శానిటరీ ప్యాడ్ అడిగితే నేరమా.. మహిళా నేత 8,000 బెదిరింపులు

ఒక వైపు జపాన్ రాజకీయాల్లో మహిళా నాయకుల పాత్ర పెరుగుతుంది. మరో వైపు అలా వెళ్లిన వారికి కష్టాలు తప్పడం లేదు. జపనీస్ కమ్యూనిస్ట్ పార్టీకి చెందిన 27 ఏళ్ల యువ నాయకురాలు అయాకా యోషిదానే తాజా ఉదాహరణ. ఆమె కేవలం ఒక విజ్ఞప్తి చేసినందుకు 8,000 కంటే ఎక్కువ మంది నుండి ప్రాణహాని బెదిరింపులు అందుకుంది. అయాకా బహిరంగ మరుగుదొడ్లలో ఉచిత శానిటరీ నాప్‌కిన్‌లను ఏర్పాటు చేయాలని కోరింది. ఈ విజ్ఞప్తి ఆమెకు భయం, మానసిక ఒత్తిడికి కారణమైంది.

ఈ సంఘటన మార్చి 25న జరిగింది. అయాకా యోషిదా సోషల్ మీడియా ప్లాట్‌ఫాం ఎక్స్ (గతంలో ట్విట్టర్)లో తనకు అకస్మాత్తుగా పీరియడ్స్ మొదలయ్యాయని, త్సు సిటీ హాల్ టాయిలెట్‌లో శానిటరీ నాప్‌కిన్ సౌకర్యం లేదని రాసింది. 27 ఏళ్ల వయస్సులో కూడా ఇలాంటి పరిస్థితి ఎదురుకావచ్చని, అందుకే టాయిలెట్ పేపర్‌లాగే శానిటరీ నాప్‌కిన్‌లు కూడా ప్రతిచోటా అందుబాటులో ఉండాలని ఆమె అభిప్రాయపడింది. ఆమె చేసిన ఈ వ్యాఖ్య సమంజసంగా ఉన్నప్పటికీ, కొంతమంది మితవాదులకు ఇది నచ్చలేదు.

ఈ వ్యాఖ్య చేసిన కొద్ది రోజులకే, మీ ప్రావిన్స్ అసెంబ్లీకి మార్చి 28 నుండి నిరంతరం ఇమెయిల్ ద్వారా ప్రాణహాని బెదిరింపులు రావడం మొదలయ్యాయి. జపాన్‌కు చెందిన మైనిచి వార్తాపత్రిక ప్రకారం, ఈ బెదిరింపులన్నీ ఒకే ఇమెయిల్ చిరునామా నుండి వచ్చాయి . అన్నింటిలోనూ ఒకే భాష ఉపయోగించారు. "ఇంత పెద్దదైనప్పటికీ ఎమర్జెన్సీ నాప్‌కిన్ తీసుకెళ్లని అయాకా యోషిదాను నేను చంపేస్తాను!" అని ఆ బెదిరింపుల్లో ఉంది.

అయాకా మార్చి 31న సోషల్ మీడియాలో తనకు 8,000 కంటే ఎక్కువ బెదిరింపులు వచ్చాయని.. వాటితో తాను భయపడుతున్నానని పోస్ట్ చేసింది. ఈ బెదిరింపులు తనను మౌనంగా ఉంచడానికి, తన రాజకీయ కార్యకలాపాలను అడ్డుకోవడానికి చేసే ప్రయత్నంగా చూడాలని ఆమె పేర్కొంది. ఆమె పోలీసులకు ఫిర్యాదు చేసింది.పోలీసులు విచారణ ప్రారంభించారు.

హిరోషిమా విశ్వవిద్యాలయంలోని సోషియాలజీ అసోసియేట్ ప్రొఫెసర్ చిసాటో కితానాకా ఈ విషయంపై ఆందోళన వ్యక్తం చేశారు. జపాన్‌లో మహిళా నాయకులను లేదా బహిరంగ వేదికలపై మాట్లాడే మహిళలను నిరంతరం లక్ష్యంగా చేసుకుంటున్నారని ఆమె అన్నారు. పనిచేసే తల్లులకు మద్దతు గురించి మాట్లాడినా లేదా గృహ హింస వంటి తీవ్రమైన సమస్యల గురించి మాట్లాడినా, ప్రతిసారీ మహిళలు బెదిరింపులు, ట్రోలింగ్‌ను ఎదుర్కోవలసి వస్తుందని ఆమె ఆవేదన వ్యక్తం చేశారు.