కొత్త ఫోన్, ఎవరు మాట్లాడేది? నిహారిక జోష్ చూసారా!

న‌టిగా.. యాంక‌ర్ గా.. నిర్మాత‌గా ఆల్ రౌండ‌ర్ ప‌నిత‌నం చూపించిన నిహారిక ఇటీవ‌లి కాలంలో సోష‌ల్ మీడియాల్లోను జోరుమీద ఉన్నారు. మెగా ప్రిన్సెస్ నిరంత‌ర ఫోటోషూట్లు ఇంట‌ర్నెట్ లో వైర‌ల్ గా మారుతున్నాయి. తాజాగా కొత్త ఫోటోలను షేర్ చేస్తూ నిహారిక `కొత్త ఫోన్, ఎవరు మాట్లాడేది?` అంటూ సరదా క్యాప్షన్‌ను జోడించారు. ఈ స్టైలిష్ లుక్ కోసం పనిచేసిన డిజైనర్లు, స్టైలిస్టులు, ఫోటోగ్రాఫర్లకు ధన్యవాదాలు తెలుపుతూ పెట్టిన‌ పోస్ట్‌కి కొన్ని గంటల్లోనే వేల సంఖ్యలో లైక్‌లు, కామెంట్లు వచ్చిపడ్డాయి. అభిమానులు ఈ ఫోటోలపై రకరకాల కామెంట్లతో తమ అభిమానాన్ని చాటుకున్నారు. కొందరు `యువరాణి` అని కొనియాడగా... మరికొందరు `అందం ఓవర్‌లోడ్ అయింది` అంటూ ప్రశంసల వర్షం కురిపించారు. ఒక అభిమాని సూపర్ మార్కెట్‌లోని మెరిసే కూరగాయలతో పోలుస్తూ చేసిన సరదా కామెంట్ అందరి దృష్టినీ ఆకర్షించింది.

కేవలం అభిమానులే కాకుండా, సినీ రంగానికి చెందిన వర్ధమాన రచయితలు, దర్శకులు కూడా ఈ పోస్ట్ ద్వారా నిహారిక దృష్టిని ఆకర్షించే ప్రయత్నం చేశారు. నిహారిక సొంతంగా బ్యానర్ స్థాపించి నిర్మాణం వైపు అడుగులు వేయడంతో చాలామంది యంగ్ టాలెంట్స్ తమ వద్ద ఉన్న విభిన్నమైన కథలను వివరణాత్మక కామెంట్ల ద్వారా షేర్ చేస్తూ త‌మ‌కు ఒక‌ అవకాశం ఇవ్వాలని కోరారు.

మొత్తానికి నటిగా, నిర్మాత‌గా తన ప్రయాణాన్ని విజయవంతంగా కొనసాగిస్తున్న నిహారిక, ఇలాంటి గ్లామరస్ ఫోటోషూట్‌లతో అభిమానులకు నిరంతరం టచ్‌లో ఉంటోంది. జాతీయ స్థాయిలో గుర్తింపు పొందిన ప్రాజెక్ట్‌లతో దూసుకుపోతున్న ఈ యంగ్ బ్యూటీ.. అటు గ్లామర్ పరంగానూ...ఇటు ప్రొడక్షన్ పరంగానూ ఇండస్ట్రీలో తన మార్కును స్పష్టంగా చూపిస్తోంది.

పింక్ ఎలిఫెంట్ పిక్చర్స్ బ్యానర్‌పై నిహారిక కొణిదెల నిర్మించిన `కమిటీ కుర్రోళ్లు` చిత్రం జాతీయ అవార్డుల‌లో `ఉత్తమ తెలుగు చిత్రం`తో పాటు `బెస్ట్ మేకప్` విభాగంలో అవార్డులను కైవసం చేసుకోవడం స‌రికొత్త ఉత్సాహాన్ని నింపిన సంగ‌తి తెలిసిందే. ఈ జాతీయ పురస్కార గుర్తింపుపై తీవ్ర భావోద్వేగానికి లోనైన నిహారిక.. సినీ పరిశ్రమలో ఎంతో పాపులారిటీ ఉన్న‌ మెగా కుటుంబ వారసత్వంలో తనకంటూ ఒక ప్రత్యేక గుర్తింపును, స్వతంత్ర స్థానాన్ని సంపాదించుకున్నాననే నమ్మకం ఈ విజయం ద్వారానే తనకు లభించిందని సంతోషం వ్యక్తం చేశారు. నటనతో పాటు నిర్మాణ రంగానికి వచ్చిన తాను... సరైన కథలను ఎంచుకుంటే జాతీయ స్థాయి గౌరవాన్ని కూడా అందుకోగలననే బలమైన ఆత్మవిశ్వాసాన్ని ఈ చిత్రం అందించింది.

తొలి యత్నంలోనే జాతీయ అవార్డును అందుకోవడంతో నిర్మాతగా నిహారికపై బాధ్యత మరింత పెరిగింది. స్టార్ క్యాస్టింగ్ కంటే కూడా కథా బలం, కొత్త‌త‌రంలో ప్ర‌తిభావంతులై నటీనటులు, దర్శకులను ప్రోత్సహించే దిశగానే నిహారిక‌ తన త‌దుప‌రి ప్రాజెక్టులను నిర్మించాలని నిర్ణయించుకున్నారు. కంటెంట్ ఆధారిత చిత్రాల ద్వారా ప్రేక్షకులను అలరించడమే కాకుండా... నమ్మకమైన కథలతో పాటు స్థానిక కళాకారులకు వెండితెరపై అవకాశాలు ఇవ్వడమే తన తదుపరి లక్ష్యమని నిహారిక స్పష్టం చేశారు.

ఈ క్రమంలోనే నిహారిక కొణిదెల తన సొంత బ్యాన‌ర్ లో `రాకాస` అనే ఫాంటసీ-కామెడీ చిత్రాన్ని నిర్మించారు. సంగీత్ శోభన్, నయన్ సారిక ప్ర‌ధాన పాత్ర‌ల్లో న‌టించ‌గా, పింక్ ఎలిఫెంట్ పిక్చర్స్ బ్యానర్‌పై మానస శర్మ దర్శకత్వంలో దీనిని నిర్మించారు. 2026 ప్రథమార్థంలో విడుదలైన ఈ చిత్రం బాక్సాఫీస్ వద్ద మంచి విజయాన్ని సాధించడమే కాకుండా.. ఒక నిర్మాతగా బాధ్యతాయుతమైన ప్రణాళికను చాటిచెప్పింది. నిర్మాతగా స‌క్సెస్ అందుకుంటూనే... 2026లో నటిగా కూడా తమిళ చిత్రం `మద్రాస్ కారన్`తో పాటు తెలుగులో కథా ప్రాధాన్యత కలిగిన ప్రాజెక్టులలో నటిస్తూ నిహారిక రెండు వైపులా తన ప్రయాణాన్ని విజయవంతంగా కొనసాగిస్తున్నారు.