రాబోయే సినిమాలపై ఓ క్లారిటీ...

సమ్మర్లో భారీ సినిమాల సందడికి తెరపడ్డట్లే. ఒక బ్లాక్ బస్టర్.. రెండు డిజాస్టర్లతో సమ్మర్ సీజన్ చివరి దశకు వచ్చేసింది. ఇక జూన్ నుంచి కొత్త సీజన్ ఆరంభం కాబోతోంది. భారీ సినిమాలు తెరపి ఇవ్వడంతో ఇక మళ్లీ మీడియం-చిన్న మీడియం సినిమాల సందడి మొదలుకాబోతోంది. రాబోయే రెండు నెలల్లో దాదాపు ప్రతి వారానికి సినిమాల షెడ్యూళ్లు దాదాపు ఖరారైపోయాయి. ముందుగా జూన్ 2న ‘అ..ఆ’ భారీ అంచనాల మధ్య రాబోతోంది.

తర్వాతి వారం సందీప్ కిషన్ ‘ఒక్క అమ్మాయి తప్ప’తో పాటు సుమంత్ అశ్విన్ ‘రైట్ రైట్’ కూడా రిలీజవుతుంది. 17న నాని సినిమా ‘జెంంటిల్ మన్’ మంచి క్రేజ్ మధ్య విడుదల కాబోతోంది. తర్వాతి వారం మెగా ప్రిన్సెస్ కొణిదెల నీహారిక కథానాయికగా పరిచయం కాబోతున్న ‘ఒక మనసు’ ప్రేక్షకుల ముందుకొస్తుంది. ఆపై వారం తెలుగు సినిమాలేవీ రిలీజవ్వడానికి అవకాశం లేదు. ఎందుకంటే జులై 1న సూపర్ స్టార్ రజినీకాంత్ మూవీ ‘కబాలి’ తమిళ-తెలుగు భాషల్లో విడుదలవుతుంది.

‘కబాలి’ వచ్చిన వారానికి విక్టరీ వెంకటేష్ సినిమా ‘బాబు బంగారం’ను ప్లాన్ చేస్తున్నారు. ఇక జులై 15న నాగచైతన్య మోస్ట్ అవైటెడ్ మూవీ ‘సాహసం శ్వాసగా సాగిపో’ షెడ్యూల్ అయి ఉంది. చైతూ నటిస్తున్న మరో సినిమా ‘ప్రేమమ్’ ఇంకో రెండు వారాల గ్యాప్ లో.. అంటే జులై 29న విడుదల చేయాలనుకుంటున్నారట. అంతటితో చిన్న-మీడియం సినిమాల సందడికి తెరపడుతుంది. ఆగస్టులో ‘జనతా గ్యారేజ్’ విడుదలవుతుంది. 12న ఆ సినిమా ప్రేక్షకుల ముందుకొస్తుంది. దీనికి ముందు.. తర్వాతి వారాల్లో వేరే సినిమాలేవీ విడుదల కాకపోవచ్చు.