గ్యాంగ్స్ ఆఫ్ గోదావ‌రికి ఆ డేట్?

టాలీవుడ్ యువ క‌థానాయ‌కుడు విశ్వ‌క్సేన్ ఆదివారం ఉద‌యం పెట్టిన ఒక సోషల్ మీడియా పోస్టు చిన్న‌పాటి క‌ల‌క‌ల‌మే రేపింది టాలీవుడ్లో. కొన్ని నెల‌ల ముందే డిసెంబ‌రు 9కి రిలీజ్ డేట్ ఖాయం చేసుకున్న త‌న సినిమా గ్యాంగ్స్ ఆఫ్ గోదావ‌రిని ఆ తేదీ నుంచి వాయిదా వేయించ‌డానికి ప్ర‌య‌త్నాలు జ‌రుగుతున్నాయ‌నే అర్థం వ‌చ్చేలా అత‌ను ఈ పోస్ట్ పెట్టాడు. బ్యాగ్రౌండ్ లేక‌పోవ‌డం వ‌ల్ల త‌న‌ను తొక్కాల‌ని చూస్తున్నార‌ని.. ఎట్టి ప‌రిస్థితుల్లోనూ డిసెంబ‌రు 9న త‌న చిత్రం రావాల్సిందే అని నిర్మాతకు అల్టిమేటం కూడా విధించాడ‌త‌ను. ఆ రోజు గ్యాంగ్స్ ఆఫ్ గోదావ‌రిని రిలీజ్ చేయ‌క‌పోతే తాను ప్ర‌మోష‌న్ల‌లో కూడా పాల్గొన‌న‌ని అత‌ను హెచ్చ‌రించ‌డం హాట్ టాపిక్‌గా మారింది. ఈ స్థితిలో నిర్మాత నాగ‌వంశీ ఏం చేస్తాడా అని అంద‌రూ ఎదురు చూస్తున్నారు. ఐతే వంశీ అయితే ఈ సినిమా రిలీజ్ విష‌యంలో ఒక నిర్ణ‌యం తీసేసుకున్న‌ట్లు స‌మాచారం.

డిసెంబ‌రు రెండో వారంలో తీవ్ర‌మైన పోటీ ఉండ‌టం, థియేట‌ర్లు చాలిన‌న్ని దొరికే అవ‌కాశం లేక‌పోవ‌డంతో డిసెంబ‌రు 29న ఈ చిత్రాన్ని రిలీజ్ చేయాల‌ని నాగ‌వంశీ డిసైడ‌య్యాడట‌. డిసెంబ‌రు మూడో వారం ఆప్ష‌న్ కూడా ఉన‌ప్ప‌టికీ స‌లార్ ముంగిట ఈ చిత్రాన్ని రిలీజ్ చేయ‌డం రిస్క్ అవుతుంద‌ని భావిస్తున్నాడ‌ట‌. అందుకే క్రిస్మ‌స్, సంక్రాంతి మ‌ధ్య‌లో డేట్‌ను ఎంచుకున్న‌ట్లు తెలుస్తోంది. ప్ర‌స్తుతానికి విశ్వ‌క్ బెట్టు చేస్తున్న‌ప్ప‌టికీ.. అత‌డికి స‌ర్దిచెప్పి, ప్ర‌మోష‌న్ల‌కు ఒప్పించి కొత్త డేట్ ప్ర‌క‌టించ‌బోతున్నార‌ట‌. ఈ సినిమా మీద టీం అంతా చాలా కాన్ఫిడెంట్‌గా ఉన్న‌ప్ప‌టికీ స‌రైన డేట్ ఎంచుకోవ‌డం స‌వాలుగా మారింది. లిరిసిస్ట్ ట‌ర్న్డ్ డైరెక్ట‌ర్ కృష్ణ‌చైత‌న్య రూపొందించిన ఈ చిత్రంలో విశ్వ‌క్ స‌ర‌స‌న నేహా శెట్టి క‌థానాయిక‌గా న‌టించింది. గోదావ‌రి ప్రాంతంలో రౌడీ గ్యాంగుల పోరు నేప‌థ్యంలో న‌డిచే క‌థ ఇది.