వీడు తండ్రి కాదు.. దుర్మార్గుడు.. అనారోగ్యపు కొడుకును చంపి మూసీలో పడేశాడు

హైదరాబాద్ పాతబస్తీ ప్రాంతం మరోసారి దారుణ ఘటనకు వేదికైంది. తండ్రి అనే బంధం ఎంత పవిత్రమో అందరికీ తెలుసు. అయితే ఇక్కడ పరిస్థితి పూర్తిగా తారుమారైంది. కాపాడాల్సిన కన్నతండ్రే తన బిడ్డ ప్రాణాన్ని తీసుకున్నాడు.

బండ్లగూడ పోలీస్ స్టేషన్ పరిధిలో నివసిస్తున్న మహమ్మద్ అనే వ్యక్తి తన కొడుకు అనారోగ్య సమస్యలతో బాధపడుతున్నాడనే కారణంతో అతన్ని హత్య చేశాడు. నిర్దాక్షిణ్యంగా శ్వాస ఆడనీయకుండా చంపి, మృతదేహాన్ని సంచిలో పెట్టి నయా పుల్ బ్రిడ్జ్‌ దగ్గర నుంచి మూసి నదిలో పడేశాడు. అనంతరం తన కొడుకు కనిపించడం లేదంటూ పోలీసులకు ఫిర్యాదు చేయడం ద్వారా మోసగించాలనుకున్నాడు.

* పోలీసులు గాలింపు

ఫిర్యాదు స్వీకరించిన బండ్లగూడ పోలీసులు కేసు నమోదు చేసి విచారణ చేపట్టారు. విచారణలో తండ్రి చెప్పిన వాక్యాల్లో అనుమానాస్పద అంశాలు బయటపడ్డాయి. దీంతో పోలీసులు మహమ్మద్‌ను అదుపులోకి తీసుకుని గట్టిగా ప్రశ్నించగా అతను చివరికి నిజం ఒప్పుకున్నాడు. తాను స్వయంగా కొడుకుని చంపేశానని, మృతదేహాన్ని మూసిలో పడేశానని అంగీకరించాడు.

* గాలింపు కొనసాగుతుంది

మహమ్మద్ ఇచ్చిన సమాచారం ఆధారంగా హైడ్రా ఎన్‌డిఆర్‌ఎఫ్ బృందం, స్థానిక పోలీసులు మూసి నదిలో గాలింపు చర్యలు కొనసాగిస్తున్నారు. మృతదేహాన్ని బయటకు తీయడానికి ప్రత్యేక బృందాలు శ్రమిస్తున్నాయి.

ప్రజల ఆగ్రహం

ఈ ఘటనపై స్థానికులు తీవ్ర ఆగ్రహం వ్యక్తం చేస్తున్నారు. "ఇది తండ్రి కాదు యముడు" అంటూ మండిపడుతున్నారు. కంటికి రెప్పలా కాపాడాల్సిన కొడుకును హత్య చేయడం మానవత్వాన్ని మింగేసిందని ఆగ్రహం వ్యక్తం చేస్తున్నారు.

సమాజంలో చర్చ

ఈ ఘటనతో తండ్రి మానసిక స్థితిపై, ఆర్థిక భారాలు, కుటుంబ సమస్యలు, అనారోగ్య ఒత్తిడి వంటి అంశాలపై చర్చ మొదలైంది. అయితే ఏ పరిస్థితుల్లోనూ పసివాడి ప్రాణం తీయడం సమాజం అంగీకరించదని పలువురు అభిప్రాయం వ్యక్తం చేస్తున్నారు.

ఈ దారుణ ఘటనతో హైదరాబాద్ ప్రజలు ఒక్కసారిగా షాక్‌కు గురయ్యారు. న్యాయం జరిగే వరకు ఈ కేసు చర్చకు దారి తీస్తుందనడంలో సందేహం లేదు.