతో ఒక్కసారిగా ఆ వీడియో వైరల్ అయ్యింది. ఈ వీడియోపై మోషిరి వివరణ ఇవ్వక తప్పలేదు. ఈ మేరకు ఆమె ట్విట్టర్ లో తన వివరణను, క్షమాపణను రాసుకొచ్చారు.

ఇందులో భాగంగా... "అందరికీ హాయ్.. డైరెక్టర్ 10-0 నుండి కౌంట్ డౌట్ స్టార్ చేయడంతో నేను నా చేతి వేళ్లతో నెంబర్ చూపిస్తున్నట్లు నటిస్తున్నాను. ఈ సమయంలో సున్నాకంటే ముందు నంబర్ 1 కి చేరుకున్నప్పుడు నేను జోక్‌ గా వేలును చూపించాను.. అది కెమెరాలో చిక్కుకుంటుందని అనుకోలేదు. ఇది టీం తో జరిగిన ఒక జోక్ మాత్రమే. అయితే లైవ్ లో ప్రసారం అయినందుకు క్షమించండి" అని తెలిపారు.