శృతి మాటలు నమ్మొచ్చా

నాలుగేళ్ల క్రితం గబ్బర్ సింగ్ దెబ్బకు ఒక్క సినిమాతో స్టార్ హీరొయిన్ అయిపోయిన శృతి హాసన్ ఈ మధ్య సినిమాల్లో బొత్తిగా కనిపించడం మానేసింది. లాస్ట్ ఇయర్ పవన్ కళ్యాణ్ తో చేసిన కాటమ రాయుడు డిజాస్టర్ కావడమే కాక హీరొయిన్ అయిన తన మీద విమర్శలు ఎక్కువ రావడం పట్ల శృతి కొంచెం కినుకుగా ఉంది. దాని తర్వాత మాత్రం ఏ సినిమాకు ఓకే చెప్పలేదు. నటి ఖుష్బూ భర్త, దర్శకుడు సుందర్.సి భారీగా తలపెట్టిన సంఘమిత్ర సినిమాకు ముందు ఎస్ చెప్పి ఆ తర్వాత తప్పుకున్న శృతి హాసన్ దాని వల్ల కొంత వివాదంలో ఇరుక్కున్న విషయం ఫాన్స్ ఇంకా మర్చిపోలేదు. స్క్రిప్ట్ ఇంకా పూర్తి కాలేదు కాబట్టే వదిలేసాను అని చెప్పిన శృతి వెర్షన్ తో దర్శక నిర్మాతలు విభేదించినప్పటికీ అది ఇప్పుడు గతం. తాజాగా ఒక మీడియా ఇంటర్వ్యూలో అసలు తాను ఎందుకు సినిమాలు చేయటం లేదో చెప్పే ప్రయత్నం చేసింది శృతి హాసన్.

గతంలో తాను ఒప్పుకుని చేసిన కొన్ని సినిమాలు ప్రొడక్షన్ స్టేజిలో ఉన్నప్పుడే ఇవి ఎందుకు ఒప్పుకున్నానా అని ఫీల్ అయ్యానని, తర్వాత చేయకపోయి ఉంటే బాగుండేది అని అనిపించిందని, అందుకే తొందరపడి ఏ సినిమాలు సైన్ చేయటం లేదని చెప్పింది. నిజానికి శృతికి గతంలో ఉన్నంత డిమాండ్ ఇప్పుడు లేదు. కొత్త హీరొయిన్ల తాకిడి సౌత్ లో ఉన్న అన్ని బాషా సినిమాల్లో ఎక్కువగా ఉండటంతో సీనియర్ అయిన తనకు ఎవరు పెద్దగా ఆఫర్స్ ఇవ్వడం లేదు. కాని శృతి చెబుతోంది మాత్రం మరోలా ఉంది.

చేతిలో సినిమాలు ఏవి లేకపోయినా శృతి హాసన్ నటించిన ఒక్క సినిమా మాత్రం విడుదలకు సిద్ధంగా ఉంది. అదే శభాష్ నాయుడు. నాన్న కమల్ హాసన్ తో ఆయన కూతురిగా రియల్ లైఫ్ పాత్ర పోషించిన శృతి ఆ షూటింగ్ సమయంలోనే గౌతమి తో గొడవ పడిందనే వార్తలు జోరుగా షికారు చేసాయి . ఆ తర్వాత కొంత కాలానికి కమల్-గౌతమి పూర్తిగా విడిపోయారు. దీంతో తనకు సంబంధం లేదని శృతి హాసన్ పలుమార్లు క్లారిటీ ఇచ్చినప్పటికీ కోలీవుడ్ మీడియాలో దీని గురించి గుసగుసలు కొనసాగుతూనే ఉన్నాయి.