బండ్ల గణేష్ ఇంట్లో పెళ్లి బాజాలు.. పెద్దింటికి కోడలిగా జనని బండ్ల!

సినీ పరిశ్రమలో నటుడిగా, నిర్మాతగా తనకంటూ ఒక ప్రత్యేక గుర్తింపు తెచ్చుకున్న బండ్ల గణేష్ ఇంట్లో ఇప్పుడు పండగ వాతావరణం నెలకొంది. ఆయన గారాల పట్టి జనని బండ్ల వివాహం త్వరలోనే జరగబోతోంది. ఈ వేడుకకు సంబంధించి మొదటి అడుగు పడింది. పెళ్లి పనులు అధికారికంగా మొదలయ్యాయి. బండ్ల కుటుంబం అత్యంత వైభవంగా ఈ వివాహ వేడుకను నిర్వహించేందుకు సిద్ధమవుతోంది. ఇప్పటికే దీనికి సంబంధించిన మాట మంతి పూర్తి కావడంతో కుటుంబ సభ్యులందరూ సంబరాల్లో మునిగిపోయారు.

తాజాగా జనని బండ్ల, సూర్యతేజ చిలుకూరిల వివాహానికి సంబంధించి ‘పసుపు కుంకుమ’ కార్యక్రమాన్ని నిర్వహించారు. సంప్రదాయం ప్రకారం పెళ్లి పనులకు శ్రీకారం చుట్టే ఈ వేడుకను బండ్ల గణేష్ నివాసంలో ఆత్మీయుల సమక్షంలో జరిపారు. ఈ కార్యక్రమంతో బండ్ల గణేష్ కుమార్తె పెళ్లి ఫిక్స్ అయ్యిందనే విషయం అందరికి తెలిసింది. కుటుంబ పెద్దల దీవెనలతో మొదలైన ఈ శుభకార్యానికి సంబంధించిన విజువల్స్ ఇప్పుడు అందరి దృష్టిని ఆకర్షిస్తున్నాయి.

బండ్ల గణేష్ తన కుమార్తెను ఒక ప్రముఖ పారిశ్రామికవేత్త ఇంటికి కోడలిగా పంపిస్తున్నారు. వరుడు సూర్యతేజ చిలుకూరి తండ్రి రియల్ ఎస్టేట్ రంగంలో ప్రముఖ వ్యాపారవేత్త అని తెలుస్తోంది. ఒక రకంగా రెండు పెద్ద కుటుంబాల మధ్య ఈ వియ్యం కుదురుతోంది. వ్యాపార రంగంలో మంచి పేరున్న కుటుంబం నుంచి సంబంధం రావడం, ఇరు వర్గాలకు నచ్చడంతో పెళ్లికి గ్రీన్ సిగ్నల్ ఇచ్చేశారు.

ఈ పసుపు కుంకుమ వేడుకకు కొందరు సినీ ప్రముఖులు కూడా హాజరై కొత్త జంటను ఆశీర్వదించారు. ముఖ్యంగా దర్శకేంద్రుడు కె. రాఘవేంద్రరావు ఈ కార్యక్రమానికి విచ్చేసి జనని, సూర్యతేజలకు తన దీవెనలు అందించారు. బండ్ల గణేష్ కు అత్యంత సన్నిహితులు, శ్రేయోభిలాషులు మాత్రమే ఈ వేడుకలో కనిపించారు. కుటుంబ సభ్యులందరూ సంప్రదాయ దుస్తుల్లో మెరిసిపోయారు.

ఈ వేడుకలో బండ్ల గణేష్ ఇద్దరు కుమారులు ప్రత్యేక ఆకర్షణగా నిలిచారు. తన సోదరి పెళ్లి పనుల్లో వారు యాక్టివ్‌గా పాల్గొంటూ సందడి చేశారు. ఫోటోల్లో బండ్ల వారసులు ఇద్దరూ చాలా హుందాగా కనిపిస్తున్నారు. తన పిల్లలందరితో కలిసి బండ్ల గణేష్ ఎంతో సంతోషంగా ఈ వేడుకను జరిపించారు. తండ్రిగా తన బాధ్యతను నెరవేరుస్తున్న క్రమంలో ఆయన ముఖంలో కనిపిస్తున్న ఆనందం ఆకట్టుకుంటోంది. త్వరలోనే నిశ్చితార్థం, పెళ్లి తేదీలకు సంబంధించిన పూర్తి వివరాలు వెల్లడి కానున్నాయి.

బండ్ల గణేష్ ఇంటి ఆడపడుచు ఒక పెద్ద ఇంటికి కోడలిగా వెళ్తుండటంతో అటు వ్యాపార వర్గాల్లో, ఇటు సినీ వర్గాల్లో ఈ పెళ్లి చర్చనీయాంశమైంది. చాలా కాలం తర్వాత బండ్ల కుటుంబం ఇలా ఒక శుభకార్యంతో వార్తల్లో నిలిచింది. పసుపు కుంకుమ వేడుక ఇంత గ్రాండ్‌గా జరిగిందంటే, ఇక పెళ్లి ఏ స్థాయిలో ఉంటుందో అని అందరూ చర్చించుకుంటున్నారు.